Tachi Ak'õre ewari waibùa k'ait'a pak'ãri
3
1 Timoteo, Tachi Ak'õre ewari waibùa ewate pai naaweda, eperãarã audupùara k'achiade baaidait'ee mãik'aapa nepùra jùrùdait'ee ijãapataarã ome. 2 Nãga p'anadait'ee: ãchi–it'ee aupai ooyaa; p'arat'a ata k'iniayaa ãchi–it'ee; auduayaa; ik'achia pedeeyaa; t'ãri k'achia–idaa; ãchi ak'õreerã pedee ûridaamaa; gracias jaradak'aa apidaamaa; oodak'aa Tachi Ak'õrepa k'inia bùk'a; 3 ãchideerã paara chupùria k'awadak'aa; k'îra jõ–ee awaraarã ome; chîara ãpùte pedee k'achia jarayaa; pariatua ne–inaa k'achia ooyaa; chîara k'îra unuamaa; ne–inaa pia k'îra t'ãdoo oo*amaa; 4 ãchi k'õp'ãyoorã paara traicionaapata; k'îsiadak'aa ne–inaa ooi naaweda; auduayaa, pedee–idaa nipapata; ãchia oo k'iniata ooi awaa p'anù ne–inaa oodai k'ãyaara Tachi Ak'õre–it'ee, iru k'inia iru p'anadairã. 5 Mãgeerã chip'edaipata Cristode ijãapataarã ome ùt'aa t'âde. Mamîda seewata mãga oo p'anù, oo k'iniadak'aa perã Cristopa oopi bùk'a. ¡Ãyaa béeji mãgeerã ik'aawaapa!6 Âraweda mãgeerã jîak'a imeraa jara p'anùùpa eperãarã tede t'îupata. Maap'eda iwarraa pedee p'anùùpa k'ûrapata wêraarã pia k'îsia k'awa–ee beerã. Ma wêraarã k'îsia p'ua p'anapata ãchia p'ek'au k'achia oopata k'aurepa. Mamîda k'achia oo amaadak'aa. Ma k'ãyaara oopata ãchia oo k'iniata, ne–inaa k'achia bù mîda. 7 Ma wêraarã mãga p'anadairã, ûri k'inia p'anù ne–inaa k'îra t'ãdoo eperãarãpa jaratee p'anù. K'îsia p'anù mãga ûridak'ãri, k'îsia k'awaa padaridai. Mamîda ma k'ãyaara, audupùara k'awada–ee p'anapata Tachi Ak'õrepa wãarata jara pëida. 8 Mãgee jarateepataarãpa k'îsiapata chonaarãwedapema petau tau k'awaa beerã, Janes, Jambres ome k'îsiadap'edaak'a. Moisepa oo bak'ãri Tachi Ak'õrepa oopidak'a Egiptode, mãùrãpa irua jarada ûridaamaa p'anajida. Mãga pùk'a p'anù mãgee ârapema jarateepataarã. Ãchia ûridaamaa p'anù Tachi Ak'õrepa wãarata jara pëida jarateepataarã pedee. Jîp'a k'îsia k'awada–ee p'anù, wãara k'awa k'iniada–e p'anadairã Tachi Ak'õrepa jara pëida, mãga jaratee p'anùda a p'anù mîda. 9 Mamîda ichita mãgá jarada–e pait'ee, Tachi Ak'õrepa jõmaarãmaa k'awapiit'ee perã ãchi k'îsia atua p'anù. Tachia mãga k'awa p'anù chonaarãweda Ak'õrepa mãga ooda perã mãgà omeerã ome, p'oyaada–e p'anadak'ãri Moisés ome.
Pablopa Timoteo ûraada
10 Jõdee pùata k'awa k'inia bù Tachi Ak'õrepa wãarata jara pëida. Mapa mimia bù Tachi Ak'õre–it'ee mù mimiaparik'a. Mù bapata unudoo. K'awa bù mùa jaratee bù mãik'aapa mùa k'îsia iru bù ooit'ee Tachi Ak'õre–it'ee. K'awa bù mùa wãara ijãapari Tachi Waibùa Cristode mãik'aapa mùa choopari mãgá ijãa bùde, awaraarãpa nepùra jùrù p'anù mîda mù ome. K'awa bù mùa awaraarã k'inia iru bù Tachi Ak'õrepa ãra k'inia iru bùk'a. Maperãpù chooi. 11 Ichiaba pùa k'awa bù mù jùrùdap'edaa mãik'aapa miapidap'edaa Cristopa ooda jaratee bù k'aurepa. Mãga oojida mù nipak'ãri Antioquía p'uurude, Iconio p'uurude mãik'aapa Listra p'uurude. Mãgá mia nâbaji mîda, choopachi mãik'aapa Tachi Waibùapa mù k'aripa ataji ma nepùra jõmadeepa. 12 Wãara, Jesucristodeerãpa oo k'inia p'anadak'ãri irua oopi bùk'a, ijãadak'aa beerãpa ãra ichita jùrùdait'ee mãik'aapa miapidait'ee. 13 Mãgà ijãadak'aa beerã mãik'aapa awaraa seewata: “taita Ak'õre Waibùapa pëida” a p'anùùrã, k'achiade baaidait'ee. Maap'eda audupùara mãga baaidait'ee, ãchi k'ûrapatak'a awaraarã k'ûrapata perã.
14 Pù, jõdee, k'irãpáji pùmaa jarateeda mãik'aapa aùde ijåaji naaweda ijãa badak'a. Pùa k'awa bù ma jarateeda Tachi Ak'õrepa wãarata jara pëida. Ichiaba k'awa bù k'airã it'aidépata ma jarateeda ûriji. 15 Warraweda pùa Tachi Ak'õre Ûraa p'ãda ûripari mãik'aapa k'awa bù aùde jara bù. Ma ûraa k'aurépata k'awa bù Tachi Ak'õrepa eperãarã o k'achiadeepa k'aripa ata k'inia bù, Jesucristode ijãadak'ãri. 16 Tachi Ak'õrépata ichi ûraa jõmaweda p'ãpiji ichideerãmaa ichi Jaure k'ap'ùa pari. Maperã k'awa p'anù ma ley p'ãda pia bù nãgee ne–inaa–it'ee: jarateeit'ee Tachi Ak'õrepa wãarata jara pëida; eperãarãmaa k'awapiit'ee ãchia p'ek'au k'achia oopata; k'aripait'ee eperãarã ãchia p'ek'au k'achia oo amaadamerã; k'awapiit'ee Tachi Ak'õrepa oopi k'inia bù eperãarãmaa, mãga oodamerã mãik'aapa pia p'anapataadamerã iru k'îrapite. 17 Mãgee jõma k'awaak'ãri mãik'aapa Tachi Ak'õrepa oopi bùk'a oo k'inia bak'ãri, eperã wãara mimiait'ee Tachi Ak'õre–it'ee mãik'aapa ooit'ee ne–inaa pia k'îra t'ãdoo awaraarã k'aripait'ee.