Masal hana juhud Isa
12
Wa fi l-kalaam da,
indina chuhuud katiiriin bilheen al-yachhado leena min ayyi jiihe.
Achaan da,
khalli nikhallu minnina kulla cheyy al-yiwaggifna wa kulla zanib al-yidoor yakrubna.
Wa khalli namchu giddaam bala kasal misil naas fi sabag lahaddi nihaayat al-derib al-aniina jaariyiin foogah.
2 Khalli nukhuttu baalna fi Isa al-fatah leena derib al-iimaan wa kammalah.
Min baʼiid,
hu chaaf al-farah al-gaaʼid giddaamah wa be da,
himil taʼab al-saliib wa ma fakkar fi l-eeb al-khattooh foogah.
Wa hassaʼ hu gaaʼid jamb arch Allah fi nussah al-zeenaay.
3 Fakkuru foogah hu,
al-himil al-bukhud al-chadiid hana l-muznibiin.
Fakkuru foogah achaan intu ma tabgo kaslaaniin wa la khawwaafiin.
4 Intu gaʼadtu saabtiin be juhud chadiid fi ust al-muznibiin laakin lahaddi hassaʼ lissaaʼ ma daffago dammuku.
Al-addibiin al-yaji min Allah
5 Hal nisiitu wasiiyit Allah al-tuguul intu awlaadah ?
<Ya wileedi,
kan Allah gaaʼid yiʼaddibak,
khutt baalak wa kan hu yaharjak,
ma taksal.
6 Achaan Allah yiʼaddib al-naadum al-yiriidah wa yudugg ayyi wileed al-hu khiblah>.
7 Al-taʼab al-intu tasburu foogah waajib leeku fi chaan al-addibiin.
Allah yiʼaamilku misil raajil yiʼaamil iyaalah.
Ween al-wileed al-abuuh ma yiʼaddibah ?
8 Kan al-addibiin al-yaji foog kulla l-iyaal min abbahaathum ma yaji foogku,
khalaas intu ma awlaad abuuku da,
intu furuukh.
9 Fakkuru battaan.
Ayyi naadum minnina indah abu insaani al-addabah wa abbahaatna dool aniina nikarrumuuhum.
Wa da yiʼakkid leena be ziyaada kadar waajib nakhbalo addibiin Allah Abuuna al-samaawi wa beyah nahyo.
10 Achaan abbahaatna addaboona addibiin al-humman yardo beyah le mudda gisayre.
Laakin Allah yiʼaddibna le faayditna achaan nabgo naasah al-saalihiin.
11 Fi l-wakit al-haali,
kulla addibiin gaasi leena wa ma yantiina farah.
Laakin baʼadeen,
al-naas al-darraboohum be addibiin yalgo minnah al-salaam wa l-haal al-saalhe.
12 Achaan da,
khallu minku al-kasal.
Gawwu iideenku wa rijileenku al-ma induhum gudra.
13 Addulu al-derib al-turuukhu foogah achaan al-rijil al-tawjaʼku tabra wa ma tamrug.
Masal Isuu
14 Sawwu juhud achaan tiʼiichu be l-salaam maʼa kulla l-naas wa iichu be haal saalhe al-balaaha ma fi naadum yichiif Rabbina.
15 Awʼu baalku achaan naadum minku ma yadhar nafsah min niʼmat Allah.
Awʼu baalku achaan naadum ambeenaatku ma yitallif nafsah wa yitallif al-jamaaʼa misil hu chadara fi usutku al-iyaalha induhum samm.
16 Awʼu baalku achaan naadum ma yabga zannaay walla misil Isuu al-isi Allah.
Hu baaʼ hagg al-bukuuriiye fi chaan akle waahide bas.
17 Wa taʼarfu kadar baʼadeen hu dawwar yalga al-baraka wa laakin abuuh abaah.
Wakt al-tooba faat khalaas wa Isuu ma ligi al-baraka hatta kan hu talabaaha be baki kula.
Siinaaʼ wa Sahyuun
18 Khuttu baalku achaan al-hajar al-intu jiitu giddaamah da,
ma al-hajar al-naas yagdaro yalmasooh.
Hu ma al-hajar al-gaaʼidiin foogah naar mugargire wa dalaam azrag wa riih chadiide.
19 Wa l-hajar hana l-wakit daak ansamaʼ foogah hiss al-buug wa l-hiss al-kalaamah khawwaf al-chaʼab lahaddi al-naas al-simʼooh chahado achaan ma yihajji leehum battaan.
20 Achaan al-amur al-Allah amaraahum beyah gaasi leehum wa ma himlooh.
Hu gaal kadar al-yalmas al-hajar waajib yarjumuuh,
hatta kan bahiime kula.
21 Aywa,
al-cheyy al-chaafooh khawwafaahum marra waahid lahaddi Muusa kula gaal «
Ana gaaʼid narjif min al-khoof ».
22 Laakin al-hajar al-intu jiitu giddaamah,
hu Jabal Sahyuun al-gaaʼide foogah madiinat Allah al-Hayy al-hi Madiinat al-Khudus al-samaawiiye.
Jiitu giddaam al-malaaʼika al-ma binhasubu min al-katara al-laammiin le l-ibaada.
23 Wa jiitu giddaam jamaaʼat awlaad al-bikir al-asaameehum musajjaliin fi l-sama.
Wa jiitu giddaam Allah al-yihaasib kulla l-naas.
Wa jiitu giddaam al-saalihiin al-Allah sawwaahum kaamiliin.
24 Wa jiitu giddaam Isa wasiit hana l-muʼaahada al-jadiide wa giddaam dammah al-marchuuch al-yikallim leena kalaam akheer min kalaam damm Haabiil.
25 Awʼu baalku achaan ma taabo al-yikallim leeku.
Achaan kan naas al-zamaan ma nijo wakit abo ma taabaʼo kalaam Muusa al-hazzarhum fi l-ard,
kikkeef aniina nanjo kan naabo kalaam al-yihazzirna min al-sama ?
26 Awwal hissah hazza al-ard wa hassaʼ hu waaʼadaana wa gaal <Marra waahide battaan,
nihizz al-ard wa nihizz maʼaaha al-sama kula>.
27 Wa l-kalaam da «
Marra waahide battaan »
yiwassif be kalaam waadih al-khaliige tinhazza wa tinrafiʼ.
Wa be da,
al-ma yinhazza bas yifaddil.
28 Wa khalaas,
khalli nachkuru Allah achaan hu gaaʼid yantiina mamlaka saabte al-ma tinhazza.
Wa khalli naʼabudu Allah be l-ibaada al-yarda beeha saajidiin giddaamah be takhwa.
29 Achaan Allah al-naʼabuduuh da,
hu misil naar al-tahrig kulla cheyy.