Jawaab Yaakhuub
1
Jawaab minni ana Yaakhuub abid Allah wa abid Rabbina Isa al-Masiih.
Wa nirassilah leeku intu ummat Allah al-muchattatiin fi kulli bakaan.
Al-salaam aleekum.
Al-sabur fi l-taʼab wa l-iimaan al-saabit
2 Ya akhwaani,
afraho fi ayyi taʼab al-yajiiku
3 achaan taʼarfu kadar al-taʼab yijarrib iimaanku wa kan gaʼadtu saabtiin fi ust al-taʼab,
tabgo naas sabuuriin.
4 Wa khalli saburku yabga tamaam achaan beyah tabgo kaamiliin wa gaadriin fi ayyi haal wa ma fi cheyy yigassir leeku.
5 Kan naadum minku fikir gassar leyah,
khalli yatlubah min Allah wa Allah yantiih achaan Allah yanti le kulla l-naas be ziyaada be juud wa bala kalaam.
6 Wa khalli yatlubah be iimaan saabit wa bala chakak.
Naadum kan yichakkik,
hu misil al-challaal al-fi l-bahar al-riih tichiilah wa tihizzah.
7 Naadum misil da,
khalli ma yukhutt fi aglah kadar yalga cheyy min Rabbina
8 achaan al-naadum da galbah itneen wa hu ma saabit fi ayyi cheyy al-bisawwiih.
Siyaad al-maal wa l-masaakiin
9 Al-muʼmin al-miskiin,
khalli yafrah achaan Allah darrajah.
10 Wa l-muʼmin al-siid al-maal kula,
khalli yafrah achaan hu maskan nafsah giddaam Allah.
Wa siyaad al-maal ma yitawwulu misil al-gechch.
11 Kan al-harraay talaʼat wa bigat haamiye bilheen,
hi tutugg al-gechch wa l-gechch da yabga asfar wa yaybas wa yumuut.
Be misil da bas,
siyaad al-maal kula yumuutu fi usut khidmithum wa yabgo ma fiihum.
Al-tajriba wa l-zunuub
12 Mabruuk le l-naadum al-yasbur fi l-taʼab al-yijarrib iimaanah.
Achaan wakit al-tajriba di kammalat khalaas,
hu yalga baraka kabiire.
Wa l-baraka di,
hi al-haya al-Allah waaʼad beeha al-naas al-yihibbuuh.
13 Kan naadum yidoor yaznib,
khalli ma yuguul «
Allah gaaʼid yilizzini fi l-zunuub ».
Achaan abadan ma fi cheyy yilizz Allah fi l-zanib wa Allah hu abadan ma yilizz naadum fi l-zanib.
14 Laakin kan naadum yidoor yaznib,
chahwatah bas gaaʼide tilizzah achaan al-zanib bigi leyah halu.
15 Wa l-chahwa hi misil mara al-takhlab wa talda sakhiir.
Al-chahwa kula takhlab wa sakhiirha hu al-zanib.
Wa l-zanib kan khalaas kibir yisabbib al-moot.
16 Ya akhwaani al-nihibbuku,
ma tukhuchchu nufuusku.
17 Kulla cheyy al-adiil wa kulla cheyy al-tamaam jaayi min Allah bas wa yanzil min Allah khaalig al-nuur.
Al-wata tikhayyir,
tabga leel wa nahaar,
laakin Allah abadan ma yikhayyir wa ma indah dalaam.
18 Be waasitat kalaam al-hagg,
Allah antaana al-haya al-jadiide be niiyitah hu achaan aniina nabgo giddaam kulla cheyy al-hu khalagah.
Tabbigiin kalaam Allah
19 Ya akhwaani al-nihibbuku,
fakkuru sameh.
Khalli ayyi naadum yabga daayman jaahiz achaan yasmaʼ.
Khalli ma yugumm ajala yihajji wa ma yazʼal ajala
20 achaan naadum kan zaʼlaan ma yisawwi al-amal al-saalih al-Allah bidoorah.
21 Achaan da,
khallu minku kulla cheyy al-yinajjisku wa kulla cheyy al-fasil wa akhbalo be maskana al-kalaam al-Allah khattah fi guluubku.
Al-kalaam da indah gudra achaan yinajjiiku.
22 Tabbugu kalaam Allah wa ma tasmaʼooh saakit.
Kan tasmaʼooh bas wa ma titabbuguuh,
intu tukhuchchu nufuusku.
23 Kan naadum simiʼ kalaam Allah wa ma tabbagah,
hu yabga misil naadum al-yichiif wijhah fi amchawwaafa
24 wa yichiif kikkeef wijhah wa khalaas yamchi wa tawwaali ke yansaah.
25 Wa laakin kan naadum yukhutt baalah adiil fi l-wasaaya al-yantuuna al-hurriiye wa yinkarib fooghum wa ma yasmaʼhum le yansaahum wa yitabbighum,
al-naadum da Allah yibaarikah fi kulla cheyy al-bisawwiih.
26 Al-naadum al-buguul hu yitaabiʼ adiil al-diin wa laakin ma yalzam lisaanah,
hu da gaaʼid yukhuchch nafsah wa diinah ma yanfaʼ.
27 Daahu al-diin al-mukhlis al-ma indah eeb giddaam Abuuna Allah,
aawunu al-ataama wa l-awiin al-rujaalhin maytiin al-gaaʼidaat fi l-taʼab wa agiifu baʼiid min al-achya al-yinajjusu naas fi l-dunya.