23
1 Mãga ûrik'ãri, rey Josiapa t'âpiji jõmaweda Judadepemaarã poro waibùarã Jerusalendepemaarã poro waibùarã ome chip'edaidamerã iru ome. 2 Maap'eda Josías ome jõmaweda Judadepema ùmùk'îraarã, Jerusalendepemaarã, p'aareerã, Tachi Ak'õre pedee jarapataarã mãik'aapa awaraarã, chi ek'ariara bùdeepa waibùara bùmaa cheepurujida Tachi Ak'õre tede. Mama p'anùde jõmaarã taide golpe pedeede ãchi reypa leeji ma librode ley p'ãda, Tachi Ak'õre tede unuda. 3 Mãpai rey ak'ùnâ banaji rey ak'ùnâ beepari te bùùrù ik'aawa mãik'aapa Tachi Ak'õre k'îrapite jaraji t'ãripa irua k'îra jîp'a ooit'ee Ak'õrepa oopi bùk'a mãik'aapa iru ley p'ãdade jara bùk'a. Jaraji ma p'uurudepemaarãpa auk'a oodait'ee ma ley p'ãdade jara bùk'a. Mãpai arii p'anadap'edaarãpa auk'a jarajida.Rey Josiapa pia ooda
(2 Crónicas 34.3-7)
4 Mãpai rey Josiapa jaraji p'aareerã poro waibùa Jilquiamaa, iru k'aripapataarãmaa mãik'aapa ma tedepema puerta jâapataarãmaa ne–inaa jõmaweda Tachi Ak'õrede–eeta p'e atadamerã mãik'aapa Ak'õre tedeepa ateedamerã p'uuru taawaa. Jõmaweda ne–inaa Baal–it'ee ooda, Asera–it'ee ooda mãik'aapa ne–inaa pajãde nâbù–it'ee ooda p'e atajida. Mãpai Jerusalén taawaa Cedrón to chak'e p'oodade ateejida mãik'aapa paa jõjida. Maap'eda ma it'abarre p'ora p'ejida ateedait'ee Beteldee. 5 Ma t'êepai Josiapa jaraji ãyaa pëidamerã naawedapema Judadepema reyrãpa p'aareerã bùdap'edaa ijãadak'aa beerã ùt'aa t'âpata tede ne–inaa t'ûa bapari paapatap'edaarã. Ma p'aareerãpa ãchi mimia oopachida ee nok'ode jõmaweda Judá eujãdepema p'uurude, Jerusalén p'uuru ik'aawa paara. Mãgá ne–inaa t'ûa bapari paapachida Baal–it'ee, ak'õrejîru–it'ee, atane–it'ee, lucero–it'ee. 6 Rey Josiapa ichiaba ãyaa ateepiji Aserá k'îrak'a bù, Tachi Ak'õre tede bada. Paapiji Cedrón to chak'e p'oo badade it'abarre p'ora uchiarumaa. Ma it'abarre p'ora p'ojida eperã jîp'aarã ùapatamãi. 7 Ichiaba Josiapa jaraji ùmùk'îraarã, chi ãtau nopipataarã k'ãipatamãi jõpidamerã, ma k'achia oodap'edaa perã Tachi Ak'õre tede, wêraarãpa p'aru k'aat'ùpatap'edaamãi ma ak'õre waibùa apatap'edaa Asera–it'ee.
8 Ma t'êepai Josiapa jaraji Judadepema p'uurude p'anadap'edaa p'aareerã aneedamerã mãik'aapa mãùrã ee nok'ode p'anadap'edaa ùt'aa t'âpatamãi ãrik'oodamerã Gueba p'uurudeepa Berseba p'uuru parumaa. Aù naaweda mama ãchia ne–inaa t'ûa bapari paapachida. Josiapa jaraji ma p'aareerã p'ana chedamerã Jerusalende. Ichiaba jaraji ãridamerã altar netuaraarã–it'ee oodap'edaa p'uurudepema puerta Josué apatap'edaade, apema puerta juabi eere. Ma puerta t'â bùjida Josué, ma p'uuru poro waibùa t'âjarapatap'edaa perã Josué. 9 Ma p'aareerã ijãadak'aa beerã ùt'aa t'âpata tede mãgá aneepiji mîda Jerusalén p'uurude p'anadamerã, ãradepema apidaapa mimia–e paji Tachi Ak'õre altar k'îrapite. Aba pan levadura wêe k'opachida apemaarã p'aareerã ome.
