Chonaarãpa ijãapatap'edaak'a ijãadaipia bù
11
1 ¿K'ãata jara k'inia bùma Tachi Ak'õrede ijãapari? Ijãapata perã k'awa p'anù wãarata uchiait'ee Tachi Ak'õrepa jara bùk'a, waide mãga unuda–e p'anù mîda. 2 Tachi chonaarãpa mãgá ijãa p'anapatap'edaa perã, Tachi Ak'õrepa ãra pia ak'ùji.3 Ijãapata perã tachia k'awa p'anù Tachi Ak'õrepa na p'ek'au eujã mãik'aapa pajã ooji ichi pedeepapai. Mapa ârá tachia jõmaweda unu p'anù irua ooda ne–inaa wê–e padadeepa.
4 Abelpa ijãa bada perã, Tachi Ak'õremaa ne–inaa pipùara teeji Cainpa teeda k'ãyaara. Mapa Tachi Ak'õrepa pia ak'ùji Abelpa teeda mãik'aapa irumaa jaraji: “Pù pia bapari mù k'îrapite.” Abel piuji mîda, at'ãri tachimaa k'awaapipari Tachi Ak'õrede ijãadaipia bù mãik'aapa oodaipia bù irua k'inia bùk'a.
5 Enocpa ijãa bada perã, Tachi Ak'õrepa ateeji na p'ek'au eujãdeepa, piu–ee. Maperã iru ik'aawa p'anapatap'edaarãpa waa unuda–e paji. Ma ateei naaweda Ak'õrepa jaraji: “Enocpa mù t'ãri o–îapiparida aji, mù k'îrapite pia bapari perã.”a 6 Mamîda eperãpa Tachi Ak'õrede ijãa–e bù pùrã, Tachi Ak'õre p'oyaa t'ãri o–îapi–e. Mapa eperã ùt'aa t'âmaa bak'ãri, Tachi Ak'õremaa k'ait'aara wã k'inia bù pùrã, ijãaipia bù Tachi Ak'õre ichita bapari. Ichiaba ijãaipia bù Tachi Ak'õrepa k'aripapari ichide pipùara ijãarutaarã.
7 Noepa ijãaji Tachi Ak'õrepa jarak'ãri na p'ek'au eujã jõma paniapa ûut'aait'ee, mãga waide unuda–e paji mîda. Tachi Ak'õre waawee bada perã, ooji barco choma ichi ëreerã ome bataudait'ee, mãgá piuda–e pait'ee. Ma barco mãgá ook'ãri, apemaarãmaa ak'ùpiji ichia ijãa bù. Mãga unujida mîda ijãada–e paji. Maperãpù k'iniijida. Mamîda Noepa ijãa bada perã, Ak'õrepa jaraji: “Noé pia bapari mù k'îrapite.”
8 Abrahampa ijãa bada perã, Tachi Ak'õrepa jarak'ãri wãmerã ichia teeit'ee pada eujãdee, Abraham uchiaji ichi eujãdeepa. Mamîda k'awa–e paji sãmaa wãru. 9 Abrahampa ijãa bada perã, banaji ma eujã jaradade. Bapachi te ne–edee oodade awaraa eujãdepemaarãpa oopatap'edaak'a. Ichiaba mãgá p'anapachida Isaac mãik'aapa Jacob, ijãadap'edaa perã Tachi Ak'õrepa jarada; ma eujã teeit'ee ãchi ëreerãmaa. 10 Abraham mãgá bapachi ijãa bada perã Tachi Ak'õrepa ichi ateeit'ee ichia p'uuru oodamaa; ma p'uuru jõ–e pait'ee.
11 Abraham audú chonaa baji warra ooit'ee. Ichiaba Sara warra t'ok'aa paji. Mamîda Tachi Ak'õrepa warra oopiji Abrahammaa, ijãa bada perã Tachi Ak'õrepa ooit'ee ichia jaradak'a. 12 Mãpai Abraham eperã piudak'a baji mîda, warrarã chok'ara irudeepa uchiajida, lucero pajãde nâbùk'a mãik'aapa p'usa ide ipu tau nãusaa nâbùk'a.
