Jesupa ichi waa Tachi Ak'õre ùt'aripema tede bùda
9
1 Naapùara Moisemaa ûraa jarak'ãri Tachi Ak'õrepa jaraji sãgata irude ijãadai mãik'aapa irua jaradak'a oodai. Ma awara Tachi Ak'õre te ne–edee ooda oopiji. 2 Ma te ne–edee oodade chi naapema cuartode baji lámpara bùpata mãik'aapa mesa pan p'epari Tachi Ak'õre–it'ee. Mãgà Cuarto Awara Bùda apachida Tachi Ak'õre Net'aa–it'ee. 3 Araarepema Cuarto Awara Bùda apachida Tachi Ak'õre–it'ee. Mãgà t'ùak'au baji p'aru teesoo bùpa. 4 Ma p'aru teesoo bù k'ait'a baji altar nêepa p'êeda. Aù ârù ne–inaa t'ûa bapari paapachida. Ma p'aru teesoo bù edupema eere baji baaltek'a bù nêepa p'êeda. Ma baaltek'a bù eperãarãmaa k'irãpapi baji Tachi Ak'õrepa Moisemaa jarada. Mãgà edajãde baji maná chok'o nêedee oodade. Ichiaba baji Aarón pak'uru jua t'ono bada chonaarãweda mãik'aapa Tachi Ak'õrepa Moisemaa Ûraa mãude p'ãpida. 5 Ma baaltek'a bada t'ap'a ârù bainâ p'anajida santok'a bee omé isia paraa. Mãgà jâapataarã k'îra wãree, Tachi Ak'õre ik'aawa p'anapata iru truade. Maperã santo mãgà jîak'a bùjida ma t'ap'ade ak'ùpiit'ee Tachi Ak'õre mama bù. Ma t'ap'ade p'aareerã poro waibùapa ne–animalaarã waa jîap'eji Tachi Ak'õrepa eperãarã miapinaamerã ãchia p'ek'au k'achia oopata k'aurepa. Mamîda mùa naapai p'oyaa jõma jara–e.6 Israelitaarãpa Tachi Ak'õre te cuarto omeede oodap'eda, p'aareerã ewari chaa t'îupachida naapema cuartode ãchi mimia oode, Tachi Ak'õrepa Moisemaa jaradak'a. 7 Mamîda chi araarepema cuartode p'aareerã poro waibùa aupaita t'îupachi, año chaa t'îuda aba. T'îuk'ãri, ateepachi ne–animal waa bùit'ee ma baaltek'a bù ârù. Mãùmisa Tachi Ak'õremaa chupùria iidiji ichia p'ek'au k'achia oopata pari mãik'aapa israelitaarãpa p'ek'au k'achia oopatap'edaa pari; ãchia ne–inaa k'achia k'awada–ee oopatap'edaa paara. 8 Mãga oopida k'aurepa Tachi Ak'õre Jaurepa eperãarãmaa k'awapi baji mãgà tede Tachi Ak'õre k'ait'a wãdaik'araa bù. 9 Ma jõma oopida k'aurepa ma eperãarãmaa, Tachi Ak'õrepa jarateemaa baji ichia ãramaa k'awapi k'inia bada mãik'aapa tachi ârapemaarãmaa paara. Nãga k'awapi k'inia baji. Net'aa teedak'ãri mãik'aapa ne–animalaarã peepidap'eda, paapidak'ãri Tachi Ak'õre–it'ee, eperãarã at'ãri k'îsia p'ua p'anapachida ãchia p'ek'au k'achia oopata k'aurepa. 10 Chi mãga oopataarãpa ne–inaa k'odak'ãri, k'ap'ùa sùùdak'ãri mãik'aapa ne–inaa todak'ãri Tachi Ak'õrepa Moisemaa p'ãpidak'a, ârùpai o–îa p'aneejida, Tachi Ak'õrepa pipùara k'awapirumaa ichia k'îsia iru bada ãchi–it'ee.
