Pablopa Timoteo ûraada waawee–ee oomerã Cristopa oopi bùk'a
2
1 Timoteo, pù mùchi warrak'a bù. Jesucristopa ichideerã k'aripapari perã, waapùara óoji irua oopi bùk'a. 2 Mùa iru ûraa jaratee bak'ãri ijãapataarã chok'ara nâbù taide, pùa pida ûri baji. Auk'a jaratéeji k'îra jîp'aarãmaa; chi jaratee k'awaa p'anùùrã awaraarãmaa.3 Mù awaraa ijãapataarã ome mia jõnù Jesucristopa oopi bùk'a oopata perã. Waaweenáaji auk'a mia nâbait'ee. 4 Ooipia bù soldaopa ooparik'a. Soldao t'îu–e eperãarã jîp'aarãpa ne–inaa oopatade. Jîp'a oopari ichi poro waibùapa jara bùk'a. 5 Ichiaba deporte jemeneparipa ooparik'a ooipia bù. Mãgùpa oopari ma jemene pia k'awaa beerãpa jarapatak'a, ata k'inia bairã ne–inaa teepata chi p'oyaarutaarãmaa. 6 Ichiaba ooipia bù ne–uuparipa ooparik'a. Mãgà ichi ne–uude sê–ee mimiapari naapùara ata k'inia bairã made chauru. 7 K'îsíaji mùa et'ewa jaradade. Tachi Waibùapa k'awapiit'ee ma jõmaweda k'ãata jara k'inia bù pù–it'ee.
8 K'irãpáji Jesucristo chonaarãwedapema Rey Daviddeepa uchiada paji. Cristota piup'eda, chok'ai p'irabaiji. Mùa mãga jarateepari jõmaarãmaa jarateek'ãri irua oodata eperãarã k'aripait'ee. 9 Maperãpù k'achia ooyaa beerã carcelde t'ù nâbùpatak'a, mù nama carcelde t'ù nâbùjida, mia nâbapariimerã. Mamîda, mù cadenapa jâ iru p'anù mîda, p'oyaa jarateepida–e pait'ee awaraarãpa jarateedamerã Tachi Ak'õrepa pedee pia jara pëida Cristode. 10 Maperãpù mùa ne–inaa jõma choopari, mia nâbù mîda. Mãgá choopari eperãarã Tachi Ak'õrepa jùrùt'erada Jesucristode ijãadamerã, o k'achiadeepa uchiadamerã mãik'aapa ichita p'anapataadamerã Tachi Ak'õre k'îra wãree eujãde.
11 Na pedee jõmaarãpa ijãadaipia bù, wãara perã:
Tachi p'ek'au k'achia ooyaa bù k'ap'ùa piu pùk'aji Cristo ome, iru ome araa p'anadairã. Maperã jai–idaadak'ãri, auk'a chok'ai p'irabaidait'ee iru p'irabaidak'a mãik'aapa iru ome ichita p'anapataadait'ee.
12 Tachi chooruta pùrã irude ijãa p'anùde, Ak'õre truade iru ik'aawa p'anadait'ee ne–inaa jõmaweda ak'ùmaa. Mamîda iru meraruta pùrã, irua auk'a tachi merait'ee Tachi Ak'õre k'îrapite.