13 Ma eperãarã jõmaarãpa ijãa p'anapachida ãchi piurutamaa, at'ãri jõma Tachi Ak'õrepa jarada teeit'ee ãramaa unuda–e paji mîda. Mamîda ijãa p'anadap'edaa perã, k'awa p'anajida Tachi Ak'õrepa ooit'ee ichia jaradak'a. Mapa o–îa k'îsiadak'ãri ãchia ne–inaa iru p'anadait'ee Ak'õre juadeepa, apemaarãmaa jarajida ma eujã ãchi p'anadap'edaamãi wãara ãchide–e paji. 14 Mãga jarajida ùt'aripema eujãde k'îsia p'anadap'edaa perã. 15 Ãchi uchiadap'edaa eujãde k'îsia p'anadap'edaa paara, waya ãpùtee wãk'ajida. 16 Mamîda wã k'inia p'anajida p'anapataade ùt'aripema eujãde, mãgà na p'ek'au eujã k'ãyaara pipùara bairã. Mãga k'îsia p'anadap'edaa perã, Tachi Ak'õre k'îra nejasia–e ãchi Ak'õre Waibùa pait'ee. Irua ãra–it'ee p'uuru oo iru bù ichi truade.
17 Tachi Ak'õrepa k'awaa k'inia baji Abrahampa irude wãara ijãa bù wa mãga–e. Maperã jaraji Abrahammaa chi warra Isaac peemerã mãik'aapa paamerã ichi–it'ee. 18 Abrahampa ijãa bada perã, mãgá peeit'ee paji chi warra apai Sara ome iru bada, Tachi Ak'õrepa aù naaweda Abrahammaa jaraji mîda:
‘Mùa Isaacdeepa uchiadait'eerã pia ak'ùit'ee pù mùde ijãapari perã.’ (Génesis 21.12)
19 Abrahampa ijãaji Tachi Ak'õrepa eperã piuda chok'ai p'irabaipii. Wãara mãga pùk'a baji Isaac ome. Piuda p'irabaidak'a baji, chi ak'õrepa peei naaweda, Tachi Ak'õrepa peenaapáde ada perã.
20 Isaacpa ijãa bada perã, Tachi Ak'õrepa jarapidak'a jaraji Jacobmaa mãik'aapa Esaumaa. Ùt'aa iidiji Tachi Ak'õrepa Jacob Esaú ome pia ak'ù bapariimerã.
21 Jacobpa Ak'õrede ijãa bada perã, ichi piuit'ee pak'ãri, ùt'aa iidiji Tachi Ak'õrepa José warrarã bendiciamerã. Chonaa bada perã, ichi bordonde t'ùdùk'aji mãga ook'ãri.b
22 Josepa Tachi Ak'õrepa jarada ijãada perã, ichi piuit'ee pak'ãri, chi arii p'anadap'edaarãmaa jaraji israelitaarã Egipto eujãdeepa uchiadait'ee. Ichiaba jaraji mãga p'asak'ãri, ãrapa ichi bùùrù auk'a ateedamerã.
23 Moisés ak'õreerãpa ijãa p'anadap'edaa perã, Moisés t'ok'ãri mãik'aapa k'îra wãree unudak'ãri, atane õpee merã bùjida. Rey pedee waaweeda–e paji, irua jaraji mîda ùmùk'îra warra chak'eerã jõmaweda peepiit'ee.
24 Moisepa ijãa bada perã, chonaa pak'ãri, Faraón k'au warrak'a pa k'inia–e paji. 25 Ma k'ãyaara apemaarã israelitaarã chupùria chitoonù ome auk'a ba k'inia baji mimia chaaree oomaa, p'ek'au k'achia ode o–îa nipai k'ãyaara. 26 K'îsiaji pipùara bai chupùria nâbait'ee Tachi Ak'õredeerã ome, nù p'anù misa Tachi Ak'õrepa pëiit'ee bù ãchi k'aripamerã, Egiptodepema ne–inaa pia iru bai k'ãyaara. Mãga k'îsiaji k'awa bada perã Tachi Ak'õrepa teeit'eeda ada pipùara bù.
27 Moisepa ijãa bada perã wãji Egipto eujãdeepa, rey k'îrau bù waawee–ee. K'awa baji Tachi Ak'õre ichi ome bù, ichi taupa unu–e paji mîda. 28 Moisepa ijãa bada perã Tachi Ak'õrepa israelitaarã k'aripai, ãramaa Pascua fiesta oopiji. Mãgùde oveja peepiji, maap'eda ãra te t'îupata i chaa waa jîap'epiji hisopo jua chak'eerãpa. Mãga oojida ãchi warrarã naapemaarã peepiamaapa, Tachi Ak'õrepa jarada perã ichi ángel pëiit'ee Egipto pidaarã warrarã naapemaarã peede.
29 Israelitaarãpa ijãa p'anadap'edaa perã, Mar Rojo p'oo bùde wãyaajida eujã pania wêe bùk'a. Mamîda Egipto pidaarã auk'a wãyaadait'ee pak'ãri, jõma toida k'iniijida.
