Wasaaya le l-awiin wa le l-rujaal
3
Wa leekan intan al-awiin kula,
khalli ayyi mara tasmaʼ adiil kalaam raajilha.
Wa kan fiyah rujaal al-ma gaaʼidiin yitaabuʼu kalaam Allah,
akuun haal adiile hana awiinhum tijiibhum fi derib Allah bala kalaam
2 achaan yichiifu fooghin al-takhwa wa l-haal al-saalhe.
3 Ma tinkariban fi l-jamaal al-barraani misil al-muchaat wa ziina hana l-dahab wa l-lubaas al-sameh.
4 Fi badalah inkariban fi l-jamaal al-dakhlaani wa hu jamaal al-galib al-baarid wa haadi.
Wa hu misil hajar khaali al-abadan ma yatlaf wa khiimtah kabiire giddaam Allah.
5 Wa misil da bas,
zamaan al-awiin al-saalhaat al-achamhin saabit fi Allah jammalan nufuushin wa simʼan adiil kalaam rujaalhin.
6 Wa misil da,
Saara simʼat kalaam Ibraahiim wa naadatah «
sayyidi ».
Wa hassaʼ kan tisawwan al-kheer wa ma tikhallan ayyi khoof yakrubkan,
intan tabgan banaatha.
7 Wa leeku intu al-rujaal kula,
khalli ayyi raajil yagood maʼa martah be maʼrafa wa yaʼarif tamaam kadar hi ma gawiiye mislah.
Karrumu awiinku achaan hinna kula yawrisan maʼaaku al-haya al-abadiiye be rahmat Allah.
Wa taabuʼu kalaami da achaan cheyy ma yitallif salaawaatku.
Wasaaya le kulla l-muʼminiin
8 Wa aakhir cheyy nuguulah leeku kulluku,
khalli galibku yabga waahid wa khalli ruuhku tabga tawiile.
Arraayado ambeenaatku be mahabba akhawiiye wa be galib hanuun wa maskunu nufuusku.
9 Kan al-naas yisawwu foogku chokhol fasil,
ma turuddu leehum be chokhol fasil.
Wa kan yiʼayyuruuku,
ma turuddu leehum be muʼyaar.
Laakin ruddu leehum be l-kalaam al-yijiib al-baraka.
Achaan Allah naadaaku fi derbah le tibaaruku al-naas wa tawrusu min Allah baraka.
10 Wa maktuub fi l-Kitaab <Ayyi naadum al-yidoor yiʼiich be haya taybe wa be farah,
khalli ma yihajji kalaam fasil wa khalli ma yikallim kalaam khachch.
11 Khalli yutuub min al-fasaala wa yisawwi al-kheer.
Khalli yukhutt baalah fi l-salaam wa yitaabiʼah be niiye waahide.
12 Achaan Allah yiraakhib al-saalihiin wa yasmaʼ duʼaahum.
Laakin Allah adu al-naas al-yisawwu al-fasaala>.
Al-taʼab fi chaan al-kheer
13 Wa yaatu al-yisawwi leeku cheyy fasil,
kan intu munkaribiin fi l-kheer ?
14 Wa kan yitaʼʼubuuku be sabab intu saalihiin kula,
intu mubaarakiin.
Ma takhaafo minhum wa ma tibarjulu.
15 Laakin khuttu fi guluubku kadar al-Masiih hu khudduus wa hu Rabbuku.
Agoodu daayman jaahiziin achaan turuddu le ayyi naadum al-yatlub minku daliil hana l-acham al-induku.
16 Laakin hajju leyah be nafas baarid wa ihtiraam.
Sawwu kulla cheyy be niiye mukhlisa.
Wa be da,
al-eeb yisawwiihum le l-naas al-yathamooku wa yiʼayyuruuku fi chaan al-kheer al-tisawwuuh fi derib al-Masiih.
17 Wa kan Allah yanti izin le l-naas achaan yitaʼʼubuuku,
akheer yitaʼʼubuuku be sabab al-kheer al-intu sawweetuuh min yitaʼʼubuuku be sabab intu sawweetu fasaala.
18 Wa l-Masiih kula tiʼib taʼab waahid wa nihaaʼi fi chaan zunuub al-naas.
Al-saalih maat fi chaan al-muznibiin wa be da,
yiwaddiiku kulluku fi hadarat Allah.
Hu katalooh wa maat misil moot al-naas wa Allah hayyaah be l-Ruuh al-Khudduus.
19 Wa be gudrat al-Ruuh al-Khudduus,
hu macha wa ballakh be nasrah le l-malaaʼika* al-gaaʼidiin fi l-sijin kula.
20 Zamaan,
al-malaaʼika dool abo ma taabaʼo kalaam Allah,
wakit Allah al-Sabuur gaaʼid yarja lahaddi Nuuh yikammil al-safiina.
Wa naas chiyya bas rikbo fi l-safiina wa adadhum tamaane wa humman dool nijo be sabab al-almi al-rafaʼ al-safiina.
21 Wa da masal hana al-takhtiis al-hassaʼ yinajjiiku.
Wa l-muhimm fi l-takhtiis ma khasuul al-jilid min al-wasakh laakin hu al-ahad al-tisawwuuh maʼa Allah be niiye mukhlisa.
Wa l-takhtiis yinajjiiku be sabab buʼaas Isa al-Masiih.
22 Wa l-Masiih hu al-macha foog fi l-samaawaat wa hassaʼ gaaʼid jamb Allah fi nussah al-zeenaay.
Wa l-malaaʼika wa l-hukkaam wa l-kubaaraat kulluhum tihtah.