Tachi Waibùa waya cheit'ee
3
1 Âpemaarã k'iniarã, na k'art'ade mãik'aapa apema k'art'a mùa parãmaa p'ã pëidade, nãgà ne–inaa jõma k'irãpapiji. Ma awara ûraaji jîp'a k'îsiadamerã Tachi Ak'õrepa k'inia bùk'a. 2 K'irãpátù chonaarãwedapema Ak'õre pedee jarapataarãpa jaradap'edaa, jaradak'ãri Tachi Ak'õrepa ooit'ee bada ãchi t'êepai. Ichiaba k'irãpátù Tachi Waibùa, Tachi K'aripaparipa jarada tai k'ap'ùa pari. Irua tai parãmaa pëiji jarateedamerã, mãgá parãpa iru ûraa pia k'awaadamerã.3 Mamîda ma jõma jaradap'edaade k'îsiadap'eda, nãgà audupùara k'irãpátù pia k'awaadamerã. Tachi Waibùa waya chei naaweda, parã ijãapataarã t'ãide Tachi Ak'õre Ûraa oo iru p'anapataarã uchiadait'ee. Mãgùùrãpa oodait'ee ãchi p'ek'au k'achia ooyaa bù k'ap'ùapa oopi bùk'a mãik'aapa parã oo iru p'anadait'ee. 4 “¿Sãgajima adait'ee, Tachi Ak'õrepa Cristo waya pëiit'eeda ada? Ma jarada ûridap'edaarã jai–idaadak'ãriipa, na eujã aùde nâbù ome auk'a bù naawedapemak'a, Tachi Ak'õrepa ewaa ook'ãri. ¡Cristo waya che–e pait'eeda!” adait'ee. 5 Mãùrãpa mãga jarapata k'irãpa k'iniada–e p'anadairã Tachi Ak'õrepa naaweda ooda. Ichi pedeepapai pajã beeji mãik'aapa auk'a ichi pedeepapai pania ûk'uru ãyaa pëiji eujã uchiamerã paniadeepa. 6 Ichiaba ichi pedeepapai ma p'ek'au eujã jõpiji paniapa ûupik'ãri. 7 Ma awara auk'a ichi pedeepapai pajã mãik'aapa eujã jâa iru bù ichi ewari waibùa ewate t'ùpùtaupa jõpirumaa. Ma ewate ijãadak'aa beerã jõmaweda atuapiit'ee.
8 Âpemaarã k'iniarã, ichiaba k'irãpátù nãgà pedee. Tachi–it'ee k'ãima aba mak'ùara taarã–e; jõdee mil año taarãpari. Mamîda Tachi Ak'õre–it'ee k'ãima aba auk'a bù mil año ome. Jõdee mil año auk'a bù k'ãima abaa ome. 9 Eperãarã ûk'uruurãpa k'îsia p'anù Cristo waide che–e bairã, Tachi Ak'õrepa oo–e pait'ee ichia jaradak'a. Mamîda mãga–e. Iru choo nâbù mãik'aapa parã chupùria k'awaa nâbù, k'inia–e bairã apida atuanaadamerã. Ma k'ãyaara k'inia bù jõmaarãpa ne–inaa k'achia oo amaadamerã mãik'aapa irua oopi bùk'a #oodamerã, iru ewari waibùa ewate pai naaweda.
10 Tachi Ak'õre mãgá choo nâbù mîda, ichi ewari waibùa ewate pait'ee. Ara nechùapari p'ãrik'ua tachi atu p'anùde paruk'a, mãga pùk'a eperãarã atu p'anùde iru ewari waibùa ewate pait'ee. Ma ewate golpe pururua nâbùde pajã wêpadariit'ee mãik'aapa Tachi Ak'õrepa jõmaweda aùde nâbù atane, ak'õrejîru, mãgee t'ùpùtaupa jõpiit'ee. Auk'a na p'ek'au eujã mãik'aapa aùde nâbù jõmaweda jõpiit'ee.
11 Mãgá Tachi Ak'õrepa ne–inaa jõmaweda jõpiit'ee perã, ¿sãga parã p'anapataadaipia bùma? K'achia wêe p'anapataadaipia bù irua k'inia bùk'a. 12 Nù p'anadaipia bù iru ewari waibùa ewate pamerã mãik'aapa oodaipia bù irua oopi bùk'a, ma ewate isapaira pamerã. Ma ewate pajã jõit'ee t'ùpùtaupa. Jõmaweda aùde nâbù mãik'aapa na p'ek'au eujãde nâbù auk'a jõit'ee. 13 Mamîda irua jaraji ma t'êepai pajã chiwidi mãik'aapa eujã chiwidi ooit'ee. Mãgà eujãde eperãarãpa irua oopi bùk'a oodait'ee, aùde ne–inaa k'achia wê–e perã. Mãgà eujãta tachia nùmaa p'anù.
14 Maperã âpemaarã k'iniarã, parã nù p'anù misa Ak'õrepa oomerã ichia jaradak'a, jùrùpatáatù k'achia wêe p'anapataadait'ee iru k'îrapite. Mãgá t'ãri auk'a p'anapataadai iru ome. 15 K'irãpátù Tachi Waibùa choo nâbù k'inia bairã jõmaarãpa ichide ijãadamerã mãik'aapa t'îudamerã Tachi Ak'õre ode, ichi waya chei naaweda. Tachi âpema k'inia Pablopa ma ûraa ichiaba p'ã pëiji parãmaa, Tachi Ak'õrepa iru k'îsia k'awaapida perã. 16 Irua k'art'a jõma p'ãdade ma ûraa jaradoo, madepema pedee ûk'uru tachia pia p'oyaa k'awada–e p'anù mîda. K'îsia k'awa–ee p'anùùrãpa mãik'aapa waide pia ijãada–e p'anùùrãpa oopata mãgà pedee ome, awaraa Tachi Ak'õrepa ûraa p'ãpida ome oopatak'a. Ãchi k'îsiadeepa ma ûraa seewa papipata mãik'aapa awaraarãmaa ma seewa jarateepata. Maperãpù ãchi atuadait'ee.
17 Mãpai âpemaarã k'iniarã, ârá parãpa k'awa p'anadairã mãgee seewa jarateepataarã uchiadait'ee ijãapataarã t'ãide, k'îrak'aupai ijãadai ãrapa jarateepata. Ichiaba k'îrak'aupai oodai ãrapa oopatak'a, oodak'aa perã Tachi Ak'õre Ûraade jara bùk'a. Ârá parãpa pia ijãapata. Mamîda k'ûrapiruta pùrã ãramaa, parã ãyaa atadaridai Cristo ik'aawaapa. 18 Ma k'ãyaara pipùara k'awa wåtù Tachi Waibùa, Tachi O K'achiadeepa K'aripa Atapari Jesucristo mãik'aapa irumaa iidítù parã k'aripamerã. Mãgá p'anapataadait'ee irua k'inia bùk'a. ¡Irua Tachi Ak'õre k'îra wãree ichita unupiit'ee, na eujã jõru pùjida! ¡Amén!
Mãgapai paji.