30 Israelitaarãpa ijãa p'anadap'edaa perã, ewari siete parumaa ewari chaa p'ùrrabaijida Jericó p'uuru ik'aawa, Tachi Ak'õrepa jaradak'a oodamerã. Mãgá oodap'eda, Tachi Ak'õrepa muralla choma ma p'uuru t'ùak'au bada baaipiji.
31 Prostituta Rajabpa Tachi Ak'õrede ijãa bada perã, ichi temãi o–îa t'îupiji Josuepa eperãarã omé pëida; ma p'uuru ak'ùde chedap'edaarã. Maperã piu–e paji apemaarã ma p'uurude ijãadak'aa beerãk'a, israelitaarãpa ma p'uuru jõt'aa chedak'ãri.
32 ¿K'ãata waa jaraima? P'oyaa jõma jara–e jua araa–e perã jarait'ee Gedeonpa ooda, Baracpa, Sansonpa, Jeftepa, Davidpa mãik'aapa Samuelpa oodap'edaa, Tachi Ak'õre pedee jarapataarãpa oodap'edaa paara. 33 Mãgùùrãpa ijãa p'anadap'edaa perã, Tachi Ak'õrepa ãchi k'aripaji nãga oodamerã. Ûk'uru jura chõo p'oyaajida; awaraarãpa pia ak'ùjida ãchi jua ek'ari p'anadap'edaarã; awaraarãpa unujida Tachi Ak'õrepa ooit'eeda ada ãchi chonaarã k'aripait'ee; awaraarãpa león it'ai jâapijida, Tachi Ak'õrepa k'aripap'eda; 34 #awaraarã t'ùpùtaudeepa paa–ee uchiajida; awaraarã chok'ai uchiajida espadapa pee k'inia p'anadap'edaarã juadeepa; ûk'uru juatau t'ûmaa p'anadak'ãri, Tachi Ak'õrepa juataura papiji; awaraarã Tachi Ak'õrepa sõcharra papip'eda, chõojida ãchi k'îra unuamaa iru p'anapataarã ome; ûk'uruurãpa ãchi eujãdeepa jërek'oojida awaraa eujãdepema chõode chedap'edaarãpa. 35 Ichiaba wêraarã ûk'uruurãpa Tachi Ak'õrede ijãa p'anadap'edaa perã, unujida ãchia k'inia iru p'anadap'edaa piudap'edaarã chok'ai p'irabairuta.
Jõdee, ijãa p'anajida mîda, ûk'uru piu k'achia piujida. Ijãadak'aa beerãpa mãgùùrã jita atadak'ãri, mãgapachida: “Pëida–eda apachida, Cristode ijãa amaarutamaa”. Mamîda mãga ooda–e paji. Maperã piujida. Ãchia k'awajida piudap'eda, Tachi Ak'õrepa ãchi waya chok'ai p'irabaipiit'ee iru ome p'anapataadamerã, waa piuda–ee. 36 Ichiaba ijãadak'aa beerãpa ûk'uru ùmùk'îraarãmaa ik'achia jarajida mãik'aapa wùjida. Ma awara cadenapa jâdap'eda, carcelde t'ù nâbùjida. 37 Awaraarã mãupa bat'a peejida maa–e pùrã serruchopa esajîak'a t'oop'e peejida. Ûk'uru peejida espadapa. Ûk'uru chupùria oveja e maa–e pùrã cabra e jâ nipapachida; jarra oopachida mãik'aapa chîarapa ãra k'achia ooruta choopachida. 38 Na p'ek'au eujãde ichita p'anadaik'araa baji, ãchi ik'aawa p'anadap'edaarã k'ãyaara pipùara p'anadap'edaa perã. Mãga p'anajida Tachi Ak'õrede ijãa p'anadap'edaa perã. Nipapachida eujã pania wêe bùde mãik'aapa mêe, eera jêra bùmãi. Maapai p'anapachida yooro te uriade mãik'aapa mãu te uriade.
39 Ma jõmaarãpa Tachi Ak'õrede ijãa p'anadap'edaa perã, irua ãra k'aripaji mãik'aapa pia ak'ùji. Mamîda piudai naaweda, Tachi Ak'õrepa ãramaa teeit'eeda ada maarepida unuda–e paji. 40 Irua k'inia baji ãrapa ne–inaa pipùara iru p'anadamerã tachi ome auk'a. Iru ûraa chiwidi k'aurepa wêpapiji ãrapa p'ek'au k'achia oopatap'edaa tachidé ome auk'a, jõmaweda p'ek'au k'achia wêe p'anadamerã ichi k'îrapite.