Jesucristopa jarada ûri k'iniada–e p'anadap'edaarãmaa
2
1 Mãgá Cristo waibùara bairã angeleerã k'ãyaara, tachia pia k'awadaipia bù Tachi Ak'õrepa jara pëida iru k'ap'ùa pari, Ak'õre odeepa uchiada–e pait'ee. 2 Tachi Ak'õre Ûraa jarada Moisemaa ichi angeleerã it'aideepa wãara paji. Mapa Tachi Ak'õrepa mãgà ûraa ûri k'iniada–e p'anadap'edaarã miapiji. 3 Mãgá miapiji pùrã ichi ûraa ûri k'iniada–e p'anadap'edaarã naaweda, ¿sãgá tachi irumaa wãdaima, iru ûraa jara pëida Cristo k'ap'ùa pari ûri k'iniada–e p'anù pùrã? Tachi Waibùa Jesucristota naapùara cheji jarait'ee Tachi Ak'õrepa ûraa chiwidi iru bù irude ijãapataarã–it'ee. T'êepai ma ûraa ûridap'edaarãpa tachimaa jarateejida. 4 Ma ûraa chiwidi jaratee p'anùde Tachi Ak'õrepa ãramaa oopipachi ne–inaa eperãarãpa p'oyaa oodak'aa ãchi juadoopa mãik'aapa Tachi Ak'õre Jaurepa ichia oopi k'inia bùk'a ãramaa oopipachi.Jesucristo eperã jîp'aak'a bada
5 Tachi Ak'õrepa Jesucristota jùrùt'eraji jaramerã ma ûraa chiwidi mùa jaramaa bù na p'ãdade. Maperã ma ûraade ijãa p'anadap'edaarã bù–e paji ichi angeleerã jua ek'ari. 6 Mãga k'awa p'anù Tachi Ak'õre Ûraa p'ãdade jara bairã:
‘Ak'õre, ¿eperã pù–it'ee k'ãarema, pùa ichi ak'ù bapariimerã mãik'aapa k'inia iru bapariimerã? 7 Na p'ek'au eujãde bù misa, pùa ichi ek'ariara bùji pùchi angeleerã k'ãyaara. Mãgá bùji mîda, ichi waibùa papiji mãik'aapa k'îra wãree papiji pùk'a. 8 Ne–inaa jõma nâbù ichi jua ek'ari bùji.’ (Salmos 8.4-6)
Mãga ooji mîda, waide ne–inaa jõma ichi jua ek'ari bù–e. 9 Mamîda Jesús jua ek'ari bù. Tachi Ak'õrepa Jesús ek'ariara bùji ichi angeleerã k'ãyaara, taarã–e nùde eperã jîp'aak'a bapariimerã. Eperãarã k'inia iru bairã, Jesús piupiji jõmaarã pari. Mãgá chupùria piuda perã, Tachi Ak'õrepa iru tachi rey waibùa papiji mãik'aapa k'îra wãree papiji.
10 Ne–inaa jõma nâbù Tachi Ak'õre–it'ee. Ichiata pia k'îsia iru baji ichi Warra piuda k'aurepa awaraa warrarã chok'ara ichi ome p'anapataadamerã, ichi eujã k'îra wãree bùde. Mapa chi Warra chupùria piupiji. Cristopa jõma ooji ichi Ak'õrepa oopidak'a, mia nâbaji mîda mãga ooit'ee. Mapa ichia wãara Tachi Ak'õre o ak'ùpii eperãarãmaa, aùde t'îudap'eda, ùt'aa wãdamerã. 11 Ma–it'eeta Tachi Ak'õrepa Jesucristo jùrùt'eraji, iru k'aurepa eperãarã t'îudamerã mãik'aapa Ak'õre ode p'anapataadamerã. Jõma eperãarã Tachi Ak'õre ode p'anùùrã chi Warra k'aurepa ichiaba ichi warrarã. Mapa Tachi Ak'õre Warra k'îra nejasia–e bù mãgùùrãmaa âpema ait'ee. 12 Mãga k'awa p'anù Tachi Ak'õre Ûraa p'ãdade jara bairã:
‘Tachi Ak'õre, mùa pù k'awapiit'ee mù âpemaarãmaa mãik'aapa pùmaa ùt'aa t'âit'ee k'ari nâbùde ãra taide.’ (Salmos 22.22)
13 Ichiaba awara ãi jara bù:
‘Mùa Tachi Ak'õrede ijãait'ee.’ (Isaías 8.17)
Ichiaba jara bù:
‘Mù nama bùda aji, pùa warrarã mùmaa teeda ome.’ (Isaías 8.18)
14 Mãgà warrarã tachik'a p'anadairã, k'awa p'anù Jesucristo auk'a eperã paji. Mãga pa k'inia baji k'awada perã ichi piuda k'aurepa eperãarã irude ijãa p'anù uchiapiit'ee Netuara Poro Waibùa jua ek'ariipa. Mãgùpa eperãarã peepii awaa bapari. 15 Mãgà jua ek'ari eperãarã esclavoorãk'a p'anapata, piudait'ee waawee p'anadairã. Mamîda Jesucristopa aweda Netuara Poro Waibùa p'oyaada perã piuk'ãri, ichia eperãarã uchiapii mãgà jua ek'ariipa waa waaweenaadamerã piuit'ee. 16 Maperãpù tachia k'awa p'anù Jesucristo che–e paji na p'ek'au eujãdee angeleerã k'aripait'ee. Ma k'ãyaara cheji k'aripait'ee Tachi Ak'õrede ijãapataarã Abrahampa ijãadak'a. 17 Cristo mãgá cheda perã ichi âpemaarã k'aripade, tachik'a baji na p'ek'au eujãde bak'ãri. Mapa P'aareerã Poro Waibùapa ooparik'a, tachi chupùria k'awaapari mãik'aapa ùt'aa t'âpari tachi pari. Iru piuda k'aurepa Tachi Ak'õrepa wêpapipari tachia p'ek'au k'achia oopata, ma k'aurepa atuanaadamerã. 18 Jesucristo tachik'a bada perã, auk'a chupùria nâbaji Netuara Poro Waibùapa irumaa ne–inaa k'achia oopi chek'ãri. Mapa ichia tachi k'aripai auk'a choodamerã mãik'aapa ne–inaa k'achia oonaadamerã.