13 Tachia jara p'anùk'a ooda–e p'anù pùjida, irua jara bùk'a ichita ooit'eepù, ichita mãga oopari perã.
Mimiapari Tachi Ak'õrepa pia ak'ùpari
14 Mùa jara bù k'irãpapíji ijãapataarãmaa. Ma awara Tachi Ak'õre k'îrapite ûráaji aupedeenaadamerã Tachi Ak'õrepa jara pëida pedee jara k'inia bù k'ap'ùa. Mãga oodak'ãri, apemaarã maarepida k'aripada–e p'anù. Ma k'ãyaara ijãa amaapi p'anù ãchia jara p'anù ûrirutaarãmaa. 15 Pùa, jõdee, jõmaweda t'ãripa óoji, Tachi Ak'õrepa pù ak'ùmerã mimiapari piak'a. Mãga ooru pùrã, k'îra nejasia–e pait'ee Tachi Ak'õre k'îrapite, irua wãarata jara pëida pia jarateepari perã. 16 Mamîda ãyaa béeji pariatua pedee wãpataarã ik'aawaapa. Ãchia Tachi Ak'õrepa jarapi bùk'a jaradak'aa. Mãgá pariatua pedee p'anù k'aurepa audupùara k'achiade baairuta. 17 Aida k'ayaa waibùara wariparik'a tachi chiara mik'iapiit'ee, mãga pùk'a ãchia jarateepata wari pùk'adaipari ijãapataarã chok'araara ijãa amaapiit'ee. Mãgá jaratee p'anù Himeneopa mãik'aapa Filetopa. 18 Ãchia Tachi Ak'õre wãarata jarateeda–e p'anù, jara p'anadairã tachi Cristode ijãapataarã ârá ichita chok'ai p'anù Tachi Ak'õre–it'ee. Maperã piudak'ãri, chok'ai p'irabaida–e pait'eeda apata k'ap'ùa chiwidide Cristopa oodak'a. Ma seewa jarateepata k'aurepa ijãapataarã ûk'uru ijãa amaadaruta. 19 Mamîda wãara Cristode ijãapataarãpa mãga ooda–e pait'ee. Ãchia choodait'ee Tachi Ak'õrepa wãarata jara pëida ijãa p'anùde. Irua jõmaarãmaa k'awaapipari ichi ijãapataarã chipari ichi ley p'ãdade. Mãga k'awa p'anù ma p'ãdade jara bairã:
‘Ak'õre Waibùapa ichideerã k'awa bù.’ (Números 16.5)
Awara ãi ichiaba jara bù:
‘Jõmaweda jara p'anùùrãpa: “Cristo Tachi Ak'õre Waibùa” ne–inaa k'achia k'îra t'ãdoo oo amaadaipia bù.’ (Salmos 34.14)
20 K'îsiadáma nãgùde. P'arat'ara bù te choma bùde paraa p'arat'u k'îra t'ãdoo, ûk'uru nêedee ooda maa–e pùrã p'arat'adee ooda. Ma te chiparipa mãgee jùrùt'erapari ichi–it'ee mãik'aapa chi k'õp'ãyoorã–it'ee nek'odait'ee pak'ãri. Jõdee p'arat'u pak'urudee ooda maa–e pùrã yoorodee ooda iru bù ichi ek'ariirã–it'ee. 21 Mãga bù ichiaba tachi ijãapataarã ome. Apidaapa ne–inaa k'achia oo amaaruta pùrã ooit'ee Tachi Ak'õrepa oopi bùk'a, iru, tachi ijãapataarã chiparipa, ma ijãapari jùrùt'erapari oomerã ne–inaa pia k'îra t'ãdoo.
22 Maperã oonáaji ne–inaa k'achia k'îra t'ãdoo k'ûtrãarãpa oo k'inia p'anùk'a. Ma k'ãyaara jùràji ne–inaa jõma ooit'ee Tachi Ak'õrepa oopi bùk'a. T'ãri jîp'a nipaparíiji Cristode ijãapari perã. Awaraarã k'inia iru báji mãik'aapa k'ãiwee baparíiji jõmaarã ome. Mãga ooru pùrã, ooit'ee jõma Cristomaa ùt'aa t'âpataarãpa oopatak'a, wãara t'ãripa irude ijãapata perã. 23 Aupedeenáaji k'îsia k'awa–ee beerã ome, pariatua pedee wãpata perã. Pùa k'awa bù mãga ooru pùrã, nepùra jùrùdai pù ome. 24 Tachi Waibùa mimiapari nepùrade baaik'araa bù awaraarã ome. Ma k'ãyaara t'ãri pia baipia bù jõmaarã ome; awaraarã jaratee k'awaaipia bù mãik'aapa chooipia bù, k'îrau–ee, awaraarãpa ne–inaa k'achia ooruta pùjida. 25 T'ãri pia ûraaipia bù Tachi Ak'õre wãarata jarateeda–ee p'anùùrã. Jaraipia bù ãchia pia jarateeda–e p'anù. Pù ûraa ûriruta pùrã, Tachi Ak'õrepa ãchi k'aripai ma k'achia oo amaadamerã mãik'aapa irua jara pëida wãara k'awaadamerã. 26 Mãgapù uchiadai Netuara Poro Waibùa juadeepa. Ichia ãra atap'eda, trampade bùji oodamerã ichia oopi k'inia bùk'a. Mamîda Tachi Ak'õrepa ãra uchiapii mãgà juadeepa, wãara oodamerã ichia oopi bùk'a.