Jesude ijãapataarã Tachi Ak'õre k'îrapite<R>p'ek'au k'achia wêe p'anadait'ee
10
1 Tachi Ak'õrepa Moisemaa p'ãpidak'a oopataarãpa waide k'awada–e jõmaweda Tachi Ak'õrepa k'îsia iru bù ooit'ee Cristo k'ap'ùa pari. Maperã ip'iipai ne–animalaarã peedap'eda, paa p'anù mîda Tachi Ak'õre–it'ee, iru k'îrapite p'oyaa p'ek'au k'achia wêe p'anadak'aa. 2 Moisepa p'ãdade jara bùk'a oo bùpa p'ek'au k'achia wêpapida paara, waa ne–animalaarã peedap'eda, paada–e pak'aji ãchia p'ek'au k'achia oopatap'edaa k'aurepa. Mamîda at'ãri mãga oopata. Mapa k'awa p'anù ãchi at'ãri k'îsia p'ua jõnapata. 3 Año chaa ma ne–animalaarã peedak'ãri, ãchia k'achia oopata waapùara k'irãpapata, 4 p'ak'a waa mãik'aapa chivo waapa p'ek'au k'achia wêpapik'aa perã.5 Maperãpù Cristo na p'ek'au eujãdee chek'ãri, ichi Ak'õremaa mãgaji:
—‘Ne–animalaarã peepachida mîda pù–it'ee mãik'aapa ne–inaa ateepachida mîda pùmaa teedait'ee, wãara pùa mãga k'inia–e paji. Maperã mù na eujãdepemaarãk'a t'opiji piumerã eperãarã pari. 6 Ichiaba pù o–îa–e baji ne–animalaarã peedap'eda, paadak'ãri ak'ùpidait'ee pù k'inia iru p'anù, maa–e pùrã chupùria iididait'ee ãrapa p'ek'au k'achia oopata k'aurepa. 7 Mapa mùa mãgaji: “Pùchá, Ak'õre, mù nama bùpù ooit'ee pùa k'inia bùk'a. Pùchi ley p'ãdade jara bùk'a mùa ooit'ee.” ’ (Salmos 40.6-8)
8 Cristopa mãga jarak'ãri, naapùara mãgaji:
—K'inia–e paji ne–animalaarã peedamerã mãik'aapa ne–inaa ateedamerã pùmaa teedait'ee. Pù o–îa–e bajida aji, ne–animalaarã peedak'ãri ak'ùpidait'ee pù k'inia iru p'anù maa–e pùrã chupùria iididait'ee ãchia p'ek'au k'achia oopata k'aurepa.
Cristopa mãga jaraji Tachi Ak'õrépata Moisemaa jaraji mîda ne–animalaarã peedamerã ma–it'ee. 9 Maap'eda Cristopa mãgaji:
—Ak'õre, mù nama bù ooit'ee pùa k'inia bùk'a.
Mãga jarada perã tachia k'awa p'anù chi naaweda oopatap'edaa Moisepa p'ãdak'a jõru, Tachi Ak'õrepa ichi ûraa chiwidipida perã Cristo k'aurepa. 10 Cristopa ooda perã Tachi Ak'õrepa k'inia badak'a, kurusode piuda aba piu chek'ãri tachi k'ap'ùa pari, Tachi Ak'õrepa tachi p'ek'au k'achia wêpapiji. Maperãpù ârá tachi ijãapataarã p'ek'au k'achia wêe p'anù Tachi Ak'õre k'îrapite.
11 Moisepa p'ãdade jara bùk'a, ewari chaa judiorã p'aareerãpa ne–animalaarã paapata. Mãgá ip'iipai oopata, mãga oopata k'aurepa p'oyaa p'ek'au k'achia wêpapidak'aa pai mîda. 12 Jõdee Cristo piuda abaade p'ek'au k'achia wêpapiji. Maap'eda su–ak'ù beeji Tachi Ak'õre truade iru juaraare. 13 Mama Cristopa nùmaa bù Tachi Ak'õrepa iru k'îra unuamaa iru p'anapataarã ichi jua ek'ari bùrumaa. 14 Cristo piuda aba piuda perã tachi k'ap'ùa pari, irude ijãapataarã p'ek'au k'achia wêe ichita p'anadait'ee Tachi Ak'õre k'îrapite.
