Jawaab Yaakhuub
Mugaddima
Allah rassal al-Masiih achaan yinaadi kulla al-naas yadkhulu fi derib al-iimaan. Wa taʼliim hana Jawaab Yaakhuub yihajji be l-haal al-waajbe le l-muʼminiin. Hu yihajji leehum be l-fikir al-waajib fi l-taʼab wa l-tajriba. Hu yiʼallimhum be lisaan al-insaan al-bisabbib machaakil katiiriin. Wa kan naadum muʼmin, hu waajib yalzam lisaanah. Hu yuguul leehum kadar al-machaakil al-yugummu ambeen al-naas yaju min al-fasaala al-gaaʼide fi guluubhum. Wa taʼliimah fi haal al-muʼmin da jaayi min taʼliim al-Masiih zaatah.
Sayyidna Yaakhuub katab jawaabah le kulla l-muʼminiin al-gaaʼidiin fi ayyi bakaan. Hu irif kadar fi waktah da, katiiriin minhum masaakiin wa hu dawwar yichajjiʼhum. Hu zakkaraahum kadar fikir Allah ma misil fikir al-naas. Allah abadan ma yichiif siyaad al-maal akheer min al-masaakiin wa ayyi naadum waajib yimaskin nafsah giddaam Allah.
Wa Yaakhuub hu akhu Isa al-Masiih. Hu ma muʼmin be l-Masiih wakit Isa gaaʼid fi l-dunya laakin aaman beyah wakit Isa baʼas min ust al-maytiin (1 Kuruntus 15:7). Hu bigi cheekh muhimm ambeen al-muʼminiin fi Madiinat al-Khudus wa usmah tarooh fi Amal al-Rusul 15:13 wa 21:18 wa battaan fi Khalaatiya 1:19. Wa hu katab al-jawaab da be izin Rabbina wa be gudrat al-Ruuh al-Khudduus.
Fi l-jawaab da, Yaakhuub gaal <kan naadum yukhutt baalah adiil fi l-wasaaya al-yantuuna al-hurriiye wa yinkarib fooghum wa ma yasmaʼhum le yansaahum wa yitabbighum, al-naadum da Allah yibaarikah fi kulla cheyy al-bisawwiih>. Wa l-kalaam da muwaafig le ayyi naadum al-yagri al-jawaab da. Aamiin.