4
Wa be misil da,
taʼarfu kadar al-Masiih ligi taʼab fi jismah.
Wa gawwu nufuusku be fikir misil fikrah achaan al-naadum al-khibil taʼab al-jisim,
khalla minnah al-zunuub marra waahid.
2 Wa hu ma yidoor yitaabiʼ chahwat al-naas battaan,
laakin yidoor yitaabiʼ muraadat Allah tuul al-wakit al-faddal leyah fi l-dunya.
3 Al-wakit al-intu sawweetu foogah al-zunuub al-yisawwuuhum al-naas al-ma baʼarfu Allah,
kammal khalaas.
Battaan ma tigabbulu foogah.
Humman yitaabuʼu al-fasaad wa chahwaathum al-cheeniin wa l-sakar wa haflaat al-zina wa l-safaaha.
Wa yaʼabudu al-asnaam al-Allah harramaahum.
4 Wa humman yiʼajjubu minku achaan ma tulummu maʼaahum fi fasaadhum al-ma indah hadd wa achaan da yiʼayyuruuku.
5 Laakin fi l-akhiir Rabbina yihaasibhum fi fiʼilhum.
Hu jaahiz achaan yihaasib al-hayyiin wa l-maytiin.
6 Wa achaan da bas,
al-bichaara ballakhooha le l-naas al-hassaʼ maytiin.
Wa kan hakamoohum be l-moot fi l-dunya misil al-naas kula,
yahyo be l-Ruuh al-Khudduus giddaam Allah.
Al-Masʼuuliiye al-akhawiiye
7 Kumaalit kulla cheyy gariib.
Achaan da,
khuttu baalku wa agoodu saabtiin daayman achaan tagdaro tisallu fi ayyi wakit.
8 Gubbaal kulla cheyy,
arraayado ambeenaatku be mahabba chadiide achaan al-indah mahabba yisaamih ziyaada le l-naas al-yakhto foogah.
9 Khalli ayyi naadum minku yifaddil akhwaanah al-yaju leyah wa ma yachki.
10 Allah anta ayyi naadum minku gudra achaan yakhdim beeha le akhwaanah.
Wa khalli ayyi naadum yichiil masʼuuliitah fi niʼmat Allah al-gaaʼide tisawwi ambeenaatku khidme chig chig.
11 Masalan,
ayyi naadum al-yikallim le l-akhwaan fi l-malamma,
khalli yikallim leehum be kalaam Allah.
Wa ayyi naadum al-yiʼaawin al-akhwaan,
khalliih yiʼaawinhum be l-gudra al-Allah antaaha leyah.
Wa khalli kulla cheyy al-tisawwuuh be Isa al-Masiih yimajjid Allah.
Wa l-majd wa l-muluk waajib leyah hu daayman wa ila l-abad.
Aamiin.
Chaarikiin fi taʼab al-Masiih
12 Ya akhwaani al-nihibbuku,
ma tiʼajjubu min al-taʼab al-chadiid al-yaji foogku achaan yijarribku.
Ma tuguulu da cheyy ma maʼruuf ja foogku.
13 Intu gaaʼidiin tichaaruku fi taʼab al-Masiih wa achaan da,
afraho fi ust al-taʼab.
Wa kan chaaraktu fi taʼab al-Masiih da,
tafraho farha chadiide wakit hu yibiin be gudurtah al-majiide.
14 Kan al-naas yiʼayyuruuku achaan intu naas al-Masiih kula,
induku baraka achaan Ruuh Allah al-majiid gaaʼid foogku.
15 Wa khalli naadum minku abadan ma yitaʼʼubuuh be sabab katil dimam walla sirge walla jariime walla dakhiliin fi chuʼuun al-naas.
16 Wa laakin kan yitaʼʼubuuh achaan hu Masiihi bas,
khalli ma yakhjal.
Fi badalah,
khalli yimajjid Allah achaan al-naas jaʼalooh naadum hana l-Masiih.
17 Achaan al-wakit tamma wa l-hisaab yabda.
Wa akiid yabda foog naas beet Allah.
Wa kan al-hisaab yabda foogna aniina al-muʼminiin,
yabga kikkeef le l-naas al-abo ma taabaʼo bichaarat Allah ?
18 Wa <Kan yabga gaasi le l-naadum al-saalih le yalga al-naja,
kikkeef yabga le naadum al-fasil wa le l-muznib ?>.
19 Wa be misil da,
khalli al-naas al-yatʼabo hasab muraadat Allah yisawwu daayman al-kheer wa yatwakkalo ale khaalighum al-saadikh.