TITO
San Pablopa K'art'a P'ãda Titomaa
Salude pëida
1
1 Mù, Pablo mimiapari Tachi Ak'õre–it'ee. Jesucristopa mù pëiji ichi ûraa jarateede, Tachi Ak'õrepa jùrùt'eradaarã irude ijãadamerã mãik'aapa iru wãarata jara pëida k'awaadap'eda, chok'ek'ee p'anadamerã. 2 Ma awara ichideerãpa k'awaadait'ee piudak'ãri, ichita ùt'ari p'ananadait'ee ichideerã perã. Tachi Ak'õrepa mãga jaraji na p'ek'au eujã bai naaweda. Wãarapù; seewa jarak'aa. 3 Tachi Ak'õreta Tachi K'aripapari. Irua k'inia bak'ãri, ma ûraa k'awapiji eperãarãmaa. Ichiaba mù jùrùt'eraji mãgà jarateenamerã.4 Tito, na k'art'a pùmaa p'ãru. Pù k'inia iru bù mùchi warrak'a, Cristode wãara ijãapari perã mùk'a. Ùt'aa iidipari Tachi Ak'õrepa mãik'aapa Tachi K'aripapari Jesucristopa pù pia ak'ù p'anadamerã. Mãgá pù k'ãiwee bapariit'ee.
Pablopa Titomaa mimia teeda
5 Pù Creta islade atabëiji, ne–inaa mùa jõma oo–e pada oomerã. Mùa naaweda jaradak'a, jùrùt'eraipia bù ùmùk'îraarã p'uuru bee chaa ijãapataarã ak'ùpataadamerã. 6 Ijãapataarã ak'ùpari t'ãri pia baipia bù Tachi Ak'õre k'îrapite. Ichiaba k'achia wêe baipia bù eperãarã k'îrapite. Wêra abapai iru baipia bù. Chi warrarã Cristode chok'ek'ee ijãadaipia bù. Ichiaba t'ãri pia p'anadaipia bù, awaraarãpa jaranaadamerã ãra k'achia–idaa p'anù, maa–e pùrã k'ùùrù k'isua p'anù. 7 Ichia Tachi Ak'õredeerã ak'ùpariit'ee. Maperã jùrùt'eraipia bù eperã k'îra jîp'a, k'achia wêe apemaarã k'îrapite. K'ùùrù k'isua baik'araa bù; k'îrauyaa *baik'araa bù*; toyaa *baik'araa bù*; chõoyaa *baik'araa bù*; chîara k'ûrayaa *baik'araa bù* p'arat'a jitait'ee. 8 Ma k'ãyaara awaraarã auteebaipia bù, ichi temaa chedak'ãri. Ichiaba ne–inaa pia o–îa ooipia bù; k'îsia k'awaa baipia bù ne–inaa ooit'ee; t'ãri pia awaraarã ome; pia bapari Tachi Ak'õre k'îrapite; pia k'îsiapari ne–inaa ooi naaweda. 9 Ichita Ak'õre Ûraade ijãaipia bù tachia jarateedap'edaak'a, ma ûraa wãara perã. Ma ûraa k'ãyaara Tachi Ak'õrepa ûraa awara bùk'aa. Mãga ijãak'ãri, k'aripait'ee ijãapataarãpa oodamerã Tachi Ak'õre Ûraa chiwidi k'awa beerãpa jarateedap'edaak'a. Ma awara ma ûraa ûridaamaa beerãmaa k'awapii ãrapa k'achia oopata.
Pablopa jarada seewa jarateepataarãde
10 Mùa mãga jara bù, mãgee ûridaamaa p'anùùrã chok'ara paraa perã parã t'ãide. Seewa ãchi k'îsiadeepa pariatua jarateepata mãik'aapa eperãarã k'ûrapata. Mãgùùrãpa jarateepata Cristo eere p'anùùrãpa at'ãri oodaipia bù Moisés eere p'anùùrãpa oopatak'a; tauchaa bùpidaipia bù ùmùk'îraarã k'ap'ùade. 11 Tito, mãùrãmaa jarateepináaji. Ãchia jarateedaik'araa bù, ma k'aurepa ùmùk'îraarã, wêraarã, ãchi warrarã paara k'ûrapata perã. Mãgeerãpa k'îra nejasia wêe seewa jarateepata p'arat'a atadait'ee ãchi–it'ee.
12 Chonaarãweda Creta isladepema k'îsia k'awaapari, ãchi auk'aapa mãgaji:
“¡Creta pidaarã, seewa–idaa beerã, k'oo–idaa beerã, waibùa nek'oyaa beerã! Parã jõmaweda t'ãri k'achia–idaa p'anapata ne–animalaarã k'achiarãk'a.”
13 Ma eperã k'îsia k'awaaparipa jaradak'a, mãga p'anù ma seewa jarateepataarã. Maperã ãchi mãik'aapa chi seewa ûri k'inia p'anùùrã paara ùtrùak'óoji jîp'a ijãadamerã. 14 Mãgá waa ijãada–e pait'ee chonaarãwedapema judiorãpa seewa nepùrùdap'edaa ãchi k'îsiadoopa. Ichiaba waa ooda–e pait'ee Jesucristo ûraa wãara ûridaamaa p'anùùrãpa jara p'anùk'a.
15 Cristo k'aurepa p'ek'au k'achia wêe p'anadak'ãri, ne–inaa jõmaweda pia bù tachi–it'ee; chik'o k'odait'ee mãik'aapa it'abarreepema net'aa. Jõdee jãgee p'ek'au k'achia oopataarã–it'ee mãik'aapa Cristo ûraade ijãadak'aa beerã–it'ee, maarepida ne–inaa pia wê–e. Ãchi–it'ee jõmaweda k'achia bù. Ãchi k'îsia paara k'achia bù, Ak'õrepa k'inia bùk'a k'îsiadak'aa perã. 16 “Taipa Tachi Ak'õrede ijãa p'anùda” apata. Mamîda seewata mãga jarapata. Tachia ãchia oopata unudak'ãri, k'awapata ãchia t'ãripa ijãadak'aa. T'ãri k'achia–idaa p'anadairã, Tachi Ak'õre k'îrau bù ãchi ome. Oodak'aa irua oopi k'inia bùk'a. Mãgeerãpa ne–inaa pia apida p'oyaa oodak'aa.