Jayyit al-Masiih al-taaniye
3
Ya akhwaani al-nihibbuku,
daahu al-jawaab al-taani al-katabtah leeku.
Wa fi jawaabaati nidoor nizakkirku be l-kalaam al-taʼarfuuh khalaas wa tifakkuru be fikir mukhlis.
2 Fakkuru fi l-kalaam al-anbiya al-saalihiin gaalooh min zamaan wa fakkuru fi wasiiyit Isa Rabbina wa Munajjiina al-simiʼtuuha be waasitat al-rusul al-macho leeku.
3 Wa daahu awwal cheyy al-waajib tafhamooh.
Fi l-zaman al-akhiir chammaatiin yugummu wa yichammutu.
Wa yitaabuʼu chahwaathum bas.
4 Wa yuguulu «
Gaalo Isa baji laakin hu ma ja.
Abbahaatna maato wa min bidaayit al-dunya cheyy khayyar ke ma fiih ».
5 Wa l-naas dool be niiyithum bas niso cheyy waahid maʼruuf wa da hu.
Zamaan Allah kallam kilme wa beeha al-samaawaat kaano wa l-ard anfasalat min al-almi wa l-almi antaaha suuritha.
6 Wa be kilmit Allah di,
al-almi da kharag al-dunya al-gaaʼide fi l-zaman daak wa dammaraaha.
7 Wa be kilmit Allah battaan al-samaawaat wa l-ard al-gaaʼidiin haaliiyan madmuumiin achaan yarjo al-naar.
Allah gaaʼid yahfadhum lahaddi yoom al-Hisaab al-yahlako foogah al-naas al-fasliin.
8 Ya akhwaani al-nihibbuku,
fiyah cheyy waahid maʼruuf al-waajib ma tansooh wa da hu.
Le Allah yoom waahid misil alif sana wa alif sana misil yoom waahid.
9 Wa Allah ma yiʼakhkhir waʼadah.
Al-naas al-buguulu hu akhkhar ma fihmo adiil.
Akheer nuguulu Allah sabuur leeku.
Hu ma yidoor ayyi naadum yahlak.
Hu yidoor kulla l-naas yutuubu.
10 Laakin laabudda yoom Allah yaji be khafla misil jayyit al-sarraag be l-leel.
Wa ajala ke haraka chadiide tinsameʼ wa l-samaawaat yabgo ma fiihum wa l-kawaakib yinhargu.
Wa l-ard wa kulla cheyy al-yisawwuuh foogha yinkachif.
11 Wa kan kulla cheyy yiddammar misil da,
intu waajib tisawwu chunu ?
Waajib tiʼiichu be takhwa wa haal saalhe.
12 Arjo yoom Allah wa itmannu jaytah.
Wa fi l-yoom da,
al-samaawaat yinhargu wa yiddammaro wa l-kawaakib yumuuʼu fi l-hamu.
13 Wa Allah antaana waʼad wa achaan da narjo al-samaawaat al-jadiide wa l-ard al-jadiide wa l-dunya al-taji diik tabga daar al-saalihiin.
Nihaayat al-jawaab
14 Ya akhwaani al-nihibbuku,
da bas al-cheyy al-tarjooh min Allah.
Wa achaan da,
sawwu juhud achaan tiʼiichu be l-salaam giddaamah bala khata wa la eeb.
15 Fakkuru fi l-ruuh al-tawiile hana Rabbina wa aʼarfu kadar hu yiʼakhkhir jaytah achaan al-naas yanjo.
Wa l-kalaam da misil al-kalaam al-akhuuna Buulus al-niriiduuh katabah leeku min al-hikma al-Allah antaaha leyah.
16 Wa hu yihajji be l-kalaam da fi kulla jawaabaatah.
Wa fi kalaam gaaʼid fi jawaabaatah al-tafsiirah ma hayyin.
Wa naas waahidiin al-ma garo wa iimaanhum ma saabit yiʼawwuju kalaamah misil yiʼawwuju kalaam al-kutub al-aakhariin.
Wa be da,
yijiibu le nufuushum al-halaak.
17 Wa leeku intu ya akhwaani al-nihibbuku,
taʼarfu al-kalaam da min awwal.
Wa achaan da,
awʼu baalku wa ma tikhallu kidib al-aasiyiin yiwaddiiku fi deribhum wa yitallif iimaanku al-saabit.
18 Laakin abgo gawiiyiin fi niʼmat Rabbina Isa al-Masiih Munajjiina wa be irfitku leyah.
Wa l-Masiih,
khalli yimajjuduuh fi l-wakit al-haadir wa fi l-aakhira.
Aamiin.