1 SAN JUAN
San Juanpa K'art'a Naapùara P'ãda
San Juan, Jesucristopa jùrùt'eradapa na k'art'a p'ãji. Pëiji jõmaweda Cristode ijãapataarãmaa. Ûraa k'inia baji jîp'a ijãapataadamerã Ak'õrepa jùrùt'eradaarãpa jarateedap'edaak'a, seewa jarateepataarãpa ijãapataarã k'ûra nipapatap'edaa perã. Na k'art'ade Juanpa audú jara bù sãga Tachi Ak'õrepa ijãapataarã k'inia iru bapari.
Naapùara jara bù ichia unuda Jesucristo, Tachi Ak'õre pedee chok'ai pùk'a bù (cap. 1.1-4). Jara bù Tachi Ak'õre âdaa pùk'a bù mãik'aapa Cristode ijãapataarã iru âdaa pùk'a bùde p'anapataadaipia bù (caps. 1.5--2.6). Jara bù ûraa chiwidi Cristopa jarateedak'a: chik'inia p'anapataadamerã. Ûraa bù warrarã chonaarã ome (cap. 2.7-17). Jara bù ijãapataarãpa k'irãpadamerã naaweda jarateeda ûridap'edaa mãik'aapa k'ûrapinaadamerã seewa jarateepataarãmaa (caps. 2.18--3.10). Jara bù Cristode ijãapataarã Tachi Ak'õre warrarã perã, p'ek'au k'achia jõmaweda oo amaadaipia bù mãik'aapa chik'inia p'anapataadaipia bù, k'îsia p'ua–ee (cap. 3.11-24). Jara bù sãga k'awaadai Ak'õre Jaurepa jarapi bù pedee mãik'aapa seewa pedee (cap. 4.1-6). Jara bù chik'inia p'anapataadamerã, Tachi Ak'õrepa ijãapataarã k'inia iru bapari perã (cap. 4.7-21). Jara bù jõmaweda Tachi Ak'õre Warrade ijãapataarãpa p'oyaapata #k'inia p'anapata? na p'ek'au eujãdepemaarãpa ne–inaa k'achia oopata (cap. 5.1-5). Jara bù Tachi Ak'õrepa ichita oopari ichia jara bùk'a mãik'aapa ichi Warrade ijãapataarã o k'achiadeepa k'aripa atapari atuanaadamerã (cap. 5.6-12). T'êepai jara bù chik'aripa p'anapataadamerã, p'ek'au k'achia p'oyaa wãruta misa (cap. 5.13-21).