5
1 P'aareerã poro waibùa chaa tachi ome auk'a bù mîda, Tachi Ak'õrepa mãgà eperã awara bùpari, ichimaa ùt'aa iidipariimerã eperãarã pari. Ma awara irua jitapari ne–inaa eperãarãpa aneepata teedait'ee Tachi Ak'õremaa. Ichiaba ne–animalaarã peek'ãri, irua paapari Tachi Ak'õre–it'ee, eperãarãpa p'ek'au k'achia oopata k'aurepa. 2 Mãgà p'aareerã poro waibùapa tachik'a ne–inaa k'achia oopari perã, irua chupùria k'awaai chi ne–inaa k'achia oo p'anùùrã, k'awada–e p'anadairã Tachi Ak'õrepa ãchimaa oopi k'inia bù. 3 Maperãpù irua chupùria iidipari, ne–inaa teepari mãik'aapa ne–animalaarã peep'eda, Tachi Ak'õre–it'ee paapari, naapùara ichi k'ap'ùa pari, maap'eda apemaarã pari.4 Eperã apida ichi k'îradoopa p'aareerã poro waibùa pa–e pai. Tachi Ak'õrépata mãgà mimiade bùpari, chonaarãweda Aaróna bùdak'a. 5 Mãgapù Cristo ome baji ichiaba. Ichi k'îradoopa waibùa pa–e paji. Tachi Ak'õrépata iru bùji tachi ijãapataarã P'aareerã Poro Waibùa pamerã. Mãga k'awa p'anù Ak'õre Ûraa p'ãdade jara bairã:
‘Mùa idi jõmaarãmaa jara bù pù mù Warra.’ (Salmos 2.7)
6 Ichiaba awara ãi jara bù:
‘Pù ichita P'aareerã Poro Waibùa pait'ee, Melquisedeck'a.’ (Salmos 110.4)
7 Jesucristo na p'ek'au eujãde bak'ãri, at'apai taubade chupùria iidiji Tachi Ak'õrepa ichi k'aripamerã. K'awaji ichi piuit'ee mãik'aapa Tachi Ak'õrépata ichi madeepa uchiapii. Tachi Ak'õrepa ma chupùria iidida ûriji, Cristopa oo k'inia bada perã chi Ak'õrepa oopidak'a. 8 Tachi Ak'õre Warra paji mîda, mia nâbùde Tachi Ak'õrepa k'iniata oo k'awaa wã nipaji. 9 Mapa chi Ak'õrepa oopi k'inia bada oo aupak'ãri, Tachi Ak'õrepa iru bùji tachi o k'achiadeepa k'aripa atamerã. Mãga bùji irude ijãapataarã Ak'õre truade ichita p'anapataadamerã iru ome, waa piuda–ee. 10 Irua mãgá ooi Tachi Ak'õrepa iru bùda perã tachi ijãapataarã P'aareerã Poro Waibùa pamerã Melquisedeck'a.
K'îrak'aupai naapùara jarateedap'edaa ijãa amaadai
11 Mùa pipùara jaratee k'inia bù sãga Jesucristopa ooda Melquisedecpa oodak'a. Mamîda mãga ooru pùrã, parãpa pia k'awada–e pai, wãara ûri k'iniada–e p'anadairã. 12 ¡Pãchita Tachi Ak'õre Ûraa jarateepataarã pak'ajida, taarãruta perã Cristode ijãa p'anù! Mamîda mãga–e. At'ãri awaraarãpa parãmaa jarateepata, waide pia k'awada–e p'anadairã Tachi Ak'õre Ûraa jarateedap'edaa, ewaa irude ijãadak'ãri. Mãga p'anù ma ûraa pipùara k'awa k'iniada–e p'anadairã. 13 Ara warra chak'e juto bù chik'o k'o atua bùk'a, mãga pùk'a parãpa ijãa p'anù mîda, k'awada–e p'anù chisãgà ne–inaa pia mãik'aapa chisãgà ne–inaa k'achia Tachi Ak'õre k'îrapite. 14 Jõdee Tachi Ak'õre Ûraa pipùara k'awa p'anùùrã k'îsia k'awaa p'anù, pia mãik'aapa k'achia k'awapata perã.