Wasaaya le l-chuyuukh
5
Wa nidoor nihajji le l-chuyuukh al-maʼaaku.
Ana kula cheekh misilhum wa ana chaahid le taʼab al-Masiih wa battaan muchaarik fi gudrat al-Masiih al-majiide al-tibiin gariib.
Asmaʼo kalaami.
2 Rayyusu al-muʼminiin al-maʼaaku.
Humman misil khanam hana Allah wa hu kallafaaku beehum misil ruʼyaan.
Wa chiilu al-masʼuuliiye fooghum ma misil jabarooku laakin be niiyitku giddaam Allah wa ma achaan tidooru minhum ribah al-ma waajib laakin chiilu al-masʼuuliiye di be farah.
3 Wa ma tisawwu nufuusku siyaadhum le l-naas al-Allah kallafaaku beehum misil khanam laakin abgo leehum masal lahaddi yitaabuʼu deribku.
4 Wa wakit al-Masiih kabiir al-ruʼyaan yibiin,
hu yantiiku al-taaj al-majiid al-jamaalah abadan ma yikammil.
Al-maskana wa l-iimaan al-saabit
5 Wa leeku intu kula al-chabaab,
asmaʼo adiil kalaam al-chuyuukh.
Wa nuguul leeku kulluku,
maskunu nufuusku giddaam akhwaanku wa akhdumu leehum.
Achaan Allah yaaba al-naas al-yistakbaro wa yanti niʼma le l-naas al-yimaskunu nufuushum.
6 Maskunu nufuusku giddaam gudrat Allah wa fi l-wakit al-muwaafig,
hu bas yarfaʼku.
7 Kulla cheyy al-tihimmu beyah,
khalluuh le Allah achaan intu muhimmiin leyah.
8 Khuttu baalku wa agoodu waaʼiyiin achaan aduuku Ibliis gaaʼid yihaawig foogku misil duud al-gaaʼid yikirr wa yidoor fursa yaakul naadum.
9 Agoodu saabtiin fi iimaanku wa agiifu didd Ibliis.
Aʼarfu kadar akhwaanku fi ayyi bakaan gaaʼidiin yahmalo nafs al-taʼab misilku.
10 Wa Allah al-naadaaku achaan titaabuʼu al-Masiih wa tadkhulu fi majdah al-abadi,
rahmatah hu takfiiku fi kulla haal.
Wa baʼad intu tiʼibtu wakit chiyya,
Allah zaatah yikammil khidimtah fiiku wa yisabbitku wa yigawwiiku wa yisabbit haalku.
11 Wa l-muluk waajib leyah hu bas ila l-abad.
Aamiin.
Nihaayat al-jawaab
12 Wa ana katabt leeku al-jawaab al-gisayyir da maʼa akhuuna Siila wa nachhad leyah hu akhu saadikh.
Wa katabtah leeku achaan nichajjiʼku wa nachhad leeku kadar induku niʼmat Allah al-sahiihe.
Wa agoodu foogha saabtiin.
13 Wa l-muʼminiin hini fi Baabil* al-Allah ikhtaaraahum misil hu ikhtaaraaku yisallumuuku.
Wa wileedi Markhus yisallimku kula.
14 Assaalamo ambeenaatku be salaam al-mahabba.
Al-salaam aleeku kulluku intu al-induku alaakha maʼa l-Masiih.