2 SAN PEDRO
San Pedropa K'art'a T'êepema P'ãda
Salude pëida
1
1 Mù, Simón Pedropa oopari Jesucristopa oopi bùk'a. Irua mù pëiji ichi ûraa jarateede.Mapa na k'art'a p'ãru parã Cristode ijãapataarã, tai jîak'a ijãa p'anùùrãmaa. Jesucristo Tachi Ak'õre. Irua tachi o k'achiadeepa k'aripa atapari. Audú t'ãri pia bapari perã, tachi auk'a k'aripaji irude ijãapataadamerã. 2 Mùa ùt'aa iidi bù Tachi Ak'õrepa parã audú pia ak'ù bapariimerã. Mãgá k'ãiwee p'anapataadait'ee iru mãik'aapa Tachi Waibùa Jesús ome k'awa wãdade.
P'anapatáatù Tachi Ak'õrepa k'inia bùk'a
3 Tachi Ak'õre jõmaarã k'ãyaara waibùara bairã, tachimaa teepari ne–inaa jõma falta p'anù p'anapataadamerã irua k'inia bùk'a. Mãgá p'anapataadait'ee iru wãara k'awaadak'ãri. Iruata tachi jùrùji k'awapiit'ee ichi k'îra wãree mãik'aapa t'ãri pia, mãgá p'anapataadamerã ichik'a. 4 Iru mãga bapari perã, tachimaa jaraji jõmaweda ne–inaa pi–ia ichia ooit'ee tachi k'aripait'ee. Mãga jaraji parãpa ma jarada ijãa p'anùùpa iruk'a padaidamerã mãik'aapa uchiadaidamerã na p'ek'au eujãdepema ijãadak'aa beerãpa ne–inaa k'achia oopata jua ek'ariipa. Ãchia p'ek'au k'achia k'îra t'ãdoo oopata, ãchia oo k'iniata oopata perã. 5 Tachi Ak'õrepa ma jõma ooda perã parã k'aripait'ee, jùrùpatáatù Cristode wãara ijãapataadait'ee. Ma awara jùrùpatáatù t'ãri pia, k'îsia k'achia wêe p'anapataadait'ee. Ma awara jùrùpatáatù k'îsia k'awaa p'anapataadait'ee. 6 Ma awara jùrùpatáatù oo amaadait'ee tachi p'ek'au k'achia ooyaa bù k'ap'ùapa oopi bùk'a. Ma awara jùrùpatáatù choodait'ee pãchi ijãa p'anùde, nepùrade baairuta pùjida. Ma awara jùrùpatáatù Tachi Ak'õre k'inia iru p'anapataadait'ee. 7 Ma awara jùrùpatáatù chik'inia p'anapataadait'ee pãchi âpemaarã Cristo k'aurepa ome. Ma awara jùrùpatáatù eperãarã jõmaweda k'inia iru p'anapataadait'ee Tachi Ak'õrepa ãchi k'inia iru baparik'a.
8 Parãpa ichita waapùara jùrùruta pùrã mãgá p'anapataadait'ee, Tachi Waibùa Jesucristo wãara k'awa wãdait'ee mãik'aapa p'anapataadait'ee irua k'inia bùk'a. Oodait'ee irua oopi bùk'a. 9 Mamîda chi jùrù–e bùpa mãgá bapariit'ee k'îsia k'awa–ee bù. Eperã tau t'awaa pùk'a bù, k'ait'apai unupari perã. Mãgùpa na p'ek'au eujãdepema net'aa audupùara k'awa k'inia bù, Cristo k'awai k'ãyaara. K'irãpa k'inia–e ichia naawedapema p'ek'au k'achia ooda Tachi Ak'õrepa wêpapiji.
