Jesús Moisés k'ãyaara waibùara bù
3
1 Âpemaarã Cristo k'aurepa, Tachi Ak'õrepa tachi awara bùda perã ichi ome ùt'ari p'anapataadamerã, k'îsíatù Jesucristopa oo bùde tachi k'aripait'ee. Tachi Ak'õrepa iru pëiji jarateemerã iru ûraa chiwidi mãik'aapa P'aareerã Poro Waibùak'a ùt'aa iidipariimerã tachi pari, irude ijãapata perã. 2 Tachi Ak'õrepa Jesucristo pëiji iru Ak'õrepa oopi bùk'a oo k'inia bada perã, Moisepa oo k'inia badak'a, chonaarãweda Ak'õre eperãarã k'aripak'ãri. 3 Mamîda Jesús Moisés k'ãyaara waibùara bù. K'îsiadáma nãgùde. Eperãarãpa te oopataarã pipùara ak'ùpata, mãùrãpa te oodap'edaa k'ãyaara. 4 Eperãarãpa te chok'ara oodai. Mamîda Tachi Ak'õrépata ooji ne–inaa jõma nâbù. 5 Moisés Tachi Ak'õredeerã ak'ùpari pia paji, oo k'inia bada perã Ak'õrepa jaradak'a. Eperãarãmaa jarateepachi Tachi Ak'õrepa t'êepai ooit'ee bada. 6 Mamîda Cristo Tachi Ak'õre Warra perã, ichideerã pipùara ak'ùpari Ak'õrepa k'inia bùk'a. Tachita irudeerã ichiaba, Cristode ijãa amaada–e p'anù pùrã mãik'aapa o–îa unu k'inia p'anù pùrã ne–inaa pia Tachi Ak'õrepa k'îsia iru bù tachi–it'ee.Tachi Ak'õrepa ichide ijãapataarã k'ãiwee p'anapipari
7 Maperã pia ûridaipia bù Tachi Ak'õre Jaurepa jara bù iru ley p'ãdade:
‘Idi Tachi Ak'õre pedee ûriruta pùrã, 8 k'ùùrù k'isua p'ananáatù pãchi chonaarãk'a, ãchi wãyaa wãdak'ãri eujã pania wêe bùde. Tachi Ak'õre jua ek'ari p'ana k'iniada–e paji, ãchia oo k'iniata oo k'inia p'anadap'edaa perã. 9 Mapa Ak'õrepa jaraji: “Cuarenta año pãchi chonaarãpa unupachida mùa oo bada ãchi k'aripait'ee. Mamîda at'ãri mùa jarada oo k'iniada–e p'anapachida. 10 Maperãpù mù k'îraudachi ma eperãarã ome.” Mãpai jaraji: “Na eperãarãpa ãchia oo k'iniata oopata. Oodak'aa mùa oopi bùk'a, mù o k'awada–e p'anadairã.” 11 Mãpai mù k'îrau bada perã ãchi ome, juraaji: “Wãda–eda aji, mùa k'ãiwee p'anapiit'eeda ada eujãdee.” ’ (Salmos 95.7-11)
12 Ârá âpemaarã, mãga bada perã tachi chonaarã ome, Tachi Ak'õre ichita bapari odeepa uchianaadamerã, t'ãri k'achia–idaa p'ananáatù mãik'aapa k'ùùrù k'isua p'ananáatù. 13 Ma k'ãyaara, chok'ai p'anù misa, ewari chaa chik'aripa p'anapatáatù waapùara ijãadait'ee, apida Tachi Ak'õre odeepa uchianaadamerã, p'ek'au k'achia oo k'iniapa. 14 Tachi Ak'õrede ijãadaipia bù tachi piurutamaa. Mãga ooruta pùrã, unudait'ee irua ne–inaa pia k'îsia iru bù tachi–it'ee, Cristo tachi ome bapari perã.
15 Tachi Ak'õre Ûraa p'ãdade jara bù:
‘Idi Tachi Ak'õre pedee ûriruta pùrã, k'ùùrù k'isua p'ananáatù pãchi chonaarãk'a, ãchi wãyaa wãdak'ãri eujã pania wêe bùde. Tachi Ak'õre jua ek'ari p'ana k'iniada–e paji, ãchia oo k'iniata oo k'inia p'anadap'edaa perã.’ (Salmos 95.7-8)
16 Maperã k'îsiadáma tachi chonaarãde. Moisés ãchi poro waibùa paji Egiptodeepa uchiadak'ãri. Maapai Tachi Ak'õrepa ãchimaa jîp'a pedeeji ichi it'aideepa. Mamîda irua jaradak'a oo k'iniada–e paji. 17 Maperãpù piuk'oodachida ma eujã pania wêe bùde, wãdai naaweda ma eujãdee Tachi Ak'õrepa p'anapiit'ee padamãi. Cuarenta año ãchia oo k'iniata oo p'anùùpa Tachi Ak'õre k'îraupijida. 18 Mapa irua nãga jaraji:
‘Ârá parã wãda–eda aji, mùa k'ãiwee p'anapiit'eeda ada eujãdee.’(Números 14.22, 30, 35)
19 Ma chonaarã wãda–e paji ma eujãdee, Tachi Ak'õrepa jarada ijãada–e pada perã.