4
1 At'ãri Tachi Ak'õrepa tachi k'ãiwee p'anapi k'inia bù. Maperã pia p'anapataadáma irua k'inia bùk'a, apidaamaa irua jaranaamerã: “Mùa k'ãiwee bapi–e.” 2 Mùa mãga jara bù Tachi Ak'õrepa tachimaa ichiaba jara pëida perã ichia ooda eperãarã o k'achiadeepa k'aripa atait'ee. Mãga ijãadak'ãri, k'ãiwee p'anapataadait'ee. Ichia chonaarãmaa jara pëidak'a, mãgá ichiaba tachimaa jara pëiji. Mamîda ãchi–it'ee pia uchia–e paji, k'ùùrùpapai ûridap'edaa perã, t'ãride ijãada–ee. 3 Tachia ãchik'a oodaik'araa bù. Ijãada–e p'anù pùrã, Tachi Ak'õrepa tachi jida k'ãiwee p'anapi–e. Mãga k'awa p'anù iru ley p'ãdade jara bairã:‘K'îrau bada perã ãchi ome, juraaji: “Wãda–eda aji, mùa k'ãiwee p'anapiit'eeda ada eujãdee.” ’ (Salmos 95.11)
K'awa p'anù na p'ek'au eujã ooi naaweda Tachi Ak'õrepa k'îsia iru baji tachi k'ãiwee p'anapiit'ee ichi ome. 4 Ma awara k'awa p'anù iru k'ãiwee bapari, awara ãi iru ley p'ãdade jara bairã:
‘K'ãima sietede Tachi Ak'õrepa ichi mimia oo aupak'ãri, âiji mãik'aapa k'ãiwee beeji.’ (Génesis 2.2)
5 Mamîda waya ûrítù irua naaweda jarada ichi ley p'ãdade:
‘Wãda–eda aji, mùa k'ãiwee p'anapiit'eeda ada eujãdee.’ (Salmos 95.11)
6 Mãga jaraji ma naa ûridap'edaarãpa irua jara pëida ijãada–e p'anadap'edaa perã. Mamîda irua at'ãri ichide ijãapataarã k'ãiwee p'anapi k'inia bù. 7 Ma–it'ee ewari awara bùji. Mãga k'awa p'anù mãgà chonaarã piudap'edaa t'êepai, Tachi Ak'õrepa jarada perã Rey David it'aideepa:
‘Idi Tachi Ak'õre pedee ûriruta pùrã, k'ùùrù k'isua p'ananáatù.’ (Salmos 95.7-8)
8 Josuepa mãgà chonaarã k'ãiwee p'anapida paara, aù t'êepai David it'aideepa Tachi Ak'õrepa “Idi” jara–e pak'aji. 9 Mãgara irude ijãapataarã idipema ewari âidai ichiaba, Tachi Ak'õre âidak'a na p'ek'au eujã oo aupak'ãri. 10 Tachia oo k'iniata oopata oo amaadak'ãri oo k'inia p'anadairã Tachi Ak'õrepa oopi bùk'a, wãara iruk'a âidait'ee mãik'aapa k'ãiwee p'anapataadait'ee. 11 Maperã jùrùdaipia bù iruk'a âidait'ee. K'ùùrù k'isua p'anadaik'araa bù tachi chonaarãk'a.
12 Iru ûraa ûridaipia bù Tachi Ak'õre Ûraa chok'ai pùk'a bairã. Ma k'aurepa eperãarã ichita p'anapataadai. Ma awara iru ûraa waibùara bù awaraa ûraa k'ãyaara, irua jara bùk'a mãgá p'asapari perã. Espada k'îraichaaweda p'ewedee bùk'a, mãga pùk'a iru ûraa ichiaba p'ewedee pùk'a bù, ma ûraa tachi t'ãride t'îupari perã. K'awapipari tachia k'îsia bù mãik'aapa oo k'inia bù, pia wa k'achia. 13 Ne–inaa apida wê–e Tachi Ak'õrepa k'awa–e pai. Iru–it'ee ne–inaa jõma ewaraa jêra bù. Ewari cherude tachi jõmaweda p'anadait'ee iru k'îrapite mãik'aapa irumaa tachia oopatap'edaa jõmaweda jaradait'ee.
Jesús awara bùda ijãapataarã P'aareerã Poro Waibùa pamerã
14 Ârá mùa waya k'irãpapi k'inia bù parãmaa: Tachi Ak'õrepa Jesús awara bùji waibùa pamerã mãik'aapa ùt'aa t'âpariimerã tachi pari. Maperã Tachi Ak'õre Warra Jesús tachi ijãapataarã P'aareerã Poro Waibùa. Ùt'ari bapari ichi Ak'õre ome. Mama ùt'aa t'âmaa bairã tachi pari, t'ãripa irude ijãadáma. 15 Nãgà P'aareerã Poro Waibùapa k'awapari tachi t'ãride k'îsia p'anù, tachik'a na p'ek'au eujãde bapachi perã. Mamîda mãgá bapachi mîda, maarepida p'ek'au k'achia oo–e paji. 16 Mãgá P'aareerã Poro Waibùa iruk'a iru p'anadairã, waaweenaadáma wãdait'ee Tachi Ak'õre Waibùa k'ait'aara, tachi ùt'aa iididak'ãri. Ne–inaa jõma Cristo jua ek'ari nâbù mãik'aapa irua tachi k'aripa k'inia bù. Maperã chupùria iididáma, irua jara bùk'a ooda–e pak'ãri. Ichiaba tachi k'îradoopa irua k'inia bùk'a p'oyaa ooda–e pak'ãri, iididáma irua k'aripamerã, tachi k'inia iru bapari perã.