15 Tachi Ak'õre Jaurepa ichiaba made jara baji jarak'ãri:
16 ‘Ewari cherude mùa israelitaarãmaa ûraa chiwidi jarait'ee. ¡Mù, Ak'õre Waibùapa mãga jara bù! Ma ewatedeepa k'awaapiit'ee mùa ãramaa oopi k'inia bù mãik'aapa mãga oo k'inia p'anadait'ee, t'ãripa k'inia p'anadairã.’ (Jeremías 31.33)
17 Mãga jarap'eda, ichiaba jaraji:
‘Mùa waa k'irãpa–e pait'ee ãrapa p'ek'au k'achia oopatap'edaa.’ (Jeremías 31.34)
18 Tachi Ak'õrepa mãgá p'ek'au k'achia waa k'irãpa–e pait'eeda ada perã, k'awa p'anù Jesús piuda k'ãyaara ne–inaa pipùara wê–e p'ek'au k'achia wêpapiit'ee.
Ùt'aa t'âdak'ãri, Tachi Ak'õre k'ait'a wãdai
19 Mãpai âpemaarã, Jesucristo waa bat'ada k'aurepa nãgaweda tachi panadai Tachi Ak'õre bùmaa. 20 ¿Sãga jãma panadaima? K'irãpátù Tachi Ak'õre tedepema cuarto edupùara t'ùak'au baji p'aru teesoo bùpa, eperãarã t'îunaadamerã Tachi Ak'õre badamãi. Mamîda Jesucristo kurusode piuk'ãri, Tachi Ak'õrepa ma p'aru teesoo bù jêpiji ak'ùpiit'ee ma k'ãyaara ne–inaa chiwidi bùit'ee, ma k'aurepa eperãarã t'îudamerã ichi bùmãi. Mãgà Jesús k'ap'ùa chok'ai p'irabaida. Ma k'aurépata tachi ùt'aa t'âdak'ãri, ùt'ari t'îudai Tachi Ak'õre bùmãi. 21 Ma awara Cristo, tachi P'aareerã Poro Waibùa perã, irua Tachi Ak'õre ùt'aripema te ak'ùpari. 22 Mapa ùt'aa t'âmaa bùde t'ãri pia wãdáma Tachi Ak'õre k'ait'a. Irua oopi bùk'a oo k'inia p'anadáma mãik'aapa ijãadáma irua tachi p'ek'au k'achia wêe ak'ù bù. K'îsia p'ua p'ananaadáma tachia p'ek'au k'achia oopatap'edaa k'aurepa, Cristo waapa ma jõma wêpapida perã mãik'aapa ne–inaa k'achia oo amaa k'inia p'anùda ada perã paniapa sùùdak'ãri. 23 Mãgapai–epù. Ichita p'anadáma tachi p'anadap'edaak'a naa t'ãripa ijãadak'ãri, k'awa p'anadairã Tachi Ak'õrepa teeit'ee ne–inaa jõma ichia k'îsia iru bù tachi–it'ee. ¡Tachi Ak'õrepa ichita oopari ichia jara bùk'a! 24 Jùrùdáma chik'aripapataadait'ee, tachi jõmaweda chik'inia p'anapataadait'ee mãik'aapa ne–inaa pia oopataadait'ee. 25 P'ananaadáma awaraarãk'a, chi cheda–e p'anùùrã Tachi Ak'õre Ûraa ûride. Ma k'ãyaara chip'edaidap'eda, chik'aripa p'anadáma pipùara ijãadait'ee, Tachi Ak'õre ewari waibùa ewate paru misa. Ma ewate Tachi Ak'õrepa ak'ùit'ee eperãarãpa pia mãik'aapa k'achia oopatap'edaa.
