Jawaabaat al-Rasuul Yuuhanna
Al-jawaab al-taani
1
Jawaab minni ana al-cheekh leeki inti al-sayyida al-Allah ikhtaaraaki wa le iyaalki* al-nihibbuku fi l-hagg.
Wa ma ana wiheedi nihibbuku.
Kulla l-naas al-baʼarfu al-hagg yihibbuuku.
2 Wa nihibbuku be sabab al-hagg al-gaaʼid saabit foogna wa l-yagood maʼaana ila l-abad.
3 Akiid al-niʼma wa l-rahma wa l-salaam al-jaayiin min Abuuna Allah wa min Ibn Abuuna,
Isa al-Masiih,
yagoodu maʼaana be l-hagg wa be l-mahabba.
4 Ana bigiit farhaan marra waahid wakit lammeet maʼa waahidiin min iyaalki wa chiftuhum maachiin fi l-hagg misil Abuuna amaraana beyah.
5 Ya l-sayyida,
nidoor natlub minki cheyy waahid.
Ma naktib leeki wasiiye jadiide.
Al-wasiiye di simiʼnaaha min al-bidaaya wa hi waajib nirraayado ambeenaatna.
6 Kan nitaabuʼu wasaaya Rabbina,
khalaas da bas al-mahabba.
Wa hi bas al-wasiiye wa hi nafs al-kalaam al-simiʼtuuh min al-awwal wa waajib titaabuʼuuha.
7 Khachchaachiin katiiriin gammo yuruukhu fi l-dunya.
Humman yaabo ma yachhado kadar Isa al-Masiih bigi insaani wakit ja fi l-dunya.
Al-naadum al-yuguul kalaam misil da,
hu khachchaach wa adu al-Masiih.
8 Angarʼu achaan al-ajur al-yaji be sabab amalku ma yiwaddir.
Chiddu heelku achaan talgo ajurku al-kaamil.
9 Ayyi naadum al-ma yagood saabit fi taʼliim al-Masiih wa laakin yiziid fi taʼliim al-Masiih kalaam jadiid,
Allah ma maʼaayah.
Al-naadum al-gaaʼid saabit fi l-taʼliim,
hu bas al-naadum al-Abuuna Allah gaaʼid maʼaayah wa Ibn Allah kula gaaʼid maʼaayah.
10 Kan naadum buguul hu Masiihi wa yaji leeku wa kalaamah ma yiwaafig le l-taʼliim da,
ma tidayyufuuh wa ma tisallumuuh kula.
11 Achaan al-naadum al-yisallimah bigi misil al-naadum al-yiʼaawinah fi amalah al-fasil.