Davidpa israelitaarã juasiapida
(1 Crónicas 21.1-17)
24
1 Tachi Ak'õre waya k'îrau beeji israelitaarã ome. Maapai irua David israelitaarã ome k'achiade baaipiji nãga jarak'ãri: “Jõmaweda israelitaarã mãik'aapa Judá ëreerãdepemaarã pù jua ek'ari p'anapata juasiapáde” aji. 2 Rey Davidpa mãga ooji. Chi soldaorã poro waibùa Joabmaa mãik'aapa awaraa soldaorã poro waibùarãmaa nãga jaraji: —Wãdapáde aji, israelitaarã ëreerã eujã chaa; Dan p'uurudeepa Berseba p'uurude parumaa. Ma eujãdepema ùmùk'îraarã soldaorã mimia–it'ee juasiadapáde aji, mùa k'await'ee jõmasaa p'anù.
3 Mamîda Joabpa p'anauji:
—Rey Waibùa, pia bak'aji pù Ak'õre Waibùapa soldaorã pù jua ek'ari p'anùùrã chok'araara papida paara, ewari cherude audú chok'ara uchiadamerã, pù at'ãri chok'ai bù misa. Mamîda, Rey Waibùa, ¿k'ãare–it'ee k'inia bùma aji, na p'uuru pidaarã ùmùk'îraarã juasiadamerã?
4 Mãga iidiji mîda, oojida Davidpa jaradak'a. Mapa Joab awaraa soldaorã poro waibùarã ome rey palaciodeepa uchiajida Israeldepema ùmùk'îraarã soldaorã mimia–it'ee juasiade. 5 Jordán to sîajida mãik'aapa ãchi carpa eebai jêra bùjida Aroer p'uuru k'ait'a. Maadamãiipa mãik'aapa awaraa p'uuru ma eujã jewedaa esajîak'a badamãiipa, Gad ëreerã eujãde norte eeree juasia wãjida, Jazer p'uurude parutamaa. 6 Mamãik'aapa Galaad eujãde wãyaajida, Cades p'uurude parutamaa. Ma p'uuru hititaarã eujãde baji. Mamãik'aapa Dan ëreerã eujãde wãyaadap'eda, p'ùrrabaijida wãdait'ee Sidón p'uurudee. 7 Mamãik'aapa wãjida Tiro p'uurudee soldaorã p'anapatap'edaamãi mãik'aapa wãyaajida heveorã p'uurude, cananeorã p'uurude, uchiarutamaa Judá ëreerã eujã sur eere Néguev apatap'edaa, eujã jewedaade bada Berseba p'uurude. 8 Atane nueve, ewari veinte wãyaarude israelitaarã eujãde nipajida, ùmùk'îraarã juasiamaa. Maap'eda ãpùtee chejida Jerusalendee.
9 Pachedak'ãri, Joabpa reymaa chi p'ãda tee cheji. Soldaorã mimia–it'ee ochocientos mil ùmùk'îraarã espadapa chõo k'awaa beerã paji Israel eujãdepema ëreerã jõmaade. Judá ëreerã eujãde quinientos mil paji. 10 Mamîda ma t'êepai David k'îsia p'ua nâbeeji ma juasiapida k'aurepa. Mapa Tachi Ak'õremaa mãgaji:
—Tachi Ak'õre, mùa p'ek'au audú k'achia oojida aji, mãgá ùmùk'îraarã jõmaweda juasiapik'ãri. Ma ne–inaa k'achia mù, pù mimiaparipa ooda ãyaa bùpáde aji, mùa mãga ooda perã, k'îsia k'awa–ee.
11 Aù norema David p'irabai naaweda, Tachi Ak'õrepa ichi pedee k'awapiji ichi pedee jarapari Gadmaa. Mãgà David ûraapari paji. Irumaa Tachi Ak'õrepa mãgaji:
12 —Wãpáde aji, Davidmaa. Jarapáde aji, mùa iru miapiit'ee, irua ma ne–inaa k'achia ooda perã. Jaráji ne–inaa k'achia õpeedepema irua aba jùrùt'eramerã mùa irumaa ooit'ee.
13 Maap'eda David k'îrapite Gad wãji mãik'aapa iidiji:
—¿K'ãata k'inia bùma aji, Tachi Ak'õrepa pùmaa oomerã, pùa k'achia ooda k'aurepa? ¿K'inia bùk'ã aji, irua jarra pëimerã eujã pù jua ek'ari bùde año õpee wãyaarude, maa–e pùrã pù k'îra unuamaa iru p'anapataarãpa pù jùrùdamerã peedait'ee atane õpee wãyaarude maa–e pùrã irua k'ayaa k'achia eujã pù jua ek'ari bùde pëimerã k'ãima õpee wãyaarude? K'îsiap'eda, nãgaweda jarapáde aji, mùa jaramerã mù pëidamaa.
