Tachi Ak'õre Ûraa chiwidide jara bù<R>Jesús tachi P'aareerã Poro Waibùa
8
1 Mùa na pedee jara chewã, nãgata jara k'inia bù. Cristota tachi P'aareerã Poro Waibùa. Iru Tachi Ak'õre juaraare su–ak'ù bapari Ak'õre truade. 2 Ichi bùmãi ùt'ari, mamata Tachi Ak'õre te. Eperãarãpa mãgà te ooda–e paji. Tachi Ak'õrépata ooji. Mama Jesupa P'aareerã Poro Waibùa mimia oopari tachi pari.3 Jõma P'aareerã Poro Waibùarã bùpata, ãchia teedamerã Tachi Ak'õremaa ne–inaa eperãarãpa aneepata iru–it'ee. Mãgá Cristopa pida ne–inaa teepari Tachi Ak'õremaa, ichi tachi P'aareerã Poro Waibùa perã. 4 At'ãri Cristo na p'ek'au eujãde bada paara, Tachi Ak'õre tede p'aare pa–e pak'aji, mãgee p'aareerã at'ãri paraa perã. Mãùrãpa oomaa p'anù Moisepa p'ãdade jara bùk'a. Cristo nama bù–e perã eperã k'ap'ùade, tachia k'awa p'anù iru mimia oomaa bù Ak'õre truade. 5 Mamîda na eujãdepema p'aareerãpa ne–inaa oo p'anù jîp'a Cristopa oo bùk'a ùt'ari. Mãga k'awa p'anù Tachi Ak'õrepa jarada perã ichi te oopiit'ee pak'ãri Moisemaa:
‘Óoji ne–inaa jõmaata mùa ak'ùpidak'a, pù ee nok'ode bak'ãri mù ome.’ (Éxodo 25.40)
6 K'awa p'anù tachi P'aareerã Poro Waibùapa oo bù ùt'ari pipùara bù na p'ek'au eujãdepema p'aareerãpa oopata k'ãyaara. Mãga bù Tachi Ak'õrepa ichi ûraa chiwidide jara bairã tachi pia ak'ùpariit'ee Cristo k'aurepa.
7 Tachi Ak'õrepa naa ûraa jarada k'aurepa eperãarã p'ek'au k'achia wêe p'aneedap'edaa paara, awaraa ûraa chiwidi jara–e pak'aji. Mamîda ma naa ûraa jarada mãga–e pada perã, tachi chonaarãpa ûraa chiwidi jùrù p'anajida. 8 Ma awara Tachi Ak'õrepa unuk'ãri eperãarãpa p'oyaa ooda–e ma naawedapema ûraade jaradak'a, jaraji:
—‘Mù, Ak'õre Waibùapa jara bù: ¡Ûrítù! Ewari cherude ne–inaa chiwidi ooit'ee. Ûraa chiwidi jarait'ee Judadeepa uchiadap'edaarãmaa mãik'aapa awaraa Israeldeepa uchiadap'edaarãmaa.
9 Nãgà ûraa chiwidi awara bù. Israelitaarã chonaarãmaa jaradak'a mùa aneek'ãri Egiptodeepa, mãga bù–e. Mùchi juadoopa ãchi aneeji mîda, ãchia oo k'iniada–e paji mùa jaradak'a. Mapa mùa ãchi ak'ù k'inia–e paji. ¡Mù, Ak'õre Waibùapa mãga jara bù!
10 Mamîda ewari cherude israelitaarã jõmaarãmaa ûraa chiwidi jarait'ee. ¡Mù, Ak'õre Waibùapa mãga jara bù! Nãgata ooit'ee. Ma ewatedeepa ãramaa k'awapiit'ee mùa oopi k'inia bù, mãik'aapa mãga oo k'inia p'anadait'ee, t'ãripa k'inia p'anadairã. Mapa mùmaa aupai Tachi Ak'õreda adai, mãik'aapa mùa ãra pia ak'ù bapariit'ee, mùchi eperãarã perã.
11 Mãga bak'ãri, apidaapa chîaramaa, chi k'õp'ãyoorãmaa mãik'aapa chi ëreerãmaa jarateeda–e pait'ee Tachi Ak'õre k'awaadamerã mãik'aapa irude ijãapataadamerã. Jõmaarãpa mù k'awa p'anadait'ee ãchi Ak'õre Waibùak'a, chupùria beerãdeepa p'arat'ara beerãmaa.
12 Ãrapa p'ek'au k'achia oopata chupùria k'awaait'ee mãik'aapa wêpapiit'ee. Maap'eda waa k'irãpa–e pait'ee ãrapa p'ek'au k'achia oopatap'edaa.’ (Jeremías 31.31-34)
13 Tachi Ak'õrepa “ûraa chiwidida” ak'ãri, jara k'inia bù ma naa ûraa jarada Moisemaa sore pùk'a bù. Ne–inaa soredaiparik'a, mãga pùk'a ma naa ûraa jarada soredai wã.