P'aare waibùa Melquisedec bapata
7
1 Mãgà Melquisedec Salén p'uurudepema rey paji. Tachi Ak'õre Waibùapa iru p'aare waibùa papiji. Abraham chek'ãri awaraarã reyrã p'oyaap'eda, Melquisedec iru k'îrapite uchiaji mãik'aapa bendiciaji. 2 Mãpai Abrahampa Melquisedecmaa teeji net'aa diezdepema chaa aba, irua net'aa jõmaweda jãri atadadepema ma reyrã juak'aawa.a Melquisedec jara k'inia bù: “reypa ichi jua ek'ari p'anùùrã ak'ùpari Tachi Ak'õrepa oopi bùk'a”. Ichiaba Salén p'uurudepema rey jara k'inia bù: “reypa ichi jua ek'ari p'anùùrã k'ãiwee p'anapipari”. 3 Tachi Ak'õre Ûraa p'ãdade jara–e bù Melquisedec nawe, chi ak'õre, chi ak'õchonaarã, chi t'oda, chi piuda. Ma awara jara–e bù chi p'aare mimia jõda. Iru Tachi Ak'õre Warrak'a, ichita p'aare waibùa bapari perã.4 ¡K'îsíatù nãgùde! Melquisedec eperãarã poro waibùa paji. Ichiaba tachi chonaarãwedapema ak'õchona Abraham tachi chonaarã poro waibùa paji, Tachi Ak'õrepa irumaa naapùara jarada perã. Mamîda Melquisedecmaa Abrahampa teeji net'aa ma reyrã juak'aawa jãridadepema; ma net'aa jõmaweda diezdepema chaa, aba. 5 Tachi Ak'õrepa Ûraa Moisemaa p'ãpidade jaraji israelitaarã poro waibùarãpa Levideepa uchiadap'edaarã ûk'uru awara bùdamerã, p'aareerã mimia oodamerã. Ma ûraade ichiaba jaraji ma p'aareerãpa iidipataadamerã net'aa diezdepema chaa aba ãchi auk'aarãmaa, mãùrã ichiaba Abrahamdeepa uchiadap'edaa paji mîda ãchi jîak'a. 6 Jõdee Melquisedec Levideepa uchiadap'edaarã ëreerãdeepa uchia–e paji mîda, Abrahammaa iidiji net'aa jãrida diezdepema chaa, aba. Ma awara Abraham waibùa paji, Tachi Ak'õrepa irumaa jarada perã ichia k'îsia iru bada warrarã chok'ara teeit'ee. Mãgá Abraham waibùara pùk'a baji mîda Melquisedec k'ãyaara, irua Abraham bendiciaji. 7 Jõmaarãpa k'awa p'anù p'aare waibùa, chi ùt'aa t'âpari awaraarã pari, waibùara bù eperã jîp'aa k'ãyaara. 8 Ma awara ârapema net'aa diezdepema chaa aba iidipataarã jai–idaapata. Jõdee Tachi Ak'õre Ûraa p'ãdade jara–e bù Melquisedec piuda. 9 Ma ewate Abrahampa Melquisedecmaa teek'ãri net'aa jãrida diezdepema chaa aba, jõma Levideepa uchiadap'edaarã p'aareerã k'ap'ùa pari teeji, ãra at'ãri t'oda–e p'anajida mîda. 10 At'ãri Leví uchia–e baji mîda Abraham k'ap'ùadeepa, jaradai ma ewate Levideerãpa teejida Melquisedecmaa Abraham pari, aù t'êepai Abraham ãichak'e Jacobdeepa uchiadait'ee pada perã.
Jesucristopa p'aare waibùa mimia oopari Melquisedecpa oodak'a
11 Moisepa Tachi Ak'õre Ûraa p'ãda teek'ãri israelitaarãmaa, awara bùji Levideepa uchiadap'edaarã, Aarondeepa uchiadap'edaarã p'aareerã mimia oodamerã. Mãgùùrãpa Tachi Ak'õrepa jaradak'a oopipachida eperãarãmaa. Mamîda, mãga oo p'anajida mîda, ma p'aareerãpa p'oyaa wêpapida–e paji eperãarãpa p'ek'au k'achia oopatap'edaa, Tachi Ak'õre k'ait'aara wãdamerã. Mãga oodap'edaa paara, Tachi Ak'õrepa awaraa pëi–e pak'aji Melquisedec jîak'a. 12 Mamîda Tachi Ak'õrepa awaraa p'aare bùji mãga oomerã. Nãgà bù–e paji Aarón bùdak'a. Ma k'ãyaara Melquisedeck'a bùji. Nãgà p'aarepa ichi mimia ook'aa Aarondeepa uchiadap'edaarãk'a. Oopari Tachi Ak'õre Ûraa chiwidide jara bùk'a. 13 K'awa p'anù nãgà p'aare, mùa jara bù, uchia–e paji Levideepa uchiadap'edaarã ëreerãdeepa. Wãara, na p'aare ëreerãdeepa p'aare apida uchiadak'aa paji. 14 Mãga k'awa p'anù Tachi Waibùa Jesuta uchiada perã Judadeepa uchiadap'edaarãdeepa. Moisepa apida Judadeepa uchiadap'edaarã eerepema t'âjara–e paji, apemaarã p'aareerã awara bùk'ãri.