10 Maapai Josiapa ichiaba jaraji warrarã paapatamãi Ben Hinón eujã jewedaade bada ichiaba ãrik'oodamerã, apidaapa ichi warra wa k'au aùde paanaadamerã ak'õre waibùa apatap'edaa Moloc–it'ee. 11 Josiapa ichiaba ãripiji caballoorã k'îrak'a bù pak'urudee ooda Judadepema reyrãpa awara bùdap'edaa ak'õrejîru–it'ee. Ma caballoorã k'îrak'a bù p'e iru p'anajida Tachi Ak'õre tedepema puerta k'ait'a, rey ek'ari beerãdepema aba, Natán Mélec k'ãipari te ik'aawa. Ichiaba carreta awara bùdap'edaa ak'õrejîru–it'ee paapiji. 12 Josiapa ichiaba ãripiji altar Judadepema rey Acazpa oopida palacio te k'irude, Acaz sala apatap'edaa ùt'ari mãik'aapa Manasepa oopida Tachi Ak'õre te ãuk'idaade; ma altar omé ne–inaa pajãde nâbù–it'ee. Ma altar ãridap'eda, chi beeda bat'ak'oojida Cedrón to chak'e p'oodadee.
13 Josiapa ichiaba ãripiji ijãadak'aa beerã ùt'aa t'âpata te Jerusalén oriente eere ee nok'ode p'anadap'edaa, Olivo sur eere. Mãgà ùt'aa t'âpata te oopiji Israeldepema rey Salomonpa, Sidón pidaarã nawe waibùa k'achia–idaa bada Astarte–it'ee, moabitaarã ak'õre waibùa k'achia–idaa bada Quemo–it'ee, mãik'aapa Amón pidaarã ak'õre waibùa k'achia–idaa bada Moloc–it'ee. Tachi Ak'õrepa ma ak'õre waibùa apatap'edaa k'îra unuamaa iru baji. 14 Josiapa ichiaba ãripiji jõmaweda mãu, pak'uru ome ee nok'ode awara bùdap'edaa awaraa ak'õre waibùa apatap'edaa–it'ee. Ma mãu, pak'uru p'anadap'edaamãi, eperã piuda bùùrù p'e bùpiji. Mãga ooji ak'ùpiit'ee ma ak'õre waibùa apatap'edaa k'îra unuamaa iru bù. 15 Mãpai ãripiji altar Betel p'uurude ee nok'ode bada ijãadak'aa beerã ùt'aa t'âpata te ome Nabat warra Jeroboanpa oopida. Ma altar ãripiji pak'uru p'ora parumaa. Mãpai paa jõpiji nawe waibùa Aserá k'îrak'a bù ome. Mãga ooji ma k'aurepa Jeroboanpa israelitaarã k'achiade baaipida perã.
16 Mãpai ma ee bide rey Josiapa unuji naawedapemaarã ma altarde ùt'aa t'âpatap'edaarã jãùra ma altar k'ait'a. Jaraji mãùrã bùùrù êt'a atadamerã mãik'aapa paadamerã ma altar badamãi. Mãgá uchiaji Tachi Ak'õrepa naaweda jaradak'a ichi pedee jarapari ideepa. 17 Maap'eda rey Josiapa iidiji:
—Jãgà jãùra tauchaa bù, ¿k'aidema aji?
Ma p'uurudepemaarãpa p'anaujida:
—Ma jãùra Tachi Ak'õre pedee jaraparide. Iruta Judadeepa cheji jarade pùa et'ewa ooda ma altar ome ooit'eeda ajida.
18 Mãga ûrik'ãri, Josiapa mãgaji:
—Mãgara ma jãùra ichiak'au bùdapáde aji. Apidaapa ichi bùùrù t'õbaidaik'araa bùda aji.
Mapa ma Ak'õre pedee jarapari bùùrù atabëijida mama.
19 Maap'eda Josiapa jaraji ãridamerã jõmaweda ijãadak'aa beerã ùt'aa t'âpata te ee nok'ode Samaria eujãde bada; ma te israelitaarã reyrãpa oopidap'edaa. Ma k'aurepa ãchia Tachi Ak'õre k'îraupijida. Maperã Josiapa mãgee te jõmaweda ãripiji irua oodak'a Betel p'uurude. 20 Ma t'êepai ma ee nok'ode beeda ijãadak'aa beerã ùt'aa t'âpata tede ùt'aa t'âpatap'edaarã peepiji ma altar beedamãi. Ichiaba mama piudaarã bùùrù paapiji ak'ùpiit'ee ma ak'õre waibùa apatap'edaa k'îra unuamaa iru bù. Ma jõma oop'eda, Josías ãpùtee wãji Jerusalendee.