Cristo waa bat'ada
11 Ma–it'ee Cristo cheji, tachi P'aareerã Poro Waibùa pait'ee. Ichia k'awapipari Tachi Ak'õrede ijãapataarãmaa Ak'õrepa k'îsia iru bù ãchi–it'ee. Mãga ooi ichi bapari perã Tachi Ak'õre ùt'aripema tede. Mãgà te pipùara bù na p'ek'au eujãdepema te k'ãyaara, eperãarãpa ooda–e pada perã. Jîp'a Tachi Ak'õrépata ooji. 12 Ma awara na eujãdepema p'aareerã poro waibùa ma edupùara bù cuartode t'îuk'ãri, ne–animalaarã waa ateepari. Mamîda Cristo t'îuk'ãri ma ùt'aripema tede chi cuarto edupùara bùde, t'îuda aba t'îuji ichi waa bat'adata bùde Tachi Ak'õre bùmãi. Mãgá tachi neto pùk'a ataji uchiadamerã tachia p'ek'au k'achia oopata jua ek'ariipa mãik'aapa atuanaadamerã. 13 K'awa p'anù Tachi Ak'õrepa naa ûraa jaradadeepa Moisemaa eperãarã t'îudaik'araa p'anadak'ãri Tachi Ak'õre te bùmãi, nãga oojida waya t'îudaipia p'anadamerã. Chivo chak'eerã mãik'aapa p'ak'a chak'eerã ateejida p'aareerãmaa peedamerã mãik'aapa chi waa jîap'edamerã ãchi ârù. Mãga–e pùrã jîap'epipachida it'abarre p'ora p'ak'a wêra chak'e paadap'edaa p'oirada pania ome. Ma ne–animalaarã waa bat'ada k'aurepa Tachi Ak'õrepa eperãarã ârùpema k'achia aupai wêpapiji. 14 Mamîda Cristo waa bat'ada k'aurepa Tachi Ak'õrepa ne–inaa pipùara oopari. Cristopa p'ek'au k'achia maarepida oo–e paji mîda, Tachi Ak'õre Jaurepa k'aripaji iru tachi pari piumerã. Mãgá iru waa bat'ada k'aurepa Tachi Ak'õrepa wêpapipari ne–inaa k'achia jõmaweda tachi atuapipari, ne–inaa tachi k'îsia p'uapipari paara. Tachi Ak'õre ichita baparipa mãga oopari k'inia bairã tachia irude ijãapataadamerã mãik'aapa oopataadamerã irua k'inia bùk'a.
Cristopa ooda<R>Tachi Ak'õre Ûraa chiwidide jara bùk'a
15 Tachi Ak'õrepa mãga k'inia bairã, Cristo pëiji irua oomerã Ak'õre Ûraa chiwidide jara bùk'a. Mãgá chonaarãwedapema Tachi Ak'õrede ijãapatap'edaarãpa auk'a iru p'anadait'ee ne–inaa jõma irua k'îsia iru bada ãchi–it'ee. Cristo piuda k'aurepa Tachi Ak'õrepa wêpapiji ãrapa p'ek'au k'achia oopatap'edaa, tachidé ome auk'a. Mãga ooji Cristo piuda perã jõmaarã pari, p'ek'au k'achia wêe ichita p'anapataadamerã Tachi Ak'õre k'îrapite.
