Judá uchiada Asiriadepema rey Senaquerib juadeepa
(2 Crónicas 32.20-23; Is 37.1-38)
19
1 Ãrapa nepùrùda ûrik'ãri, Ezequiapa ichi p'aru ichiaba jêt'aaji t'ãri p'uapa. Chi ùapata p'aru jâp'eda, wãji Tachi Ak'õre tedee ùt'aa iidide. 2 Maap'eda Ezequiapa pëiji palaciodepema mimiapataarã poro waibùa Eliaquín, reypa ne–inaa oopata p'ãpari Sebna mãik'aapa p'aareerã, chi chonaara p'anù, Tachi Ak'õre pedee jarapari t'âjarapatap'edaa Isaiamaa. Ma Isaías Amoz warra paji. Ma pëidaarã jõmaarã chi–ùapata p'aru jâ p'anajida ak'ùpidait'ee t'ãri p'ua p'anù. 3 Ezequiapa nãgà pedee jaraji ãchia jaradamerã Isaiamaa: “Idi tai k'îsia jõnù Tachi Ak'õrepa tai miapi cheda perã tai k'îra unuamaa iru p'anapataarã juapa. Wêra warra t'oit'ee pak'ãri, juatau wêe beeruk'a, mãga pùk'a tai juatau wêe chitoonù. 4 ¿Pù Ak'õre Waibùapa ûri baji–ek'ã Asiriadepema reypa poro waibùa pëidapa Ak'õre Waibùa ichita chok'ai bù ãpùte pedee k'achia jarak'ãri? Mùa k'inia bù irua ãchi miapimerã ma pedee jarada k'aurepa. Tai chupùria k'awaapáde aji. Ùt'aa iidipáde aji, tai pari, Asiriadepemaarãpa tai jõdai naaweda.”5 Ezequiapa pëidaarãpa mãga jaranajida Isaiamaa. 6 Maap'eda Isaiapa nãga jara pëiji ãchi chiparimaa: “Tachi Ak'õrepa nãga jara bùda aji: ‘P'eranaadapáde aji, Asiriadepema rey ek'ari beerãpa mù ãpùte pedee k'achia jaradap'edaa k'aurepa. 7 ¡Ûrítù! Mùa irumaa pedee jarapiit'ee, mãga ûrip'eda, iru ãpùtee wãmerã ichi todee. Mama piupiit'eeda aji, ichi auk'aarãmaa.’”
8 Maapai ma Asiriadepema poro waibùapa k'awa ataji ichi rey uchiada Laquis p'uurudeepa. Mapa uchiaji Jerusalendeepa iru ome k'îrachuude. Ununaji Libná p'uurude. Ma p'uuru pidaarã ome chõomaa baji. 9 Mama p'anùde Asiriadepema reypa ûriji Etiopiadepema rey Tiracá che baji chõode iru ome. Mapa ichi ek'ari beerã waya pëiji Judade Ezequiamaa. 10 Nãga jara pëiji: “¿Pùchi Ak'õre Waibùapa jara bù–ek'ã aji, Jerusalén baai–e pait'ee mùchi juade? Mamîda k'ûrapinaapáde aji, irumaa. 11 Pùa k'awa bù Asiriadepema reyrãpa oopatap'edaa awaraa eujãdepemaarã ome mãgùùrã jõpi k'inia p'anadak'ãri. Mãga bùta ¿k'îsia bùk'ã parã chok'ai uchiadai mù juadeepa? 12 ¿Awaraa eujãdepemaarã ak'õre waibùa apatap'edaarãpa mãgà eujãdepemaarã k'aripajidak'ã aji, mùchi chonaarãpa jõ wãruta misa Gozán, Jarán, Résef, mãik'aapa Edén pidaarã Telasarde p'anapatap'edaa? 13 Ârá ¿sãma p'anùma aji, Jamatdepema rey, Arfaddepema rey, Sefarvayindepema rey, Henadepema rey mãik'aapa Ivadepema rey?”
14 Ma Asiriadepema reypa pëidaarãpa tee chedap'edaa k'art'a leep'eda, Ezequiapa ateeji Tachi Ak'õre tedee. Mama bùde ma k'art'a ewap'eda, bùji Tachi Ak'õre baaltek'a bù k'îrapite. 15 Mãpai nãga ùt'aa t'âji: “Tachi Ak'õre, pù israelitaarã Ak'õre Waibùa. Pù su–ak'ù beepari ùt'ari bù ùt'aripemaarã querubines esajîak'a. Pù aupaita na p'ek'au eujãdepemaarã jõmaarã Ak'õre Waibùa. Pùa pajã na eujã ome ooji. 16 Pù mãgá jõmaarã k'ãyaara waibùara bairã, ûripáde aji, mù pedee mãik'aapa ak'ùpáde aji, na k'art'ade jara bù. Ûripáde aji, Senaqueribpa jara pëida mùmaa; ma pedee k'achia jarada pù, chi ichita chok'ai bù, ãpùte. 17 Wãara Asiriadepema reyrãpa awaraa eujãdepemaarã ãchi eujã ome jõjida. 18 Mãùrã ak'õre waibùa apatap'edaa bat'ak'oojida t'ùpùtaude paa jõdamerã. Mãga oo p'oyaajida ma ak'õre waibùa apatap'edaa eperã juapa pak'urudee ooda perã maa–e pùrã mãudee ooda perã. 19 Mamîda Tachi Waibùa, pù eperã juapa ooda–epù. Mapa tai k'aripapáde aji, Asiriadepema rey juadeepa. Mãgá na eujãdepemaarã jõmaarãpa k'awaadai pù aupai Tachi Ak'õre Waibùa.”
