Al-hajar al-hayy wa chaʼab Allah
2
Achaan da,
khallu minku kulla l-fasaala wa kulla cheyy hana l-najaada wa l-nifaakh wa l-husud wa kulla l-kalaam al-fasil.
2 Wa misil al-sakhiir al-yitmanna laban ammah,
intu kula itmannu al-laban al-saafi al-jaayi min kalaam Allah.
Hu yikabbirku wa beyah talgo al-naja.
3 Wa intu taʼarfu kadar Rabbina al-Masiih kariim achaan intu dugtu kheerah.
4 Garrubu leyah.
Hu bas al-hajar al-hayy al-Allah ikhtaarah al-indah khiima kabiire bilheen laakin al-naas ma dawwarooh.
5 Wa intu kula misil al-hujaar al-hayyiin al-Allah gaaʼid yabni beeku beet hana Ruuhah.
Wa intu rujaal diin khaassiin le Allah wa gaaʼidiin tigaddumu leyah ibaada be l-Ruuh al-Khudduus.
Wa ibaaditku be usum Isa al-Masiih di,
Allah yarda beeha.
6 Wa Allah gaal fi l-Kitaab <Asmaʼo.
Ana nukhutt fi Jabal Sahyuun hajar hana rukun.
Wa hu al-hajar al-ana ikhtirtah al-indah khiima kabiire bilheen.
Wa l-muʼmin beyah,
abadan ma yafchul>.
7 Wa leeku intu al-muʼminiin,
al-Masiih hu al-hajar al-indah khiima kabiire.
Wa laakin le l-naas al-ma muʼminiin,
hu bigi misil al-kalaam al-maktuub fi l-Kitaab al-buguul <Al-hajar al-bannaayiin al-beet awwal ma dawwarooh bigi al-hajar al-muhimm fi buna al-beet>.
8 Wa <Hu al-hajar al-giddaam rijileenhum.
Wa yintaggu foogah wa be sababah yagaʼo>.
Wa yintaggu foogah achaan abo ma yitaabuʼu kalaam Allah wa da mukhaddar leehum.
9 Laakin kan leeku intu,
bigiitu al-gabiila al-Allah ikhtaaraaha wa rujaal diin hana l-malik al-kabiir wa umma al-khaassa le Allah wa chaʼab hana Allah zaatah.
Hu naadaaku achaan tamurgu min al-dalaam wa tadkhulu fi nuurah al-ajiib wa khalaas tiballukhu khabar hana aʼmaal Allah al-kubaar.
10 Wa maktuub fi l-Kitaab <Awwal intu ma ummat Allah,
laakin hassaʼ intu bigiitu ummatah.
Awwal rahmat Allah ma jaat foogku,
laakin hassaʼ rahmatah jaat foogku khalaas>.
Abiid Allah ajaanib fi l-dunya
11 Ya akhwaani al-nihibbuku al-aaychiin fi l-dunya misil ajaanib wa diifaan,
asmaʼo kalaami.
Chahwaat al-bachar adu,
aabo ma titaabuʼuuhum.
12 Khalli haalku fi ust al-naas al-ma baʼarfu Allah tabga adiile.
Wa be misil da,
kan yakdubu fiiku wa yuguulu intu naas fasliin kula,
yichiifu amalku al-sameh wa fi l-akhiir yimajjudu Allah fi yoom al-faraj.
13 Fi chaan Rabbina,
taabuʼu kalaam hana ayyi naadum al-indah sulta.
Taabuʼu kalaam al-malik,
kabiir al-balad
14 wa l-hukkaam al-hu khattaahum le yahkumu al-mujrimiin wa yachkuru al-naas al-yisawwu al-kheer.
15 Wa di muraadat Allah leeku,
be l-kheer al-tisawwuuh,
tiwaggufu al-kalaam al-baatil al-buguuluuh foogku al-naas al-jaahiliin.
16 Iichu be hurriiye laakin ma tichiilu al-hurriiye di fursa le tisawwu beeha al-fasaala.
Ma tanso kadar intu abiid Allah.
17 Karrumu kulla l-naas.
Hibbu kulla akhwaanku al-muʼminiin.
Aʼabudu Allah be l-takhwa.
Karrumu al-malik.
Wasaaya le l-abiid
18 Wa leeku intu al-abiid,
asmaʼo kalaam siyaadku be sabab al-takhwa.
Kan humman zeeniin wa kalaamhum baarid walla kan kalaamhum haarr kula,
asmaʼo kalaamhum.
19 Wa aʼarfu ayyi naadum al-yahmal al-taʼab be l-sabur achaan hu gaaʼid yifakkir fi Allah wakit al-naas yazlumuuh,
al-naadum da Allah yibaarikah.
20 Wa kan tisawwu cheyy fasil wa be sababah yudugguuku wa intu tahmalooh be sabur,
chunu al-faayde ?
Laakin kan intu tisawwu al-kheer wa yitaʼʼubuuku be sababah wa intu tahmalooh be l-sabur,
khalaas Allah yibaarikku.
21 Da bas al-derib al-Allah naadaaku foogah.
Achaan al-Masiih kula tiʼib fi chaanku wa bigi leeku masal achaan titaabuʼuuh.
22 Hu abadan ma aznab wa abadan ma khachcha ayyi naadum.
23 Wakit ayyarooh hu ma radda leehum be muʼyaar.
Wakit taʼʼabooh,
hu ma haddadaahum.
Fi badalah,
hu atwakkal ale Allah al-yihaasib be l-hagg.
24 Wa fi l-saliib hu be nafsah hamal zunuubna fi jismah achaan nikhallu minnina al-zunuub marra waahid wa niʼiichu be haal saalhe.
Wa intu ligiitu al-chifa be sabab jiraahah.
25 Achaan awwal intu misil khanam muwaddiriin laakin hassaʼ gabbaltu le raʼiiku al-yahfadku.