Manasés rey pada Judá eujãde
(2 Crónicas 33.1-20)
21
1 Manasepa doce año iru baji Judadepemaarã rey beek'ãri. Rey paji cincuenta y cinco año wãyaarude. Mãga nùde Jerusalende bapachi. Chi nawe t'âjarapachida Hepsiba. 2 Manasepa ne–inaa k'achia oopachi Tachi Ak'õre k'îrapite. Ne–inaa k'achia oopachi ma eujãde naaweda p'anapatap'edaarãpa oopatap'edaak'a, ma k'aurepa Tachi Ak'õrepa mãùrã jërek'ooji mîda israelitaarã naa. 3 Manasepa ijãadak'aa beerã ùt'aa t'âpata te waya oopiji, chi ak'õre Ezequiapa mãgee te ãripiji mîda. Ma awara altar oopiji ak'õre waibùa apatap'edaa Baal–it'ee mãik'aapa nawe waibùa apatap'edaa Aserá k'îrak'a bù oopiji, Israeldepema rey Acabpa oopidak'a. Ichiaba bedabaipachi ùt'aa t'âit'ee ne–inaa pajãde nâbùmaa. 4 Ichiaba altar chiwidi oopiji bùdait'ee Tachi Ak'õre tede aù naaweda Tachi Ak'õrepa jaraji mîda: “Mù Jerusalende ichita bapariit'ee.” 5 Ichiaba Tachi Ak'õre te ãuk'idaa altar awaraa oopiji ne–inaa pajãde nâbù k'irãpadamerã.6 Ichiaba Manasepa ichi warra paa peeji ma ak'õre waibùa apatap'edaa–it'ee mãik'aapa jairã p'e ataji mãùrãpa jaradamerã ne–inaa p'asait'ee, pedeedamerã netuaraarã ome, mãik'aapa ne–inaa k'achia oodamerã awaraarãmaa. Ma jõma audú k'achia bada perã Tachi Ak'õre k'îrapite, Tachi Ak'õre k'îrau beeji Manasés ome. 7 Maap'eda Manasepa ichi ak'õre waibùa apatap'edaa Aserá k'îrak'a bù bùji Tachi Ak'õre tede. Mãga ooji aù naaweda Tachi Ak'õrepa nãga jaraji mîda Davidmaa, chi warra Salomonmaa: “Awaraa Israel eujãdepema p'uuru jùrùt'erai k'ãyaara, mùa Jerusalén p'uuru jùrùt'eraji nama mù tede eperãarãpa mù t'â ichita k'irãpadamerã. 8 Israelitaarãpa ooruta pùrã mùa jara bùk'a mãik'aapa mù ûraa p'ãpida mù mimiapari Moisemaa, mãgùde jara bùk'a, mãgara mùa israelitaarã jëre–e pait'ee na eujãdeepa, mùa teeit'ee ada ãchi chonaarãmaa.”
9 Mamîda Manasepa ne–inaa k'achia ooda k'aurepa israelitaarãpa oodaamaa p'aneejida Tachi Ak'õrepa jaradak'a. Ma k'ãyaara ne–inaa k'achiara oopachida, ma naawedapema eujãdepemaarãpa oopatap'edaa k'ãyaara, ma k'aurepa Tachi Ak'õrepa mãùrã jërek'ooji mîda mamãik'aapa.
10 Manasepa ma jõma ooda perã, Tachi Ak'õrepa ichi pedee jarapataarã pëiji nãga jaradamerã irumaa, Judadepemaarãmaa: 11 “Manasepa ne–inaa audú k'achia oopari. Ne–inaa k'achiara oopari ma naawedapema Judá eujãde p'anapatap'edaarã, amorreorãpa oopatap'edaa k'ãyaara. Judadepemaarã k'achiade baaipiji ùt'aa t'âpik'ãri ichi ne–inaa juapa oopida k'îrapite. 12 Ma jõma oopari perã, mù israelitaarã Ak'õre Waibùapa nãga jara bù: Mùa ne–inaa audú k'achia ooit'ee Jerusalenmaa, Judá eujãdepemaarãmaa. 13 Auk'a ooit'ee mùa oodak'a Samaria eujãde, Acabdeepa uchiadap'edaarã ome. Ma eujã chi p'uuru ome tro–k'oo bëiit'ee, p'arat'u pi–ia jari barro bùpatak'a sùùdap'eda. 14 Awaraa mùchi p'uurudepemaarã mùa atabaibëiit'ee ãchi k'îra unuamaa iru p'anapataarãpa ãchi net'aa jõmaweda jãri atadamerã mãik'aapa ãchi t'ùmà ateedamerã. 15 Mãga ooit'ee ãchia ne–inaa k'achia oopatap'edaa perã ãchi chonaarã Egipto eujãdeepa uchiadak'ãriipa ârá parumaa.”
16 Manasepa Tachi Ak'õre k'îrapite mãgá ne–inaa audú k'achia ooda awara mãik'aapa Judadepemaarãmaa ma ne–inaa k'achia oopida awara, ichia Jerusalendepemaarã cho–k'ara peepiji, mãùrãpa apidaamaa ne–inaa k'achia ooda–e paji mîda. 17 Awaraa ne–inaa ooda Manasepa, ichia p'ek'au k'achia oopariida ome p'ã bù Crónicas apata librode, awaraa Judadepema reyrãpa oopatap'edaa ome. 18 Manasés piuk'ãri, ùajida ichi palacio ik'aawa ne–uude, eperã Uza ne–uude. Manasés piuda t'êepai chi warra Amón rey beeji.
Amón rey pada Judade
(2 Crónicas 33.21-25)
19 Amonpa veintidós año iru baji rey beek'ãri. Rey paji año omé wãyaaru misa. Mãga nùde Jerusalende bapachi. Chi nawe Jotba p'uurudepema Jaruz k'au paji. T'âjarapachida Mesulémet. 20 Amonpa ne–inaa k'achia oopachi Tachi Ak'õre k'îrapite chi ak'õre Manasepa oopariidak'a. 21 Chi ak'õrepa oopariidak'a auk'a ùt'aa t'âpachi ne–inaa juapa ooda k'îrapite. 22 Ichi chonaarã Ak'õre Waibùade ijãaamaa baji mãik'aapa ooamaa baji irua oopi bùk'a.
23 Rey Amón ek'ari beerã pedeeteedap'eda ichi peedait'ee, peet'aajida ichi palaciode. 24 Mamîda Amón jua ek'ari p'anadap'edaarãpa k'iniada–e paji iru peedamerã. Mapa ma rey peedap'edaarã peek'oojida mãik'aapa Amón warra Josías rey papijida ichi pari.