2
Ya iyaali,
ana gaaʼid naktib leeku al-kalaam da achaan ma taznubu.
Laakin kan naadum minku yaznib,
indina naadum waahid yidaafiʼ leena giddaam Allah Abuuna wa hu Isa al-Masiih wa hu bas al-saalih.
2 Daahu al-gaddam nafsah dahiiye achaan yamha zunuubna.
Wa dahiiytah ma le zunuubna aniina bas laakin le zunuub hana kulla naas al-dunya.
Al-nuur wa l-mahabba
3 Daahu kikkeef niʼakkudu kadar aniina naʼarfu Allah,
al-naadum al-yitaabiʼ wasaaya Allah,
hu bas yaʼarif Allah.
4 Wa l-naadum al-buguul ana naʼarif Allah wa laakin ma yitaabiʼ wasaaya,
hu kaddaab wa l-hagg ma gaaʼid foogah.
5 Wa l-naadum al-gaaʼid yitaabiʼ kalaam Allah,
hu da sahiih ke yihibb Allah tamaam.
Wa daahu kikkeef nagdaro niʼakkudu kadar aniina gaaʼidiin saabtiin foogah,
6 al-naadum al-buguul hu saabit foogah waajib yamchi fi l-dunya misil Isa al-Masiih macha fi l-dunya.
7 Ya akhwaani al-nihibbuku,
ana ma gaaʼid naktib leeku wasiiye jadiide.
La.
Ana naktib leeku al-wasiiye al-gaaʼide min zamaan wa intu iriftuuha min al-awwal.
Wa l-wasiiye di,
hi al-kalaam al-intu simiʼtuuh minnina.
8 Wa laakin sahiih ana naktib leeku wasiiye jadiide wa hagiigitha gaaʼide tinchaaf fi Isa al-Masiih wa tinchaaf fiiku intu achaan al-dalaam bada yufuut wa l-nuur al-sahiih bada yidaawi.
9 Ayyi naadum al-buguul hu gaaʼid fi l-nuur wa yakrah akhuuh,
hu lissaaʼ ma marag min al-dalaam.
10 Laakin al-naadum al-yihibb akhuuh,
hu da gaaʼid saabit fi l-nuur wa ma indah foogah cheyy al-yamurgah min al-derib al-adiil.
11 Wa ayyi naadum al-yakrah akhuuh,
hu gaaʼid fi l-dalaam wa yuruukh fi l-dalaam wa ma baʼarif derbah achaan al-dalaam sadda uyuunah.
Ma tihibbu al-dunya
12 Ya iyaali,
naktib leeku achaan Allah khafar leeku zunuubku be sabab Isa al-Masiih.
13 Ya l-abbahaat,
naktib leeku achaan intu iriftu al-gaaʼid min al-bidaaya.
Ya l-chabaab,
naktib leeku achaan intu khalabtu Ibliis al-chariir.
14 Ya l-iyaal,
katabt leeku achaan iriftu Abuuna.
Ya l-abbahaat,
katabt leeku achaan al-gaaʼid min al-bidaaya iriftuuh.
Ya l-chabaab,
katabt leeku achaan intu gawiiyiin wa kalaam Allah gaaʼid saabit foogku wa khalabtu Ibliis al-chariir.
15 Ma tihibbu al-dunya wa la khumaam al-dunya.
Al-naadum al-yihibb al-dunya ma yihibb Abuuna Allah
16 achaan kulla cheyy al-gaaʼid fi l-dunya misil chahwaat al-jisim wa l-tamaʼ wa l-fachaar ma min Abuuna wa laakin min al-dunya.
17 Al-dunya wa chahwaatha yufuutu wa laakin al-naas al-yisawwu muraadat Allah yiʼiichu ila l-abad.
Adu al-Masiih
18 Ya iyaali,
al-saaʼa al-akhiira badat.
Awwal simiʼtu kadar adu al-Masiih baji wa khalaas udwaan al-Masiih katiiriin jo.
Wa achaan da,
naʼarfu al-saaʼa al-akhiira badat khalaas.
19 Awwal humman fi usutna wa hassaʼ marago minnina laakin be l-sahiih,
awwal kula humman ma akhwaanna.
Kan awwal humman akhwaanna,
humman yagoodu maʼaana.
Wa min marago min usutna da,
bigi waadih leena kadar ma fi naadum waahid ke minhum akhuuna be l-sahiih.
20 Wa laakin intu ma misilhum.
Al-Khudduus antaaku baraka wa l-baraka di antatku gudra wa kulluku induku minnah ilim.
21 Ana naktib leeku ma achaan intu ma iriftu al-hagg.
La.
Ana naktib leeku achaan iriftu al-hagg wa fihimtu kadar ma fi kidib waahid jaayi min al-hagg.
22 Yaatu al-kaddaab ?
Al-kaddaab hu al-naakir al-yuguul Isa zaatah ma al-Masiih.
Ayyi naadum al-misil da,
hu adu al-Masiih.
Hu yankur kadar Allah hu Abu Isa wa yuguul Isa ma Ibn Allah.
23 Ayyi naadum al-buguul Isa ma Ibn Allah,
khalaas Allah ma Abuuh.
Wa l-naadum al-yachhad kadar Isa al-Masiih hu Ibn Allah,
khalaas Allah bigi leyah abuuh.
24 Khallu al-kalaam al-awwal simiʼtuuh minnina yagood saabit fi guluubku.
Kan al-kalaam al-awwal simiʼtuuh yagood saabit fi guluubku,
intu tagoodu fi alaakha saabte maʼa Ibn Allah wa maʼa Allah Abuuh.
25 Wa l-cheyy al-Allah waaʼadaana beyah,
hu al-haya al-abadiiye.
26 Wa l-kalaam da katabtah leeku be sabab al-naas al-yidooru yamurguuku min al-derib al-sahiih.
27 Laakin leeku intu,
al-baraka nazalat foogku min Isa al-Masiih wa gaaʼide maʼaaku wa achaan da,
intu ma hawjaaniin battaan naadum aakhar yiʼallimku.
Al-Ruuh al-Khudduus yiʼallimku be kulla cheyy wa kalaamah sahiih wa hu ma yakdib.
Agoodu saabtiin fi Ibn Allah misil al-Ruuh allamaaku.