Al-haal al-waajbe
13
Agoodu saabtiin fi l-mahabba al-akhawiiye.
2 Ma tikhallu minku faddiliin al-diifaan al-yajuuku.
Taʼarfu kadar naas waahidiin dayyafo malaaʼika wa ma irifoohum.
3 Fakkuru fi akhwaanku al-gaaʼidiin fi l-sijin wa ajʼalo nafisku misil gaaʼidiin maʼaahum.
Wa akhwaanku al-gaaʼidiin yahmalo al-taʼab,
fakkuru fooghum achaan jisimhum misil jisimku.
4 Kulluku ihtarumu al-akhiide.
Ma tikhallu al-zina yinajjis saraayirku al-zawjiye achaan taʼarfu kadar Allah yihaasib kulla l-zannaayiin,
kan maakhdiin walla ma maakhdiin.
5 Angarʼu min hubb al-maal wa abgo radyaaniin be l-induku achaan Allah gaal <Abadan ma nikhalliik wa ma nansaak>.
6 Achaan da,
kullina nagdaro nuguulu bala chakak <Al-yisaaʼidni hu Allah.
Achaan da,
ma nakhaaf.
Al-insaan yagdar yisawwi leyi chunu ?>.
7 Fakkuru adiil fi kubaaraatku al-awwal ballakho leeku kalaam Allah.
Fakkuru fi haalhum,
fi l-haya wa fi l-moot.
Khalli iimaanku yabga misil iimaanhum.
8 Isa al-Masiih abadan ma yilkhayyar.
Hu gaaʼid min awwal wa l-yoom wa ila l-abad.
9 Ma tikhallu al-naas al-jaayiin be taʼaaliim ajiibiin aw chig chig yiwadduuku fi derib aakhar.
Akheer galib al-insaan yalga gudra min niʼmat Allah bas wa ma min al-akil al-khaass.
Wa l-naas al-taabaʼo al-taʼliim da,
ma ligo minnah faayde.
10 Al-dahiiye al-aniina nichaaruku foogha di,
rujaal al-diin al-yakhdumu fi kheemat al-ibaada ma induhum hagg yaakulu minha.
11 Achaan raajil al-diin al-kabiir yadbah bahaayim dahiiye le l-zunuub wa yijiib al-damm fi l-Bakaan al-Mukhaddas.
Laakin laham al-bahaayim dool,
yimarruguuh barra min al-mukhayyam wa yiharruguuh.
12 Wa achaan da,
Isa kula marag wa tiʼib barra min al-madiina achaan yisawwi al-chaʼab khaass le Allah be daffigiin dammah hu.
13 Achaan da,
khalli namurgu wa namchu leyah barra min al-mukhayyam wa nahmalo nafs al-muʼyaar al-hu himlah.
14 Achaan hini fi l-ard ma indina madiina al-titawwil laakin aniina gaaʼidiin nukhuttu baalna fi l-madiina al-taji baʼadeen.
Al-ibaada al-Allah yarda beeha
15 Fi badal al-dahiiye hana al-bahaayim,
khalli naʼabudu Allah be derib Isa wa nigaddumu le Allah daayman dahiiyit al-chukur maʼanaatha al-chukur al-jaayi min al-naas al-yachhado Allah.
16 Sawwu daayman al-kheer wa assaaʼado ambeenaatku achaan di bas al-ibaada al-Allah yarda beeha.
17 Asmaʼo kubaaraatku wa taabuʼu kalaamhum adiil.
Achaan humman gaaʼidiin yifakkuru foogku wa yaʼarfu kadar humman masʼuuliin minku giddaam Allah al-yihaasibhum.
Khalli khidmithum di tabga leehum farha.
Kan tabga leehum gaasiye,
intu kula ma talgo minha faayde.
Nihaayat al-jawaab
18 Asʼalo Allah leena.
Aniina muʼakkidiin kadar niiyitna mukhlisa wa nidooru nitaabuʼu haal adiile fi kulla cheyy.
19 Wa battaan natlubu minku be ziyaada,
asʼalo leyi ana achaan Allah yirassilni leeku fi wakit gariib.
20 Wa khalaas,
Allah Rabb al-salaam baʼas min ust al-maytiin Rabbina Isa al-bigi raaʼi kabiir hana khanam Allah be sabab damm al-muʼaahada al-abadiiye.
21 Wa khalli Allah yijahhizku be kulla cheyy al-adiil achaan tisawwu muraadaatah wakit hu gaaʼid yisawwi foogku kulla cheyy al-hu yarda beyah be waasitat Isa al-Masiih.
Wa l-hamdulillah daayman wa ila l-abad.
Aamiin.
22 Ya akhwaani,
nachhadku achaan tasmaʼo be sabur al-kalaam al-nirassilah leeku le nichajjiʼku.
Katabt leeku kalaam chiyya bas.
23 Nidoor intu taʼarfu kadar akhuuna Timuutaawus talagooh min al-sijin wa kan hu yaji leyi ajala,
namchu leeku maʼaayah wa nichiifuuku.
24 Sallumu kulla kubaaraatku wa kulla l-saalihiin.
Al-akhwaan al-min Itaaliya yisallumuuku.
25 Aleeku kulluku rahmat Allah.
Aamiin.