Jawaabaat al-Rasuul Yuuhanna
Kalaam al-haya
1
Al-kalaam al-niballukhuuh leeku gaaʼid min al-bidaaya wa aniina simiʼnaah wa chifnaah be uyuunna lahaddi irifnaah adiil ke wa lammasnaah be iideenna wa hu kalaam al-haya.
2 Al-haya baanat wa chifnaaha wa chahadna leeha.
Wa niballukhu leeku al-haya al-abadiiye al-awwal gaaʼide maʼa Abuuna Allah wa baanat leena.
3 Wa l-cheyy al-chifnaah wa simiʼnaah aniina niballukhuuh leeku achaan nidooru intu kula tukuunu maʼaana fi l-alaakha.
Wa l-alaakha al-indina di,
hi alaakha maʼa Abuuna Allah wa maʼa Ibnah Isa al-Masiih.
4 Wa naktubu leeku al-kalaam da achaan al-farah al-kullina indina yabga kaamil.
Amchu fi l-nuur
5 Wa daahu al-khabar al-simiʼnaah minnah wa niballukhuuh leeku,
Allah hu nuur wa fi Allah abadan ma fi dalaam.
6 Wa kan aniina maachiin fi l-dalaam wa nuguulu indina alaakha maʼa Allah,
aniina kaddaabiin wa ma maachiin fi l-hagg.
7 Wa laakin kan aniina maachiin fi l-nuur misil hu zaatah fi l-nuur,
niʼakkudu al-alaakha al-indina ambeenaatna wa damm Isa Ibnah yitahhirna min kulla zunuub.
8 Wa kan naadum minnina buguul hu ma indah zunuub,
hu khachcha nafsah wa l-hagg abadan ma gaaʼid fiyah.
9 Wa Allah hu saadikh wa aadil wa kan niʼtarufu be zunuubna,
hu yakhfir leena zunuubna wa yitahhirna min kulla khata.
10 Wa kan nuguulu aniina ma aznabna,
nisawwu Allah kaddaab wa kalaamah ma gaaʼid foogna.