Sãga ijãapataarã p'anapataadaipia bù
2
1 Pù jõdee, jarateeipia bù jîp'a uchiamerã Jesucristo Ûraa Pia jara bùk'a. 2 Ûráaji ijãapataarã chonaarãmaa: ne–inaa oodai naaweda pia k'îsiadaipia bù p'ek'au k'achiade baainaadamerã; k'îra jîp'a p'anadaipia bù apemaarã k'îrapite, pia k'îsiadamerã ãchide; ne–inaa pariatua oodaik'araa bù; wãara Cristode ijãadaipia bù; awaraarã wãara k'inia iru p'anadaipia bù Tachi Ak'õrepa k'inia iru bùk'a; chupùria jõnù jida, Cristode ijãadaipia bù.3 Mãga pùk'a chõtrãarãmaa ûráaji: Tachi Ak'õre ome ewari chaa chok'ek'ee p'anadaipia bù; chîara ãpùte ik'achia pedeedaik'araa bù; it'uapa piudaik'araa bù. Ãchi mãgá pia p'anadaipia bù apemaarã wêraarã ne–inaa pia oo k'awaa wãdamerã. 4 Mãgá ijãapataarã chõtrãarãpa awêraarãmaa jarateedai ãchi k'ima mãik'aapa ãchi warrarã k'inia iru p'anapataadamerã. 5 Ma awêraarãpa ne–inaa pariatua oodaik'araa bù; ãchi ùmùk'îra k'ãyaara awaraa ùmùk'îra ome t'îudaik'araa bù; k'achia oodait'ee k'îsiadaik'araa bù; t'ãri pia mimiadaipia bù ãchi te pidaarã ak'ùdait'ee; ãchi ùmùk'îra jua ek'ari chok'ek'ee p'anadaipia bù. Mãgá p'anaruta pùrã, ijãadak'aa beerãpa k'achia pedeeda–e pait'ee Tachi Ak'õre Ûraade ãra k'aurepa.
6 Auk'a ûráaji k'ûtrãarã chok'ek'ee p'anadamerã mãik'aapa ne–inaa pariatua oonaadamerã. 7 Tito, pù ichiaba nejõmaade ichita ne–inaa pia ooipia bù. Mãgá ãramaa ak'ùpiit'ee sãga p'anapataadaipia bù. Ãramaa Tachi Ak'õre Ûraa jarateek'ãri, k'îra jîp'a jarateeipia bù ãra pipùara p'anapataadamerã mãik'aapa Jesucristo k'inia iru p'anadamerã. Jarateeik'araa bù pù waibùara pait'ee ãra k'îrapite. 8 Pùa jarateeru ichita wãara baipia bù. Mãgá jarateeru pùrã, apidaapa jarada–e pai pùa pariatua jarateepari. Ma k'ãyaara, pùa jaratee bù ûridaamaa beerã k'îra nejasia p'anadai k'awaadak'ãri pùa ichita oopari pùa ûraa bùk'a. Ne–inaa k'achia maarepida unuda–e pai tachi ãpùte jaradait'ee.
9 Ûráaji esclavoorã ijãa p'anùùrãmaa: ãchi chipariirã jua ek'ari chok'ek'ee p'aneedaipia bù; ne–inaa jõmaata t'ãri pia oodaipia bù chipariirãpa oopi p'anùk'a; pedee k'achia p'anaudaik'araa bù mimiade chok'a pëidak'ãri. 10 Chipariirã net'aa maarepida chùadaik'araa bù. Ma k'ãyaara ak'ùpidaipia bù ichita oodait'ee chipariirãpa k'inia p'anùk'a, seewa jarada–ee. Mãgá ewari chaa chok'ek'ee p'anaruta pùrã, chipariirã awaraarã ome Tachi Ak'õre Ûraa pi–ia k'îsiadai mãik'aapa iru ode t'îu k'iniadai tachi ome, tok'arradee atuapiamaapa.
Sãap'eda k'îra jîp'a p'anadaipia bù
11 Tachi Ak'õrepa ak'ùpiji eperãarã jõmaweda k'inia iru bù mãik'aapa k'inia bù o k'achiade atuanaadamerã. 12 Tachia iru ûraade jara bùk'a oodak'ãri, oo amaadait'ee ijãadak'aa beerãpa ne–inaa k'achia k'îra t'ãdoo oopata. Mãgá jîp'a ijãadak'ãri, pia k'îsia k'awaa wãpata mãik'aapa k'îra jîp'a oopata tachia oodaipia bùk'a Tachi Ak'õre k'îrapite. Tachi mãga p'anapata pùrã na p'ek'au eujãde p'anù misa, pia p'anapataadait'ee iru k'îrapite, ichiaba awaraarã k'îrapite. 13 Mãga p'anapataadaipia bù Tachi Ak'õre Waibùa waya cheru misa. Tachi K'aripapari Jesucristo unu k'iniapa ewari chaa iru nùpata. Iru k'îra wãree unudak'ãri, t'ãri o–îa ak'ùtrua para nâbeeit'ee. 14 Ichi ita–aria peepiji tachi pari. Mãgá tachi k'aripa ataji p'ek'au k'achia jua ek'ariipa. Mãgá piuk'ãri, tachia k'achia oopatap'edaa jõmaweda wêpapiji ichideerã p'aneedamerã. Maperã t'ãripa ichi–it'ee ne–inaa pia k'îra t'ãdoo oo k'inia p'anù.
15 Mãpai Tito, mãgee ûraa mùa jarada pia jaratéeji Creta isladepema ijãapataarãmaa. T'ãri pia ûráaji, jõmaweda pùa jara bùk'a oodamerã. Ûri k'iniada–ee p'anù pùrã, k'awapíji ãchia ne–inaa k'achia oo p'anù. Tachi Ak'õrepa pù jùrùt'eraji ãra ak'ùpariimerã. Maperã mãgá pedeeipia bù. Pù yiaraa iru p'anadaik'araa bù.