Rey Ezequías k'ayaa bada
(2 Crónicas 32.24-26; Isaías 38.1-8)
20
1 Maapai Ezequías k'ayaadachi. Mãga k'awak'ãri, Amoz warra Isaías wãji Ezequías ak'ùde mãik'aapa mãgaji:—Tachi Ak'õrepa nãga jara bù: ‘Jarapáde aji, pùchideerãmaa pùa jara k'inia bù pedee pù jai–idaait'ee perã. Na k'ayaadeepa jùpa–e pait'eeda’ aji.
2 Mãga ûrik'ãri, Ezequías p'ùrabaiji ichi k'îra paredmaa ak'ùit'ee. Mãpai nãga ùt'aa iidiji Tachi Ak'õremaa: 3 “Ak'õre Waibùa, mù chupùria k'awaapáde aji. K'irãpapáde aji mùa oopachi pùa oopidak'a mãik'aapa pù t'ãri o–îapipachi.” Mãpai Ezequías jêedachi.
4 Isaías palacio ãuk'idaapa uchiai naaweda, Tachi Ak'õrepa irumaa mãgaji: 5 “Ãpùtee wãpáde aji, mùchi eperãarã rey, Ezequiamaa. Jarapáde aji: ‘Pù chonaa rey David Ak'õre Waibùapa nãga jara bù: Mùa ûriji pùa ùt'aa iidida. Unuji pù tauba. Mapa mùa pù jùpapiit'ee. K'ãima õpee parumaa pù wãi mù tedee. 6 Pù quince año waa chok'ai bait'ee. Mùa pù, Israeldepema p'uuru Jerusalén ome uchiapiit'ee Asiriadepema rey juadeepa. Na p'uuru jâait'ee mùa k'inia bairã mãik'aapa mãga jarada perã mù mimiapari Davidmaa.”
7 Mãpai Isaiapa jaraji Ezequías mimiapataarãmaa higojõ piarsîdamerã mãik'aapa chi piarsîda bùdamerã chi k'ayaa badamãi. Mãgá rey Ezequías jùpa beeji. 8 Maap'eda Ezequiapa iidiji Isaiamaa:
—¿Sãga mùa k'awayama aji, wãara Tachi Ak'õrepa mù jùpapiji mãik'aapa wãara mù iru tedee wãi k'ãima õpee parumaa?
9 Isaiapa p'anauji:
—Nãga k'awayada aji, Tachi Ak'õrepa wãara mãga ooit'ee. ¿K'inia bùk'ã aji, na ak'õrejîru relojdepema jua grado diez nok'ooree wãmerã maa–e pùrã ãpùtee wãmerã?
10 Ezequiapa mãgaji:
—Ichita nok'ooree wãpari perã, mùa k'inia bù grado diez ãpùtee wãmerã.
11 Mãpai Isaiapa ùt'aa iidiji Tachi Ak'õrepa mãga oopimerã. Mãga ooji. Rey Acazpa escalón oopidade ak'õrejîrupa jaure oopari ichita nok'ooree wãpari ãpùtee wãpiji escalón diez parumaa.
Ezequiapa Babiloniadepemaarã auteebaida
(2 Crónicas 32.27-31; Isaías 39.1-8)
12 Maapai Babiloniadepema reypa ûriji Ezequías k'ayaa bada. Mãgà Baladán warra t'âpatap'edaa Merodac Baladán paji. Mãgà reypa ichi ek'ari beerã pëiji k'art'a, net'aa pia ome teenadamerã Ezequiamaa. 13 Irumaa panadak'ãri, Ezequiapa ãchi auteebaiji mãik'aapa ak'ùpiji ichia net'aa pi–ia iru bada: p'arat'a, nêe, k'era pia, aceite pia, arma, ne–inaa awaraa p'e iru bada ome. Ne–inaa jõmaweda ichia p'e iru bada ak'ùpiji ãchimaa. 14 Maap'eda Tachi Ak'õre pedee jarapari, Isaías wãji Ezequiamaa. Iidiji:
—¿Sãmãik'aapa chejidama aji, ma nama nipadap'edaarã? ¿K'ãata jarajidama aji, pùmaa?
Ezequiapa p'anauji:
—T'ùmùùpa chejidada ajida, Babilonia eujãdeepa.
15 Mãpai Isaiapa iidiji:
—¿K'ãata unujidama aji, pù palaciode?
Ezequiapa p'anauji:
—Ne–inaa jõmaweda mùa iru bù ak'ùpijida aji, ãchimaa.
16 Mãpai Isaiapa mãgaji:
—Ûripáde aji, Tachi Ak'õrepa jara bù pùmaa: 17 ‘Ewari cherude ne–inaa jõmaweda pù tede bù; pùa atada mãik'aapa pùchi chonaarãpa atadap'edaa paara Babilonia eujãdepemaarãpa jãri ata chedait'ee. Ma ne–inaa jõmaweda ateedait'ee ãchi todee. 18 Ûk'uru pùdeepa uchiadait'eerã ichiaba ateedait'ee. K'ap'adait'ee mãik'aapa mimiapataarã papidait'ee ãchi rey palaciode.’
19 Ezequiapa mãga ûrik'ãri, mãgaji:
—Pia bùda aji, Tachi Ak'õrepa jarada.
Mãga jaraji k'îsia bada perã mãga p'asa–e pait'ee ichi chok'ai bù misa.
Rey Ezequías jai–idaada
(2 Crónicas 32.32-33)