Josiapa Pascua fiesta oopida
(2 Crónicas 35.1-19)
21 T'êepai rey Josiapa jaraji jõmaarã cheepurudamerã Pascua fiesta oode Tachi Ak'õre Waibùa–it'ee, iru ley p'ãdade jara bùk'a. 22 Aù naawedapema charraarãpa israelitaarã ak'ù p'anadak'ãriipa Israeldepema mãik'aapa Judadepema reyrãpa eperãarã ak'ù p'anarutamaa ma Pascua fiesta piara ooda–e paji. 23 Josías año dieciocho rey bùde Jerusalende ma Pascua fiesta oojida Tachi Ak'õre Waibùa–it'ee.
Josiapa Tachi Ak'õre k'inia iru bada
24 Josías rey bùde ichiaba jõmaweda netuaraarã ome pedeepataarã ne–inaa p'asait'ee jarapataarã ome jërek'ooji Jerusalendeepa mãik'aapa Judá eujãdeepa. Ichiaba ne–inaa juapa ooda aù k'îrapite ùt'aa t'âpata ãripiji, eperãarãpa ãchi tede iru p'anadap'edaa paara. Jaraji mãgee ne–inaa iru p'ananaadamerã Jerusalende mãik'aapa Judade. Josiapa ma jõma ooji oo k'inia bada perã Tachi Ak'õre ley p'ãdade jara bùk'a; ma ley p'ãda Jilquiapa unuda Tachi Ak'õre tede. 25 Awaraa rey naawedapema wa t'êepai wê–e paji Josiak'a. Irua t'ãripa Tachi Ak'õrede ijãapachi mãik'aapa ne–inaa jõma oopachi Moisepa p'ãdade jara bùk'a.
26 Josías mãgá bapachi mîda, Tachi Ak'õre k'îrau beeji Judadepemaarã ome, ãchi rey Manasepa ne–inaa k'achia oopariida k'aurepa. 27 Ma k'aurépata Tachi Ak'õre jaraji Judadepemaarã ik'aawa ãyaa wãit'ee irua oodak'a Israeldepemaarã ome. Irua jùrùt'erada p'uuru, Jerusalén paara waa ak'ù–e pait'eeda aji, iru te mama baji mîda jõmaarãpa iru t'â k'irãpadamerã.
Josías jai–idaada
(2 Crónicas 35.20-27)
28 Awaraa ne–inaa ooda Josiapa p'ã bù Crónicas apata librode awaraa Judadepema reyrãpa oopatap'edaa ome. 29 Josías rey bùde Egiptodepema Faraón Necaopa ichi soldaorã p'e atap'eda, wãji Éufrates to parumaa Asiriadepema rey k'aripade. Mãga nùde Josiapa ichi soldaorã p'e ataji mãik'aapa uchiaji mãùrã ome chõode. Mamîda Meguidode Josías Necao ome unudak'ãri, Necaopa peet'aaji. 30 Maap'eda Josías ek'ari beerãpa ichi k'ap'ùa piuda carretade bùdap'eda, ateejida Meguidodeepa Jerusalén p'uurudee. Mama ùajida ichi jãùra oopidade. Ma t'êepai Judadepemaarãpa Josías warra Joacaz awara bùjida rey pamerã chi ak'õre pari.
Joacaz rey pada Judade
(2 Crónicas 36.1-4)
31 Joacaz veintitrés año iru baji rey pak'ãri. Atane õpee rey baji. Mãga nùde Jerusalende bapachi. Chi nawe Libnadepema Jeremías k'au paji; t'âjarapatap'edaa Jamutal. 32 Joacazpa ne–inaa k'achia oopachi Tachi Ak'õre k'îrapite. Oopachi ichi chonaarãpa oopatap'edaak'a. 33 Joacaz rey bùde Egiptodepema Faraón Necaopa iru jita atadachi mãik'aapa ateeji Riblade, Jamat eujãde bada. Mãga ooji k'inia–e pada perã iru rey bamerã Jerusalende. Mãga nùde Necaopa p'arat'a tres mil trescientos kilo, nêe treinta y tres kilo p'aapiji Judadepemaarãmaa. 34 Ma t'êepai Faraón Necaopa Josías warra Eliaquín bùji Judadepemaarã rey pamerã chi ak'õre pari. Eliaquín t'â chiwidi t'â bùji; Joacim. Maap'eda Necaopa Joacaz ateeji Egipto eujãdee. Mama piuji.
35 Rey Joacimpa p'aapachi p'arat'a, nêe ome; Faraón Necaopa p'aapidak'a. Mãga ooit'ee Judadepemaarãmaa impuesto p'aapiji.
Joacim rey pada Judade
(2 Crónicas 36.5-8)