16 K'îsiadáma nãgùde. Eperãpa k'art'ade p'ã iru bak'ãri k'aimaa ichi net'aa bëiit'ee ichi piuk'ãri, chi net'aa atait'ee bùpa ma net'aa atak'aa chipari chok'ai bù misa. Mamîda ma k'art'a p'ã iru bù eperã piuk'ãri, apemapa iru net'aa atapari. 17 Mãga pùk'a Cristo piuji ooit'ee Tachi Ak'õre Ûraa chiwidi jara bùk'a. Piu–e pada paara, tachia iru p'anada–e pak'aji Tachi Ak'õrepa jarada tachimaa teeit'ee. 18 Mãga baji ichiaba chonaarãweda, ne–animalaarã peedak'ãri Tachi Ak'õrepa oomerã ichia Moisemaa naa jaradak'a. 19 Moisepa Tachi Ak'õre Ûraa jõmaweda jarap'eda ichi p'uuru pidaarãmaa, p'ak'a mãik'aapa chivo peejida. Mãpai madeepa waa ataji mãik'aapa p'oiraji pania ome. Oveja k'ara p'oree t'ùdapa hisopo jua chak'eerã k'õrajâma abaade jâk'ooji. Mamãik'aapa mãgùpa waa jîap'eji Tachi Ak'õre Ûraa p'ãda ârù mãik'aapa eperãarã ârù. 20 Mãga oo bù misa, mãgaji:
‘Nãgà waa jara k'inia bù Tachi Ak'õrepa mùmaa jaradak'a parã pia ak'ùit'ee, irua oopi bùk'a ooruta pùrã.’(Éxodo 24.8)
21 Ichiaba Tachi Ak'õre te ne–edee ooda edajãde mãik'aapa chi ne–inaa jõma aùde nâbada ârù ma waapa jîap'eji. 22 Mãga ooji aù naaweda Tachi Ak'õrepa irumaa jarada perã mãgà te mãik'aapa net'aa jîap'emerã ne–animalaarã waapa. Mãga ook'ãri, Ak'õrepa ne–inaa k'achia ma tede nâbada waa ak'ù–e paji. Mãga bada perã ne–animalaarã waa ome, k'awa p'anù Tachi Ak'õrepa eperãarãpa p'ek'au k'achia oopata jõmaweda wêpapi–e pait'ee, aba piu–e pùrã ãchi pari.
23 Moisepa ne–animalaarã waapa jîap'eji na p'ek'au eujãdepema Ak'õre tede, Tachi Ak'õrepa israelitaarã pia ak'ùmerã. Mamîda Tachi Ak'õrepa ma ne–animalaarã waa k'ãyaara pipùara k'inia baji jîap'emerã ichi ùt'aripema tede, ichia eperãarã jõmaweda pia ak'ùmerã. Mapa Cristo pëiji eperãarã pari piumerã. Cristo chok'ai p'irabaik'ãri, ma ùt'aripema tede ichi waa jîap'eji eperãarã p'ek'au k'achia wêe p'aneedamerã Ak'õre k'îrapite.
Cristo Tachi Ak'õre ùt'aripema tede t'îuda
24 Cristo t'îu–e paji ma ùt'aripema jîak'aa tede; eperãarãpa te oodap'edaade. Ma k'ãyaara ùt'aripema tedeta t'îuji Tachi Ak'õre k'îrapite, chupùria iidiit'ee tachi pari. 25 Ma ùt'aripema tede t'îuk'ãri, oo–e paji judiorã p'aareerã poro waibùapa ooparik'a. Mãgùpa año chaa ne–animal waa ateepari Tachi Ak'õre te edupùara bù cuartode. Mamîda Cristopa ateeda apai ichi waa ateeji ùt'aripema tede. 26 Mãga–e pada paara, Cristo piuda chok'ara piuk'aji, Tachi Ak'õrepa na p'ek'au eujã ooruweda. Mamîda Cristo cheda aba cheji mãik'aapa kurusode piuda aba piuji na p'ek'au eujã jõrumaa, tachi p'ek'au k'achia wêpapiit'ee. 27 Eperã chaa piuda aba piuit'ee. Maap'eda Tachi Ak'õrepa ak'ùit'ee ma eperãpa pia maa–e pùrã k'achia ooda na p'ek'au eujãde bù misa. 28 Mãga pùk'a Cristo piuda aba piuji eperãarã chok'araarãpa p'ek'au k'achia oopata wêpapiit'ee. Waya cheit'ee. Mamîda ma cherude tachia p'ek'au k'achia oopata wêpapide che–e pait'ee. Jîp'a cheit'ee ichi cheru nù p'anùùrãmaa teede jõma Tachi Ak'õrepa k'îsia iru bù ãchi–it'ee.