Josías rey pada Judade
(2 Crónicas 34.1-2)
22
1 Josiapa ocho año iru baji rey beek'ãri. Rey paji treinta y un año wãyaaru misa. Mãga nùde Jerusalende bapachi. Chi nawe Boscat p'uurudepema Adaías k'au paji. T'âjarapachida Jedidá. 2 Josiapa ne–inaa pia oopachi Tachi Ak'õre k'îrapite. Auk'a ne–inaa pia oopachi chi chonaa rey Davidpa oopariidak'a.Tachi Ak'õrepa ley p'ãpida unudap'edaa
(2 Crónicas 34.8-33)
3 Josías año dieciocho rey bùde chi reypa oopata p'ãpari pëiji Tachi Ak'õre tede. Mãgà Mesulán ãichak'e paji mãik'aapa Asalías warra, t'âjarapatap'edaa Safán. Pëi naaweda, Josiapa Safanmaa mãgaji:
4 —Wãpáde aji, p'aareerã poro waibùa Jilquiamaa. Jarapáde aji, irua p'e atamerã jõmaweda p'arat'a eperãarãpa aneedap'edaa Tachi Ak'õre–it'ee; iru te t'îupatamãi tee chedap'edaa. 5 Ma p'arat'a teeipia bù Tachi Ak'õre te oopataarãmaa, ãchia mimiapataarã p'aadamerã iru te waya chiwidi oodait'ee. 6 Chi pia jarait'eera p'aaipia bù ne–inaa pak'urudee oo k'awaa beerã, pak'uru t'êe k'awaa beerã, mãu sî k'awaa beerã ãchia neto atadamerã ne–inaa falta bù ma te waya chiwidi oodait'ee. 7 Jarapáde aji, iidinaamerã ãchia jõma juasiadap'eda, chi p'ãda teedamerã, ãchia ma mimia k'îra jîp'a oodait'ee perã.
8 Reypa oopata p'ãpari Safán Tachi Ak'õre tede bù misa, p'aareerã poro waibùa Jilquiapa nepùrùji ichia Tachi Ak'õre ley p'ãda unuda. Ma p'ãda Safanmaa teek'ãri, leeji. 9 T'êepai Safán reymaa wãk'ãri, mãgaji:
—Pù mimiapataarãpa ma p'arat'a p'ejida mãik'aapa teejida te oopataarãmaa Ak'õre te waya chiwidi oodamerã.
10 Ichiaba Safanpa nepùrùji p'aareerã poro waibùa Jilquiapa Tachi Ak'õre ley p'ãda unuda. Mãpai Safanpa ma libro leeji reymaa. 11 Josiapa Tachi Ak'õre ley p'ãda ûrip'eda, chi p'aru jêt'aaji t'ãri p'uapa. 12 Aweda nãga jaraji Hilciamaa, Safán warra Ajicanmaa, Micaías warra Acbormaa, ichia oopari p'ãpari Safanmaa, mãik'aapa rey ak'ùpari Asaiamaa:
13 —Wãdapáde aji, chupùria iidide Tachi Ak'õremaa mù pari, na p'uurudepemaarã pari mãik'aapa Judá eujãdepemaarã pari, ooda–ee p'anù perã na p'ãdade jara bùk'a. ¿Tachi Ak'õre k'îrau bù–ek'ã aji, tachi ome, tachia tachi chonaarã paara ooda–ee p'anapata perã na ûraade jara bùk'a?
14 Ãchi reypa mãga jarada perã p'aare Jilquías, Ajicán, Acbor, Safán, Asaías ome wãjida Tachi wêra Ak'õre pedee jarapari Huldamaa. Mãgà wêra Jarjás ãichak'e mãik'aapa Ticvá warra Salún wêra paji. Jarjás mimiapachi Tachi Ak'õre tede; p'aareerã p'aru jâapari paji. Huldá bapachi Segundo Barriode Jerusalén p'uurude. Ma wãdap'edaarãpa ma wêramaa reypa jarada nepùrùdak'ãri, 15 ichia mãgaji:
—Nãga jara bùda aji, israelitaarã Ak'õre Waibùapa: ‘Jarapáde aji, parã pëidamaa mùa nãga jara bù: 16 Mùa na p'uurudepemaarã k'achia ooit'ee mùa ma libro Judadepema reypa leedade jaradak'a. 17 Na p'uurudepemaarã mù atabaibëijida ùt'aa t'âdait'ee mãik'aapa ne–inaa t'ûa bapari paadait'ee awaraa ak'õre waibùa apatamaa. Mãga oo p'anùùpa mãik'aapa ne–inaa k'achia awaraa oo p'anùùpa mù k'îraupijida. Na k'îrau wêpa–e pait'ee. 18 Ichiaba jaradapáde aji, Judadepema reymaa israelitaarã Ak'õre Waibùapa nãga jara bù: 19 Pùa mù ley p'ãda ûri k'inia bada perã mãik'aapa pùa mùmaa chupùria iidi pëida perã, ma awara pùchi p'aru jêt'aada perã mãik'aapa t'ãri p'uapa jêeda perã, mùa pù chupùria iidida ûriji. Wãara na p'uurudepemaarã k'achia ooit'ee mùa jaradak'a. 20 Mamîda pù chok'ai bù misa mãga papi–e pait'ee. Pù k'ãiwee bapariit'ee mãik'aapa ùadait'eeda aji, pùchi chonaarã ùadap'edaamãi.’
Mãga ûridak'ãri, reypa pëidaarã ãpùtee wãjida irumaa nepùrùde.