Jawaabaat al-Rasuul Yuuhanna
Mugaddima
Al-hamdulillah, Allah bayyan mahabbitah al-kabiire le l-naas fi Ibnah Isa al-Masiih. Hu bayyanaaha be amalah wa be kalaamah wa khaassatan be mootah fi l-saliib. Wa Allah sawwa al-Masiih masal le l-muʼminiin wa beyah hu yiwassif kikkeef humman waajib yirraayado ambeenaathum.
Wa l-Rasuul Yuuhanna wileed Zabadi raakh maʼa l-Masiih wa hu mawjuud fi bakaan al-saliib wa chaaf al-Masiih wakit hu baʼas min ust al-maytiin. Wa hu katab al-jawaabaat al-talaata dool be gudrat al-Ruuh al-Khudduus wa be izin Allah. Wa hu katabaahum achaan muchkila waahide gammat fi ust al-Masiihiyiin fi l-balad al-hu gaaʼid foogha. Fi naas waahidiin al-buguulu humman muʼminiin wa bado yaabo chahaadat al-rusul le l-Masiih wa yuguulu kalaam chig fi l-Masiih wa mootah. Wa ma yitaabuʼu al-haal al-saalhe al-waajbe le l-muʼminiin.
Wa Yuuhanna katab al-jawaab al-awwal le kulla l-muʼminiin al-gaaʼidiin fi l-balad. Wa l-taani, katabah le kaniisa waahide al-hu yidoor yamchi leeha achaan yichajjiʼ al-akhwaan fi ust al-muchkila di. Wa l-taalit katabah le naadum usmah Khaayus wa hu muʼmin saadikh wa saabit. Wakit al-jawaab al-aam wisil fi hillit Khaayus, al-naadum al-sawwa nafsah masʼuul al-muʼminiin aba ma khiblah. Wa achaan da, al-muʼminiin fi l-hille di ma simʼo kalaam al-Rasuul. Wa achaan da, Yuuhanna katab jawaab wa rassalah le Khaayus wa ooraah kadar hu zaatah yamchi yisallimah wa yikallim le l-muʼminiin.
Wa l-hamdulillah, al-muchkila al-Yuuhanna al-Rasuul dawwar yihillaha antahat min zamaan, laakin fiyah machaakil aakhariin fi ust al-naas wa nafs al-taʼliim indah faayde fi ayyi wakit wa fi ayyi bakaan. Khalli Allah yiʼaawin ayyi naadum al-yagri al-kalaam da achaan yakurbah adiil wa yitabbigah wa yagood saabit fi l-hagg. Aamiin.