Khatar al-naas al-khallo al-iimaan
6
Achaan da,
khalli namchu giddaam le l-taʼliim al-waajib le l-naas al-aagliin fi l-Masiih wa nikhallu waraana al-duruus al-awwalaaniyiin.
Ma nabdo battaan be taʼliim al-tooba min al-aʼmaal al-yiwaddu al-naas le l-moot wa taʼliim al-iimaan be Allah.
2 Ma niʼallumu battaan al-khasuul wa baruud al-tihaara wa khattiin al-iideen foog al-naas wa ma niʼallumu battaan buʼaas al-maytiin wa l-hisaab al-akhiir.
3 Wa khalaas,
namchu giddaam kan Allah gaal aamiin.
4 Al-naas al-khiblo nuur Allah fi guluubhum wa irifo al-baraka al-Allah antaaha wa chaarako fi l-Ruuh al-Khudduus
5 wa daago al-kheer hana kalaam Allah wa ajaayib hana l-zaman al-jaayi fi l-aakhira,
6 humman dool kan abo al-iimaan,
ma mumkin nigabbuluuhum le l-tooba.
Achaan al-naas dool bigo misil gaaʼidiin yaktulu Ibn Allah fi l-saliib marra taaniye wa yiʼayyuruuh giddaam al-naas.
7 Wa naʼarfu kadar al-ard al-chirbat almi al-matar al-sabba foogha wa gawwamat al-nabaat al-indah faayde le l-naas al-haratooha,
al-ard di Allah yibaarikha.
8 Laakin kan al-ard tigawwim chook wa haskaniit,
hi ma indaha faayde wa laʼanat Allah tigarrib leeha wa fi l-akhiir yiharruguuha.
Waʼad Allah wa haliiftah
9 Ya akhwaanna al-nihibbuuku,
hatta kan nihajju leeku be l-kalaam al-misil da kula,
ma indina chakk foogku.
Intu gaaʼidiin fi l-derib al-adiil wa akiid hu derib al-naja.
10 Achaan Allah daayman aadil.
Hu ma yansa khidmitku fi chaanah wa l-mahabba al-wassaftuuha leyah be musaaʼaditku le akhwaanku al-saalihiin.
Wa ya hassaʼ intu gaaʼidiin tisaaʼuduuhum.
11 Wa nidooru kadar ayyi waahid minku yiwassif daayman al-niiye al-adiile al-misil di wa achamku yabga bala chakak lahaddi al-akhiir.
12 Wa kan tisawwu misil da,
ma tabgo kaslaaniin laakin titaabuʼu derib hana l-naas al-gaaʼidiin saabtiin fi l-iimaan be l-sabur wa yawrusu barakat Allah al-waaʼadaahum beeha.
13 Achaan Allah anta waʼad le Ibraahiim wa halaf.
Wa Allah halaf be nafsah achaan abadan ma fi cheyy akbar minnah le yahlif beyah.
14 Wa Allah gaal <Akiid ana nibaarikak wa zurriiytak tabga katiire>.
15 Wa khalaas,
Ibraahiim sabar sabur gawi wa ligi al-cheyy al-Allah waaʼadah beyah.
16 Akiid,
al-naas fi aadithum yahlufu be cheyy akbar minhum wa kan naadum yiʼakkid kalaamah be haliife khalaas,
battaan kalaam ma fi.
17 Wa Allah kula,
wakit hu yikallim le l-naas al-yawrusu waʼadah wa yidoor yiʼakkid leehum kharaarah abadan ma yikhayyir,
hu sabbatah leehum be haliife.
18 Wa fi chaan al-kalaam da,
indina chajaaʼa chadiide,
awwal be waʼad Allah wa battaan be haliifit Allah.
Al-achya al-itneen dool akiid yukuunu achaan ma mumkin Allah yabga kaddaab.
Wa khalaas,
aniina al-tubna le Allah achaan nanjo,
nakurbu gawi al-acham al-hu gaddamah leena.
19 Achamna fi Isa da misil witid saabit al-yisabbit nufuusna achaan Isa macha wara l-sitaar daakhal fi Beet Allah.
20 Aywa,
Isa dakhal fi Beet Allah al-samaawi fi chaanna misil giid achaan hu bigi raajil diin kabiir ila l-abad misil Malkisaadikh.