15 Ichiaba nãga perã audupùara k'awa p'anù Jesuta tachi ârapema p'aare waibùa, Melquisedeck'a. 16 Tachi Ak'õre Ûraa p'ãdade jara bù Levideepa uchiadap'edaarã awara bùdamerã p'aareerã mimia–it'ee. Ma mimia oodait'ee paji na p'ek'au eujãde p'anù misa. Mamîda mãga–e paji Jesús ome. Iru Levideepa uchiadap'edaarã ëreerãdeepa uchia–e paji awaraa p'aareerãk'a, taarã–eweda ma mimia oomerã. Mãga–e. Tachi Ak'õrépata Jesús awara bùji ichita ma mimiade bapariimerã. 17 Mãga k'awa p'anù irumaa jara bairã Tachi Ak'õre Ûraa p'ãdade:
‘Pù ichita P'aareerã Poro Waibùa pait'ee, Melquisedeck'a.’ (Salmos 110.4)
18 Naaweda Tachi Ak'õrepa Moisemaa p'ãpiji ichia oopi k'inia bada ichi eperãarãmaa. Jaraji ne–animalaarã p'aareerãmaa ateedamerã, ãchia peedamerã mãik'aapa paadamerã ichi–it'ee. Mamîda ma p'aareerãpa ma p'ãpidak'a oo p'anùùpa, eperãarã p'ek'au k'achia oopata p'oyaa wêpapida–e paji. 19 Maperã Tachi Ak'õrepa ma p'ãpidak'a oodap'edaa waa oopi–e paji. Ma k'ãyaara ichi ûraa chiwidi tachimaa k'awaapiji, ichi k'îrapite p'ek'au k'achia wêe p'anadamerã Cristode ijãadak'ãri. Ma awara mãgà ûraa chiwidi k'aurepa ârá Tachi Ak'õre k'ait'aara wã p'anù ùt'aa t'âdak'ãri.
20 Tachi Ak'õrepa Levideepa uchiadap'edaarã p'aareerã awara bùk'ãri, awaraarã k'îrapite pedee–e paji. 21 Jõdee, ârapema p'aare awara bùk'ãri, Tachi Ak'õrepa ichi t'âde pedeeji. Mãga k'awa p'anù iru ley p'ãdade jara bairã:
‘Tachi Ak'õrepa ichi t'âde nãga jara bairã, awaraa ne–inaa oo–e pait'ee. “Pù ichita p'aareerã poro waibùa pait'ee.” ’ (Salmos 110.4)
22 Tachi Ak'õrepa Jesumaa mãga jarada perã mãik'aapa Jesús k'aurepa ûraa chiwidi paraa perã, k'awa p'anù ma ûraa chiwidide jara bù tachimaa pipùara bù irua Moisemaa jarada k'ãyaara.
23 Tachi Ak'õrepa apemaarã p'aareerã chok'ara bùpachi. Mamîda ãra mãgà mimiade ichita p'anadak'aa, piupata perã. 24 Jõdee Jesús piuk'aa perã, Tachi Ak'õrepa awaraa p'aareerã poro waibùa bù–e pait'ee iru pari. 25 Mapa irua k'aripai ichide ijãapataarã, p'ek'au k'achia wêe p'anadamerã Tachi Ak'õre k'îrapite. Ichita bapari perã, ichita Tachi Ak'õremaa chupùria iidipariit'ee tachi pari.
26 Nãgà Jesús P'aareerã Poro Waibùa tachia k'inia p'anù. Irua p'ek'au k'achia ook'aa, k'achia wêe bairã. K'îsia k'achia k'îsiak'aa. Na p'ek'au eujãde bak'ãri, bapachi mîda eperãarã k'achia oopataarã t'ãide, mãgá ook'aa paji. Maperãpù Tachi Ak'õrepa iru jõmaarã k'ãyaara waibùara papiji. 27 Cristo apemaarã P'aareerã Poro Waibùarãk'a bù–e. Mãgùùrãpa chok'apata apemaarã p'aareerã ewari chaa ne–animalaarã peedamerã paadait'ee Tachi Ak'õre–it'ee. Ma awara ne–animalaarã peedak'ãri paadait'ee Tachi Ak'õre–it'ee, naapùara mãga oopata ãchi pari, maap'eda apemaarã pari, p'ek'au k'achia oopatap'edaa k'aurepa. Jõdee Cristo piuda aba piuji, tachia p'ek'au k'achia oopata jõmaweda wêpapiit'ee. 28 Ma jõma jara aupadade k'îsiadak'ãri, k'awa p'anù Moisepa p'ãdade jara bù p'aareerã poro waibùa mimia–it'ee awara bùdamerã eperã tachik'a, p'ek'au k'achia oopari. Mamîda, ma p'ãpida t'êepai, Tachi Ak'õrepa ichi t'âde pedee bùpa, bùji ichi Warra, chi p'ek'au k'achia ook'aa bùta, ichita tachi P'aareerã Poro Waibùa pamerã.