10 Maperã mùchi âpemaarã, jîp'a jùrùpatáatù p'anapataadait'ee mùa et'ewa jaradak'a. Mãga ooruta pùrã, ak'ùpidait'ee Tachi Ak'õrepa parã jùrùp'eda, wãara jùrùt'eraji ichideerã papiit'ee. Ma awara mãga ooruta pùrã, k'achiade baaida–e pait'ee. 11 Ma k'ãyaara ewari cherude Tachi Ak'õrepa parã o–îa auteebaiit'ee mãik'aapa wãpiit'ee Tachi Waibùa, Tachi O K'achiadeepa K'aripa Atapari Jesucristo truadee. Mãgà trua jõk'aa Tachi K'aripapari mama bapari perã.
12 Ma jõma jara aupada mùa parãmaa ip'ii k'irãpapiit'ee, mãgà ûraa k'awa p'anù mîda mãik'aapa ijãa p'anù mîda jõma Tachi Ak'õrepa wãarata jara pëida parãmaa. 13 Wãara, mùa k'inia bù parãpa mãgà ûraa k'irãpadamerã, mù–it'ee Tachi Ak'õrepa mãga k'inia bairã. Mùa mãga ooit'ee chok'ai bù misa, 14 Tachi Waibùa Jesucristopa mùmaa k'awapida perã taarã–e mù na k'ap'ùadeepa uchiait'ee piuk'ãri. 15 Mamîda jùrùit'ee parãpa mù ûraa ichita k'irãpa p'anapataadamerã, mù piuda t'êepai.
Cristo k'îra awaradaida unudap'edaarã
16 Taipa parãmaa jarateejida Tachi Waibùa Jesucristopa ooda mãik'aapa iru waya cheit'ee. Maapai jarateeda–e paji eperãarãpa oopatak'a, ãchi k'îsiadeepa nepùrùdak'ãri awaraarã k'ûradait'ee. Ma k'ãyaara tachi taupa taipa iru k'îra wãree unujida. 17 Mãga unujida Tachi Ak'õrepa taimaa ak'ùpik'ãri irua Cristo pia ak'ùpari. Mãga ooji iru k'îra wãree eujãdeepa pedeek'ãri:
‘Nãgùta mù Warra k'inia, mùa jùrùt'erada. Irua mù t'ãri o–îapipari.’ (Mateo 17.5; Marcos 9.7; Lucas 9.35)
18 K'ùùrùpa taipa mãgà otau ùt'ariipa pedeeda ûrijida, mãga nùde tai p'anadap'edaa perã Tachi Waibùa ome ee awara bùdade Tachi Ak'õre–it'ee.
19 Tachi Ak'õrepa mãgà pedee jarai naaweda, chonaarãweda ichi pedee jarapataarãpa iru Warradé jarajida mãik'aapa p'ãjida. Mapa taipa mãgà pedee ûridak'ãri tachi k'ùùrùpa, k'awaajida wãara Tachi Ak'õre Ûraa p'ãdade jara bùk'a, mãgá ichita p'asait'ee. Tachi Ak'õre Ûraa p'ãda lámpara p'ãriude bùk'a bù, âdaaru misa; pia jarait'eera, Cristo waya cheru misa. Ma ewate irua na p'ek'au eujãdepema p'ãriu pùk'a bù wêpapiit'ee mãik'aapa Tachi Ak'õre wãarata jõmaweda k'awaapiit'ee tachi t'ãrimaa. 20 Mamîda Tachi Ak'õre Ûraa p'ãda mãgá ak'ùdai naaweda, parãpa na pedee k'awaadaipia bù. Tachi Ak'õre pedee jarapataarãpa jaradap'edaa leedap'eda Ak'õre Ûraa p'ãdade, apidaapa jaradaik'araa bù ichi k'îsiadeepa ma pedee k'ãata jara k'inia bù, jarateei awaraarãmaa. 21 Tachi Ak'õre pedee jarapataarãpa pedee apida ãchi k'îradoopa jaradak'aa paji. Ma k'ãyaara Tachi Ak'õre pedee jarapachida Tachi Ak'õre Jaurepa jarapidak'a.