Seewa jarateepataarã
2
1 Mamîda maapai israelitaarã, tachi chonaarã t'ãide ichiaba seewa jarateepataarã paraaji. “Tai ichiaba Tachi Ak'õre pedee jarapataarãda” apachida mîda, mãga–e paji. Mãùrã jîak'a parã t'ãide ichiaba seewa jarateepataarã paraait'ee. Mãùrãpa ãchi k'îsiadeepa ijãapataarãmaa seewa imeraa jarateedait'ee. Meradait'ee Jesucristo tachi chipari, irua ãchi neto pùk'a ataji mîda ãchi pari piuk'ãri, atuanaadamerã. Ma meraruta k'aurépata, atu p'anùde Tachi Ak'õrepa ãchi jõpiit'ee. 2 Chok'araarãpa ma seewa ijãadait'ee mãik'aapa pariatua p'ek'au oo p'anapataadait'ee mãùrã jîak'a. Ma k'aurepa jõmaarãpa pedee k'achia jaradait'ee Tachi Ak'õre o wãara bùde. 3 Ma awara mãùrãpa p'arat'a audú ata k'inia p'anadairã, parã k'ûradait'ee seewa jaratee p'anùùpa. Taarãweda Tachi Ak'õrepa k'îsia iru bù mãgeerã atuapiit'ee. Tachia k'awa p'anù iru sêk'aa mãik'aapa k'ãik'aa. Irua wãara ãchi jõpiit'ee.4 K'îsiadáma nãgùde. Tachi Ak'õrepa ichi angeleerãpa k'achia oodap'edaa wêpapi–e paji. Ãchi pëiji eperãarã k'achia beerã piudap'edaarãmãiipa waawí mãik'aapa jâa paraa bùji uria audú nãpùa bùde, mama iru ewari waibùa ewate nùdamerã.a 5 Ichiaba chonaarãweda Tachi Ak'õrepa wêpapi–e paji eperãarãpa p'ek'au k'achia oodap'edaa. Ãchi jõpiji na p'ek'au eujã jõma ûupirupa. Mãga ooji ijãadak'aa p'anapatap'edaa perã. Jîp'a Noé awaraa eperãarã siete ome chok'ai uchia ataji, Noepa jarateepachi perã eperãarã Tachi Ak'õrepa k'inia bùk'a p'anapataadamerã.b 6 Ichiaba Tachi Ak'õrepa wêpapi–e paji Sodoma p'uurudepemaarãpa ne–inaa k'achia oodap'edaa mãik'aapa Gomorra p'uurudepemaarãpa ne–inaa k'achia oodap'edaa. Ma p'uuru omeeweda k'achia ooji t'ùpùtaupa jõpik'ãri. Mãga ooji mãùrã t'êepai ijãadaamaa p'anadait'eerãpa k'awaadamerã irua k'achia beerã k'achia oopari. 7 Mãga ooji mîda ma p'uurudepemaarãmaa, ma p'uuru jõt'aai naaweda irude ijãa bada, Lot chok'ai uchiapiji. Mãgà eperã pia baji Ak'õre k'îrapite. Iru audupai k'îsia nâbapachi, p'ek'au ooyaa p'anapatap'edaarã t'ãide bapachi perã. 8 Ma p'uuru pidaarãpa oodak'aa paji Tachi Ak'õrepa k'inia bùk'a. Ma k'ãyaara ne–inaa k'achia aupai oopachida. Mapa mãgà eperã pia bùta ichi t'ãride miapachi, ewari chaa ma k'achia beerãpa oopata unupachi perã mãik'aapa ûripachi perã.
9 Mamîda Tachi Ak'õrepa Lot uchiapiji ma k'achia beerã t'ãideepa. Tachi Ak'õrepa k'awa bù sãga k'aripait'ee ichide ijãapataarã, ne–inaa k'achia oonaadamerã mãik'aapa irua k'inia bùk'a oodamerã. Jõdee ichia k'awa bù sãga jâa pùk'a bùit'ee k'achia oopataarã ãchi miapirumaa mãik'aapa atuapirumaa ichi ewari waibùa ewate. 10 Audupùara miapiit'ee oo p'anapataarãpa ãchi p'ek'au k'achia ooyaa bù k'ap'ùapa oopi bùk'a. Mãùrãpa oodaamaa p'anapata Tachi Ak'õrepa oopi bùk'a.
