6
1 Mapa oodáma Tachi Ak'õrepa oopi bùk'a mãik'aapa iru ûraa pipùara k'awaa wãdáma. O–îa p'ananaadáma tachimaa naapùara jarateedap'edaa ome. Nãga jarateejida tachimaa: Eperãarãpa p'ek'au k'achia oo amaadaipia bù, ma k'aurepa Tachi Ak'õrepa eperãarã ichi bùmãi t'îupi–e pait'ee perã. Ijãadaipia bù Tachi Ak'õrepa Jesucristo pëiji eperãarã o k'achiadeepa k'aripa atamerã, mãgá ãra p'anapataadamerã Ak'õre truade iru ome, waa piuda–ee. 2 Poro choopidaipia bù ak'ùpidait'ee ãchi Cristodeerã. Ma t'êepai, tachi naawedapemaarãpa oodap'edaak'a, ijãapataarã poroorãpa jua bùdaipia bù ãra ârù, Tachi Ak'õrepa ãramaa ichi Jaure pëimerã. Ichiaba ijãadaipia bù Cristo waya chek'ãri, ichide ijãa jai–idaadap'edaarã Tachi Ak'õrepa chok'ai p'irabaipiit'ee, k'ap'ùa chiwidi p'anapataadamerã, waa piuda–ee. Jõdee Ak'õre ewari waibùa ewate jai–idaadap'edaarã Cristode ijãada–ee, ichimãiipa pëiit'ee awara ãyaa, chupùria p'anapataadamerã, waa piuda–ee.3 Mãga paji ma naapùara jarateedap'edaa. Mamîda ma ûraa k'ãyaara waa k'awaadai, Tachi Ak'õrepa tachi k'ariparu pùrã.
4 Mùa mãga jara bù eperãarãpa Cristode ijãa amaadap'eda, waya p'oyaa ijãada–e perã. Mãgùùrãmaa Tachi Ak'õrepa k'awaapiji Cristopa ooda ãchi–it'ee. Maap'eda ãchia ijãajida iru piuji ãchi k'aripait'ee ùt'aa wãdamerã. Mãga ijãadap'eda, Tachi Ak'õre Jaure ba cheji ãchi ome, Tachi Ak'õrepa oopi k'inia bù ãchimaa pia k'awaadamerã. 5 Ichiaba k'awaajida Tachi Ak'õrepa jarak'ãri ichia ne–inaa pia ooit'ee, mãga oopari. Unujida Tachi Ak'õrepa ne–inaa ooda eperãarãpa p'oyaa oodak'aa, tau p'ãriu bada mãik'aapa chiwa bada jùpak'ãri. K'awaajida mãgá ooit'ee na p'ek'au eujã jõrumaa. 6 Mãga k'awa p'anùde, Cristode ijãa amaaruta pùrã, ne–inaa awaraa wê–e ãchi k'aripait'ee, waya ãchi p'ek'au k'achia oo amaadamerã mãik'aapa ùt'aa wãdamerã. Mãgá ijãa amaaruta pùrã, oodai Tachi Ak'õre Warra peedap'edaarãpa oodap'edaak'a, iru kurusode bùdak'ãri arii p'anadap'edaarãpa oo iru p'anadamerã.
7 Mùa jarait'ee sãga p'anù Cristode ijãa amaa p'anùùrã. K'oi chek'ãri, eujã p'ûasaade t'îupari mãik'aapa madeepa ne–uuda uchiapari. Ma ne–uuda pia chauk'ãri, eperãarãpa p'epata k'odait'ee. Mãga bak'ãri, Tachi Ak'õrepa ma eujã pia ak'ùparida apata. 8 Mamîda k'oi che bù mîda, ne–ùùrù uchiaru pùrã, Tachi Ak'õrepa ma eujã pia ak'ù–e bùda apata, mãik'aapa ma eujã atabaibëipata, paa atapëidamerã.
9 Âpemaarã Cristo k'aurepa k'iniarã, mãga jara bù mîda, k'awa bù paråpata Cristode ijãa amaada–e p'anù, Tachi Ak'õrepa oopi bùk'a oo p'anadairã. Mãgá ak'ùpipata parãpa wãara p'ek'au k'achia oo amaajida Cristode ijãapataadait'ee. 10 K'irãpátù Tachi Ak'õrepa ichita pia oopari. Ichia k'îra atua–e bù parãpa irudeerã k'aripadap'edaa mãik'aapa at'ãri mãga oo p'anù, iru k'inia iru p'anadairã. 11 Mùa k'inia bù parã mãga p'anapataadamerã piurutamaa. Mãga p'anaruta pùrã, pia k'awaadait'ee Cristo k'aurepa iru p'anadait'ee jõma Tachi Ak'õrepa k'îsia iru bù parã–it'ee. 12 K'inia–e bù k'oo–idaa p'anadamerã. Ma k'ãyaara k'inia bù parãpa ijãadamerã tachi chonaarãk'a, chi irua jarada pedee ijãa p'anadap'edaarã ãchi piurutamaa. Choojida unurutamaa jõma Tachi Ak'õrepa k'îsia iru bada ãramaa teeit'ee.
Tachi Ak'õrepa ichia jaradak'a ooit'ee
13 Tachi Ak'õrepa ichi pedee Abrahammaa jarak'ãri, awaraa ichi k'ãyaara waibùara wê–e paji ma k'îrapite jarait'ee. Mapa ichi t'âde jaraji:
14 ‘Mùa pù pia ak'ù bapariit'ee. Pùdeepa warrarã chok'ara uchiapiit'ee.’ (Génesis 22.16-17)
15 Abrahampa ijãaji Tachi Ak'õrepa jarada, taarãji mîda ooit'ee ichia jaradak'a. Abrahampa mãgá ijãada perã, Ak'õrepa wãara ooji ichia jaradak'a.
16 K'awa p'anù eperãarã nepùrade p'anùde ak'ùpi k'inia p'anadak'ãri wãarata jara p'anù, juraapata eperã ãchi k'ãyaara waibùara bù k'îrapite, chi ûri p'anùùrãpa ijãadamerã. 17 Mãga pùk'a Tachi Ak'õrepa ak'ùpi k'inia bak'ãri wãara ooit'ee ichia jaradak'a Abrahammaa mãik'aapa iruk'a ijãapatap'edaarãmaa, mãga jaraji ichi t'âde, awaraa ichi k'ãyaara waibùara wê–e pada perã. 18 Tachi Ak'õrepa ma pedee jarada perã mãik'aapa ichi t'âde jarada perã, k'awa p'anù iru seewak'aa. Irua jara bùk'a, ichita mãga oopari. Mapa tachi o k'achiadeepa uchiapata Cristode ijãadait'ee. K'awa p'anù irua tachi k'aripait'ee p'ek'au k'achia jua ek'ariipa, t'ãri a–ba p'anapataadamerã iru ome mãik'aapa iru p'anadamerã ne–inaa jõma irua k'îsia iru bù tachi–it'ee. 19 Maperã tachia ijãapata; ijãa amaada–ee. Ara anclapa barco pia jita iru bùk'a ãyaa wãpiamaapa, mãga pùk'a tachia pia ijãapata, k'awa p'anadairã Tachi Ak'õrepa tachi ateeit'ee ichimaa, Jesupa ooda k'aurepa. 20 Jesuta tachi k'ãyaara naapùara wãji Tachi Ak'õre baparimaa, t'êepai tachi auk'a wãdamerã. Mama bak'ãri, Jesús tachi P'aareerã Poro Waibùa beeji, ichita tachi pari ùt'aa t'âpari perã, Melquisedecpa oodak'a.