Sisiirã Amopa k'ãimok'araa pùk'a bùde unuda
7
1 K'ãimok'araa pùk'a bùde Tachi Ak'õre Waibùapa mùmaa nãga unupiji: Net'a tau ewadak'ãri, rey–it'ee t'ùap'edap'edaa t'êepai, araarepema net'a tau t'ono wãk'ãri, mùa unuji Tachi Ak'õrepa sisi see nâbù awara–awaraa oomaa bù. 2 Ma sisiirãpa ma net'a tau t'ono wãda jõmaweda k'ok'oo jõnù unuk'ãri, mùa Ak'õremaa mãgaji:—Ak'õre Waibùa, ¡pùchi eperãarãpa ne–inaa k'achia oopata perdonáaji! ¿Sãgá Jacobdeepa uchiadap'edaarã nadeepa chok'ai uchiadaima aji, tai nãgá juatau wêe pùk'a p'anùta? 3 Mùa chupùria iidida ûrik'ãri, Ak'õre Waibùapa k'îsia awaradachi mãik'aapa mãgaji:
—Mãgara mùa mãga oopi–e pait'eeda aji.
T'ùpùtau Amopa k'ãimok'araa pùk'a bùde unuda
4 Maap'eda awaraa k'ãimok'araa pùk'a bùde Tachi Ak'õre Waibùapa mùmaa nãga unupiji: Ak'õre Waibùapa ichi eperãarã miapiit'ee ãramaa t'ùpùtau wãsia bùk'a pëiji. Ma wãsiapa eujã ek'aripema p'usaa jõmaweda p'oopiji mãik'aapa ne–uupata eujã uratùpiji. 5 Mùa mãga unuk'ãri, Ak'õremaa mãgaji:
—Ak'õre Waibùa, ¡pùchi eperãarã chupùria k'awáaji! ¿Sãgá Jacobdeepa uchiadap'edaarã nadeepa chok'ai uchiadaima aji, tai nãgá juatau wêe pùk'a p'anùta? 6 Mùa chupùria iidida ûrik'ãri, Ak'õre Waibùapa k'îsia awaradachi mãik'aapa mãgaji:
——Mãgara ichiaba mãga oopi–e pait'eeda aji.
Plomero Amopa k'ãimok'araa pùk'a bùde unuda
7 Maap'eda awaraa k'ãimok'araa pùk'a bùde Tachi Ak'õre Waibùapa mùmaa nãga unupiji: Iru muralla ik'aawa bainâ baji mãik'aapa ichi juade plomero iru baji. 8 Mãga nùde irua mùmaa iidiji:
—Amós, ¿k'ãata unu bùma? aji.
Mãpai mùa p'anauji:
—Plomada pùchi juade unu bùda aji.
Mãpai irua mãgaji:
—Na plomada ome mùa ak'ùmaa bù mùchi eperãarã, israelitaarãpa oopata. Eperãarãpa plomada ome muralla oodak'ãri, jîp'a uchiapari. Mamîda ãrapa oopata mãga–e. Mapa mù waa k'îsia awara ata–e pait'ee. Ãrapa p'ek'au k'achia oopata k'aurepa ãra miapiit'ee. 9 Mùa jõpiit'ee Isaacdeepa uchiadap'edaarã mùmaa ùt'aa t'âpatamãi ee nok'ode bee. Ichiaba ãripiit'ee ãra ùt'aa t'âpata te Israel eujãde bee. ¡Israeldepema rey Jeroboandeepa uchiadap'edaarã espadapa jõpiit'ee!
Amós p'aare Amasías ome unuda
10 Amós Tachi Ak'õre pedee jara nipa bùde Betel p'uurudepema p'aare Amasiapa Israeldepema rey Jeroboanmaa nãga jara pëiji: “Amós israelitaarã t'ãide ni mãik'aapa pù, tachi rey waibùa, ãpùte pedee bù. Mãga oo wãk'ãtù wãru pùrã, ¿na eujãdepemaarãpa pù ãpùte auk'a jara p'aneeda–e paik'ã mãik'aapa na eujã k'achiade baaipida–e paik'ã? 11 Mùa mãga jara bù irua nãga jara ni bairã: ‘Jeroboán espadapa piuit'ee mãik'aapa awaraa eujãdepemaarãpa israelitaarã eujã t'ùmà bùde ateedait'ee.’ ”
12 Ma t'êepai Amasiapa Amomaa nãga jaraji:
—¡Ak'õre pedee jarapari, namãik'aapa ãyaa wåji! Ãpùtee Judá eujãdee wåji jarateede mãik'aapa ma eujãdepemaarãpa chik'o teepata k'óji. 13 Nama Betelde waa Ak'õre pedee jaranáaji namapema Tachi Ak'õremaa ùt'aa t'âpata tede rey ùt'aa t'âpari perã.
14 Mãpai Amopa p'anauji:
—Mùa Tachi Ak'õre pedee jarak'aa p'arat'a pari wa awaraa ne–inaa pari. Mù iru pedee jaraparideepa uchiada–e bù. Bapariit'ee mùa ovejaarã ak'ùpari mãik'aapa higuera pak'uru ak'ùpari. 15 Mamîda Tachi Ak'õre Waibùapa mù ma mimiadeepa t'âjaraji mãik'aapa mùmaa mãgaji: “Wåji Israel eujãdee mãik'aapa mù k'ap'ùa pari pedéeji/ mùa pedee jarapi bùk'a jaráji.”
16 Ârá Tachi Ak'õrepa jarapi bù ûríji. Pùa jara bù: “Tachi Ak'õre pedee jaranáaji Israel eujã ãpùte mãik'aapa Isaacdeepa uchiadap'edaarã ãpùte.” 17 Pùa mãga jara bairã Tachi Ak'õre Waibùapa pù, Amasiamaa nãga jara bù: “Na p'uurude pùchi wêrapa prostituta mimia ooit'ee; pùchi warrarã, k'aurã ome espadapa piuk'oodait'ee; k'îra tewaarãpa pùchi eujã chaadap'eda, ãchi–it'ee t'oo atadait'ee mãik'aapa pù, awaraa israelitaarã ome ijãadak'aa beerã eujãdee presoorãk'a ateedap'eda, mama pãchi eujãdeepa t'ùmà pù piuit'ee.”