26 Ijãadak'ãri Tachi Ak'õrepa wãarata jara pëida Cristode, tachia oo k'iniata oo wãruta pùrã, ijãa amaa k'iniapa, k'îsiadaik'araa bù awaraa ne–inaapa tachia p'ek'au k'achia oopata wêpapii. Cristo awara ne–inaa wê–e tachia p'ek'au k'achia oopata wêpapiit'ee. 27 Chi mãga ijãada–e p'anùùrãpa ãchi piuda waaweedaipia bù, aù t'êepai Tachi Ak'õrepa ãchia k'achia oopatap'edaa ak'ùk'ãri, ãchi pëiit'ee perã t'ùpùtau jêrajêraa jira bùde. Mamaata wãdait'ee jõma Tachi Ak'õre jua ek'ari p'ana k'iniadak'aa p'anùùrã. 28 Chonaarãweda eperãpa ooamaa bak'ãri Moisepa p'ãdade jara bùk'a, mãgùpa p'ek'au k'achia oo bù unudap'edaarãpa, omé maa–e pùrã õpee, jarapachida ãchi poroorãmaa. Mãga k'awaadak'ãri, peet'aapachida, chupùria k'awada–ee. 29 Chonaarãweda mãga paji pùrã, ¿audupùara Tachi Ak'õrepa nãgùùrã miapi–e paik'ã? Ijãa amaa wãda Jesucristota Tachi Ak'õre Warra mãik'aapa #jarapata Tachi Ak'õre Jaurepa oo bù eperãarã k'aripait'ee Tachi Ak'õredepema–e. Ma awara jara p'anù ichi Ûraa chiwidi jara bùk'a Cristo waa bat'ada k'aurepa eperãarã p'ek'au k'achia wêpapi–e mãik'aapa mãgá p'ek'au k'achia wêe p'anada–e Ak'õre k'îrapite. 30 K'awa p'anù Tachi Ak'õrepa mãgùùrã miapiit'ee ichia jarada perã:
‘Mùata p'ek'au k'achia oopataarã miapiit'ee. Mùata ãchi k'achia ooit'ee ãchia ne–inaa k'achia oopata pari.’ (Deuteronomio 32.35)
Ichiaba ichi ley p'ãdade jara bù:
‘Tachi Ak'õrépata ak'ùit'ee ichi eperãarãpa ne–inaa pia mãik'aapa k'achia oopatap'edaa.’ (Deuteronomio 32.36)
31 Tachi Ak'õre Waibùa ichita bapari. Ichi k'îraudaru pùrã tachi ome, tachia waaweepa p'oyaa chooda–e pai.
32 Mamîda k'irãpátù parãpa naa Cristode ijãadak'ãri, chupùria jõnadap'edaa. Tachi Ak'õrepa parãmaa k'awapiji ichi ûraa chiwidide jara bù Cristode. Maap'eda awaraarãpa parã miapijida mîda, choopachida ijãa p'anadap'edaa perã. 33 Edaare choopachida ijãadak'aa beerãpa ik'achia jarapatap'edaa mãik'aapa parã oo iru p'anapataadap'edaa apemaarã taide. Ma awara parãpa unudak'ãri pãchi âpemaarã Cristo k'aurepa mãgá chupùria chitoonù, k'aripapachida. 34 Ichiaba chupùria k'awaa jõnapachida ijãapataarã carcelde p'anù mãik'aapa ãra k'aripajida. Parã o–îa p'anapachida ijãadak'aa beerãpa pãchi net'aa jõma jãri atadak'ãri, k'awa p'anadap'edaa perã ùt'ari iru p'anù ne–inaa pi–iara. Ma ne–inaa jõma Tachi Ak'õrepa k'îsia iru bù tachi–it'ee jõ–e pait'ee. 35 Jõma ma et'ewa jarada wãara perã, waaweenáatù. Tachi Ak'õrepa k'îsia iru bù parãmaa ne–inaa pi–ia teeit'ee. 36 Mapa choo p'anapatáatù pãchi ijãa p'anùde Tachi Ak'õrepa oopi bùk'a oodait'ee. Mãga ooruta pùrã, unudait'ee jõma irua jarada teeit'ee parãmaa. 37 K'irãpátù irua jarada:
‘Taarã–e nùde chi cheit'ee bùta cheit'ee. Taarã–e pait'ee. 38 P'ek'au k'achia wêe p'anùùrã mùde ijãapata perã, mù ome p'anadait'ee. Mamîda waya naa para badak'a ijãada–e p'aneeruta pùrã, mù o–îa ba–e pait'ee ãra ome.’ (Habacuc 2.3-4)
39 Tachi Ak'õrepa mãga jaraji mîda, tachita atuada–e pait'ee ma ijãada–eerãk'a, Cristode wãara ijãapata perã. Maperãpù irua tachi k'aripait'ee irumaa parutamaa.