14 Davidpa p'anauji:
—¿Sãgapù ooima aji, mùa? Eperãarã juade mù baaidai k'ãyaara, piara bù tachi Tachi Ak'õre juade baaidamerã, irua eperãarã chupùria k'awaapari perã.
15 Maperã Israel eujãde Tachi Ak'õrepa k'ayaa k'achia pëiji. Ma ewateweda baripiji mãik'aapa k'ãima õpee taarãji irua jaradak'a. Dan p'uurudeepa Berseba p'uurude parumaa, setenta mil israelitaarã k'iniijida. 16 Tachi Ak'õrepa ángel pëida mãgá eperãarã peemerã Jerusalén p'uuru k'ait'a pak'ãri, Tachi Ak'õre t'ãri p'ua nâbeeji, Jerusalendepemaarã jõpi k'inia–e bada perã. Mapa chi angelmaa mãgaji:
—¡Jãgapaida! aji. ¡Waa peenaapáde! aji.
Irua mãga jara bùde ma ángel jebuseo t'âjarapatap'edaa Arauna eujãde baji, net'a tau chi edeepa ãyaa atapatamãi. 17 Davidpa ma angelpa eperãarã k'ayaapi wã unuk'ãri, Tachi Ak'õremaa mãgaji:
—¡Mùata ne–inaa k'achia oojida! aji. ¡Mù pajipù! ¡Jã eperãarã ovejaaråk'apù p'anù; maarepida ne–inaa k'achia ooda–ee p'anadairã! ¡Mùa chupùria iidi nâbùda aji, pùa ma k'achia pëimerã mùmaa mãik'aapa mùchideerãmaa!
Davidpa altar ooda
(1 Crónicas 21.18–27)
18 Ma ewateweda Gad wãji David k'îrapite mãik'aapa jaraji altar oonamerã jebuseo Arauna apatap'edaa eujãde, net'a tau chi edeepa ãyaa atapatamãi. 19 Aramãgá David wãji oode Tachi Ak'õrepa jaradak'a Gad k'ap'ùa pari. 20 Arauna ichi net'a tau chi edeepa ãyaa atapatamãi baji. Irua unuk'ãri rey David cheru ichi jua ek'ari beerã ome, reymaa wãp'eda, bedabaidachi ichi tau bùùrù eujãde t'õbairumaa 21 mãik'aapa mãgaji:
—Rey Waibùa, ¿sãap'eda mùmaa chejima? aji. Mù pùchi mimiaparipù.
Davidpa p'anauji:
—Mùa pù eujã; na net'a tau edeepa ãyaa atapatamãi neto k'inia bùda aji. Nama altar ooit'eeda aji, mãik'aapa aùde Tachi Ak'õre–it'ee ne–animalaarã paa jõpiit'ee. Mãgapù irua k'ayaa k'achia waa baripi–e pait'eeda aji, mù p'uuru pidaarãmaa.
22 Araunapa mãgaji:
—Rey Waibùa, atapáde aji, eujã pùa k'inia bùta. Mùa p'ak'a nama iru bùda aji, peedap'eda, altarde Tachi Ak'õre–it'ee paa jõpimerã. Nama ichiaba tabla mãik'aapa yugo paraa t'ùpù–it'ee. 23 Rey Waibùa, jõma pùmaa pari teeyada aji. ¡Taawa Tachi Ak'õrepa pia ak'ùyada aji, pùa ooru!
24 Mamîda reypa p'anauji:
—Pù t'ãri pia bùda aji. Mamîda mùa ma jõma neto k'inia bù chi valor pari. Tachi Ak'õre–it'ee p'oyaa ne–animal paa jõpi–eda aji, p'aa–e bù pùrã.
Mãgá Davidpa ma eujã neto ataji chi p'ak'aarã ome. P'arat'a tau cincuenta p'aaji. 25 Mama altar ooji mãik'aapa ma ne–animalaarã peep'eda, Tachi Ak'õre–it'ee paa jõpiji. Ichiaba awaraa ne–animalaarã paaji, jedek'oit'ee arii p'anadap'edaa israelitaarã ome. Tachi Ak'õrepa mãga unuk'ãri mãik'aapa Davidpa ùt'aa iidida israelitaarã pari ûrik'ãri, ma k'ayaa k'achia wêpapiji israelitaarã eujãdeepa.