Mãgà seewa jarateepataarãpa ãchia oo k'iniata oopata. K'ùùrù k'isua p'anapata mãik'aapa audua p'anapata. Waaweeda–ee pedee k'achia jaradait'ee angeleerã ãpùte. 11 Jõdee angeleerã, mãùrã k'ãyaara waibùara p'anù mîda, maarepida pedee k'achia jarada–e, k'achia beerã ùmùateenadak'ãri Tachi Ak'õre k'îrapite. 12 Ma seewa jarateepataarã ne–animalaaråk'apù p'anù. Ne–animalaarã k'îsiadak'aa eperãarãk'a. Oopata ãchi k'ap'ùapa oopi bùk'a. T'opata eperãarãpa jita atadamerã mãik'aapa peedamerã. Mãga pùk'a p'anù ma seewa jarateepataarã. Pedee k'achia jarapata ne–inaa jõma ãchia k'awada–e p'anù ãpùte. Ma k'aurepa Tachi Ak'õrepa ãchi jõpiit'ee, eperãarãpa ne–animalaarã jõpipatak'a. 13 Ãchi miadait'ee ne–inaa k'achia oopata perã. Ãstaawa pida oo k'inia p'anapata ãchi p'ek'au k'achia ooyaa bù k'ap'ùapa oopi bùk'a. Parã ijãapataarã t'ãide paara mãga oopata, t'îudak'ãri nek'odait'ee parã ome. Mãgá parã k'ûrapata auk'a oo k'inia p'anadamerã ãchia oopatak'a. Ãchi k'aurépata awaraarãpa parã pia ak'ùda–e p'anù.
14 Ãchia wêraarã unudak'ãri, audú k'ãi k'inia p'anapata mãùrã ome. Ichita k'îsia p'anapata ne–inaa k'achia oodait'ee. K'ûrapata pia ijãada–e p'anùùrã, auk'a k'ãi k'inia p'anadamerã ãchi ome. Jùrùpata waapùara ne–inaa k'achia oodait'ee mãik'aapa k'âapata ne–inaa jõma ãchia iru p'anadaik'araa bù. Maperãpù Tachi Ak'õrepa ãchi k'achia ooit'ee, ichia ooda mîda. 15 Mãgá p'ana k'iniapa ãchia Tachi Ak'õre o atuajida. Oodai k'ãyaara Tachi Ak'õrepa oopi bùk'a, oopata chonaarãwedapema Bosor warra Balanpa oodak'a. Mãgùpa ne–inaa k'achia ooit'ee paji, p'arat'a audú ata k'inia bada perã mãga oorumaa. 16 Mamîda Tachi Ak'õrepa iru burromaa pedeepiji ùtrùat'aamerã. Ne–animal paji mîda, mãgà burropa pedeeji mãik'aapa oopi–e paji chiparipa ma ne–inaa k'achia k'îra k'awa–ee, pariatua oomerã.
17 Ma seewa jarateepataarã pozo p'oo bàk'apù p'anù maa–e pùrã jâarara pania wêe bàk'apù p'anù, parã k'aripada–e p'anadairã. Mapa Tachi Ak'õrepa ãchi pëiit'ee p'ãriudee. 18 Ma seewa jarateepataarãpa iwêsaa, pedee audua, pariatua nãga jarateepata: ijãapataarãpa oodai jõma ãchia p'ek'au k'achia ooyaa bù k'ap'ùapa oopi bùk'a. Ma awara ãchia ijãapataarã jùrùpata k'achia oodait'ee ãra ome. Mãgá k'ûrapata ewaa uchiarutaarã ijãadak'aa beerã p'anapatadeepa. 19 Jarapata ãchi eere t'îurutaarã apida jua ek'ari p'anapataadait'ee. Mamîda ãchita p'ek'au k'achia jua ek'ari p'anapata esclavoorãk'a, oopata perã ãchi p'ek'au k'achia ooyaa bù k'ap'ùapa oopi bùk'a. Mãgùmaa p'oyaapijidapù. 20 Mãùrãpa Tachi Waibùa, Tachi K'aripapari Jesucristo k'awadak'ãri, oo amaajida na p'ek'au eujãdepema ijãadak'aa beerãpa oopata mãik'aapa uchiajida p'ek'au k'achia jua ek'ariipa. Mamîda mãga oodap'eda, waya baaijida p'ek'au k'achiade, p'oyaapidap'edaa perã ãchi p'ek'au k'achia ooyaa bù k'ap'ùamaa. Maperãpù ârá k'achiara p'anù ãchi ijãadai naaweda p'anadap'edaa k'ãyaara. 21 Piara bak'aji k'awada–e pada paara sãga p'anapataadait'ee Tachi Ak'õrepa k'inia bùk'a, mãga k'awa p'anadap'eda, uchiadai k'ãyaara iru jua ek'ariipa, ijãadaamaa p'anadairã irua ûraa pia jara pëida eperãarãmaa. 22 Mamîda mãgùùrã p'anapata nãgà wãara pedee eperãarãpa jarapatak'a:
‘Usapa ãp'op'eda, waya k'o chepari ichi ãp'oda.’ (Proverbios 26.11)
mãik'aapa ‘Sina pania bëisãade k'uip'eda, waya yoorode t'îupari.’