Iyaal Allah
3
Chiftu kikkeef Abuuna yihibbina ?
Mahabbat Allah leena kabiire bilheen wa be sababha hu yinaadiina iyaalah.
Wa sahiih bigiina iyaal Allah.
Naas al-dunya ma irifoona achaan ma irifo Allah.
2 Ya l-mahbuubiin,
hassaʼ haaliiyan aniina iyaal Allah.
Wa l-cheyy al-nabgo baʼadeen,
Allah lissaaʼ ma bayyanah leena.
Laakin naʼarfu kadar wakit Ibn Allah yibiin battaan,
nichiifuuh hu zaatah be nafsah wa aniina nabgo mislah.
3 Wa ayyi naadum al-indah acham misil da foog al-Masiih,
yitahhir galbah tamaam misil Ibn Allah hu taahir.
4 Ayyi naadum al-gaaʼid yaznib,
hu yikhaalif wasaaya Allah.
Al-zanib hu zaatah mukhaalafat wasaaya Allah.
5 Iriftu kadar Ibn Allah baan achaan yamha zunuubna.
Wa foogah hu,
zanib ma fiih abadan.
6 Kan naadum gaaʼid saabit foogah,
hu ma yisawwi zanib.
Wa ayyi naadum al-yisawwi zunuub,
hu abadan ke ma chaafah wa la irifah.
7 Ya iyaali,
ma tikhallu naadum waahid yukhuchchuku.
Al-naas al-yisawwu amal saalih humman al-saalihiin misil Ibn Allah hu saalih.
8 Wa ayyi naadum al-gaaʼid yisawwi zunuub,
hu hana Ibliis achaan Ibliis gaaʼid yaznib min al-bidaaya.
Wa khalaas Ibn Allah ja fi l-dunya achaan yakhrib amal Ibliis kulla ke.
9 Al-naas al-bigo iyaal Allah ma yaznubu achaan tabiiʼat Allah gaaʼide fooghum.
Ma yagdaro yaznubu achaan bigo iyaal Allah.
10 Wa naʼarfu yaatumman iyaal Allah wa yaatumman iyaal Ibliis be l-cheyy al-yisawwuuh.
Kulla l-naas al-ma yitaabuʼu al-haal al-saalhe,
humman ma iyaal Allah misil al-naas al-ma yihibbu akhwaanhum.
Arraayado ambeenaatku
11 Daahu al-kalaam al-simiʼtuuh min al-bidaaya,
waajib nirraayado ambeenaatna.
12 Waajib ma nabgo misil Gaabiil*.
Hu naadum hana Ibliis al-chariir wa katal akhuuh.
Wa maala katalah ?
Hu katalah achaan hu zaatah gaaʼid yisawwi al-fasaala wa laakin akhuuh gaaʼid yisawwi al-kheer.
13 Ya akhwaani,
ma tiʼajjubu kan naas al-dunya yakrahooku.
14 Kan nirraayado ambeenaatna,
da bas al-daliil al-yiʼakkid kadar maragna min haalat al-moot wa dakhalna fi haalat al-haya.
Ayyi naadum al-ma yihibb akhwaanah yagood fi l-moot.
15 Wa ayyi naadum al-yakrah akhuuh,
hu kattaal dimme wa taʼarfu kadar kan naadum kattaal dimam,
al-haya al-abadiiye ma gaaʼide foogah.
16 Isa al-Masiih fadaana be ruuhah wa da bas wassaf leena chunu al-mahabba.
Wa khalaas waajib nihibbu akhwaanna lahaddi nafdoohum be ruuhna.
17 Kan naadum indah maal al-dunya wa yichiif akhuuh taʼbaan wa yisidd eenah wa ma yisaaʼidah,
kikkeef nuguulu mahabbat Allah gaaʼide fiyah ?
18 Ya iyaali,
khalli ma nirraayado be kalaam khuchuumna bas laakin khalli nirraayado be l-fiʼil wa be l-mahabba al-sahiihe.
Damaanna giddaam Allah
19 Wa kan niriidu akhwaanna,
be misil da naʼarfu aniina naas hana l-hagg.
Wa be l-fikir da,
guluubna yagoodu fi l-damaan giddaam Allah.
20 Kan guluubna yuluumuuna fi ayyi cheyy,
Allah hu akbar min guluubna wa hu yaʼarif kulla cheyy.
21 Ya l-mahbuubiin,
kan guluubna ma yuluumuuna fi ayyi cheyy,
aniina indina al-damaan giddaam Allah.
22 Wa nalgo min Allah ayyi cheyy al-nasʼalooh minnah achaan nitaabuʼu wasaayaah wa nisawwu al-cheyy al-yarda beyah.
23 Wa diihi wasiiytah,
waajib niʼaamunu be usum Ibnah Isa al-Masiih wa nirraayado ambeenaatna misil hu amaraana beyah.
24 Kulla l-naas al-yitaabuʼu wasaayaah gaaʼidiin saabtiin foogah wa hu gaaʼid saabit fooghum.
Wa naʼarfu akiid kadar hu gaaʼid saabit foogna wa da naʼarfuuh min al-Ruuh al-Khudduus al-hu nazzalah foogna.