20 Ma t'êepai Isaiapa nãga jara pëiji Ezequiamaa. “Israelitaarã Ak'õre Waibùapa nãga jara bù: ‘Mùa ûrijida aji, pùa ùt'aa iidida Asiriadepema rey Senaquerib k'aurepa.’ ”
21 Tachi Ak'õrepa nãgà pedee jara pëiji Asiriadepema rey ãpùte.
“Sión p'uurudepemaarã pù ãpùte ëidait'ee pù jirabodok'ãri ãchi p'uurudeepa. Ëidait'ee awêra ùmùk'îra ome waide k'ãi–e bùta ëiparik'a mãik'aapa chi poro mimik'aparik'a k'ûtrãarã oo iru bak'ãri. 22 Pùa Judadepemaarãmaa audua pedee jarak'ãri, ¿k'aimaa ik'achia jara baji? Eperãarãmaa jara–e baji. ¡Israelitaarã Ak'õre Waibùamaata ma pedee jaraji! 23 Pùa pëidaarã k'ap'ùa pari ik'achia pedee jaraji Tachi Ak'õremaa. Mãgaji: ‘Mùa carreta chok'ara iru bùda aji, aùde chõonait'ee. Ma carretade mù wãji Líbano eujãde bù ee nok'odepema pak'uru jêra bùmaa. Ma pak'uru jêra bù pi–ia unuji. Cedro pak'uru ùt'ùara bee mãik'aapa pino pak'uru piara bee t'upeeji. 24 Awaraa eujãde mùa pozo k'oro ataji mãik'aapa madepema pania toji. Mù bùùrù jãde t'ùa bùpa Egiptodepema to chak'e p'oopijida’ aji.
25 Mamîda ¿k'awa–e bùk'ã ma jõma ooji mùta, Jõmaarã Ak'õre Waibùapa mãga oopida perã pùmaa? Chonaarãwedapema mùa mãga k'îsia iru baji oopiit'ee abaamaa. Ârawedapema mãga oopiji pùmaa. Maperã pùa p'uuru murallapa t'ùak'au bù paara jõpiji, mãu–idaa aupai beemerã ma p'anadap'edaamãi. 26 Maperã ma p'uurude p'anapatap'edaarã pù waawee p'anajida mãik'aapa juatau wêe p'aneejida pù chõo chek'ãri ãchi p'anadap'edaamaa. Pùa p'uuru chok'ara mãgá jõpiji ak'õrejîrupa p'ûajara ewaa t'onoda uratùpiparik'a. 27 Mùa unu bù pù bùmãi mãik'aapa ne–inaa jõmaweda pùa oo bù. K'awa bù pùa mù k'îra unuamaa iru bù. 28 K'awa bù pù t'ãri k'achia, audua nipapari jõmaarã k'ãyaara waibùara bù jîak'aapa. Mamîda mùa pù ãpùtee pëiit'ee pùchi eujãdee. Eperãpa argolla bùparik'a sina k'âde maa–e pùrã freno bùparik'a caballo it'aide, mãgá oomerã irua oopiparik'a, mãga pùk'a mùa pùmaa oopiit'ee mùa k'inia bùk'a.”
29 Maap'eda Isaiapa nãga jaraji Ezequiamaa: “Nãga k'await'ee sãapai Tachi Ak'õrepa Asiriadepemaarã jërek'ooit'ee. Na año mãik'aapa apema añode parãpa k'odait'ee trigo ita–aria t'onodadepema. Mamîda aù eerepema año pãchia trigo, uva k'arra ome uudait'ee mãik'aapa madepema k'odait'ee. 30 Judadepemaarã, chi chok'ai uchiadait'eerã na nepùradeepa nejõ bùùrùk'a p'anadait'ee; chi k'arra eujã edú pa bù, nejõ chok'ara chau bù. 31 Chõo p'anadap'eda, Judadepemaarã ûk'uru Jerusalende p'anapataadait'ee. Chi chok'ai uchiarutaarã Sión eede p'anapataadait'ee. Mãga pait'ee Tachi Ak'õre Waibùapa parã k'inia iru bapari perã.
32 “Tachi Ak'õrepa nãga jara bù Asiriadepema rey ãpùte: ‘Iru t'îu–e pait'ee Jerusalén p'uurude. Sia apida trù–e pait'ee mãik'aapa escudo ome chõoda–e pait'ee. Ichiaba ne–inaa pak'urudee ooda–e pait'ee aùdeepa Jerusalén p'uurude t'îudait'ee. 33 Ichi cheda odeta ãpùtee wãit'ee. P'uurude t'îu–e pait'ee. Mù, Jõmaarã Ak'õre Waibùapa mãga jara bù. 34 Mùa na p'uuru jâait'ee mãik'aapa aùde p'anapataarã k'aripait'ee mùa mãga oo k'inia bairã. Ichiaba mãga ooit'ee mãga jarada perã mù mimiapari Davidmaa.’ ”
35 Ma ewateweda Tachi Ak'õrepa ùt'ariipa ángel pëiji Asiriadepemaarã Jerusalén p'uuru wap'ùra iru p'anadap'edaarã jõpimerã. Ciento ochenta y cinco mil Asiriadepemaarã k'iniijida. Tap'eweda mãùrã k'ap'ùa piuda jêra bù unujida. 36 Mãga unuk'ãri, Asiriadepema rey Senaquerib ãpùtee wãji ichi p'uuru Ninivedee. 37 Ma t'êepai ichi ùt'aa t'âmaa bù misa ichi ak'õre waibùa apatap'edaa Nisrocmaa, chi warrarã t'âjarapatap'edaa Adramelecpa, Sarézer ome ichi peet'aajida. Maap'eda mirunajida Ararat eujãde. Senaquerib piuda t'êepai, chi warra Esarjadón rey beeji Asiria eujãde.