5
Ayyi raajil diin kabiir yikhtaarooh min al-naas achaan yakhdim le l-naas giddaam Allah wa yigaddim leyah dahaaya chig chig le zunuubhum.
2 Wa hu yaʼarif kikkeef yihajji be nafas baarid le l-naas al-jaahiliin wa le l-naas al-muwaddiriin achaan hu kula insaan muʼarrad le l-duʼuf.
3 Achaan da,
laabudda hu yigaddim le Allah dahiiye le zunuubah hu,
wa le zunuub al-chaʼab kula.
4 Wa naadum ma yidarrij nafsah le l-khidme al-mucharrafa di.
Allah bas yinaadiih leeha misil zamaan hu naada leeha Haaruun*.
5 Wa l-Masiih kula ma darraj nafsah achaan yisawwi nafsah raajil diin kabiir,
laakin al-darrajah hu Allah al-gaal leyah <Inta ibni wa l-yoom ana bigiit abuuk>.
6 Wa fi bakaan waahid fi l-kitaab,
hu gaal <Inta raajil diin daayim misil Malkisaadikh*>.
7 Wakit Isa gaaʼid fi l-dunya,
hu naada Allah al-yagdar yafzaʼah min al-moot wa saʼalah be hiss aali wa dumuuʼ.
Wa Allah khibil suʼaalah achaan hu takhi.
8 Sahiih,
Isa hu Ibnah laakin hu atʼallam kikkeef yitaabiʼ kalaam abuuh be l-taʼab al-tiʼibah.
9 Wa khalaas,
hu bigi al-Munajji al-kaamil wa bigi derib al-naja al-abadiiye le kulla l-naas al-yitaabuʼu kalaamah.
10 Wa Allah jaʼalah raajil diin kabiir misil Malkisaadikh.
Al-sakhiir fi l-iimaan wa l-aagil
11 Indina kalaam katiir nidooru nuguuluuh leeku fi l-taʼliim da laakin tafsiirah leeku gaasi leena achaan intu bigiitu mataamiis.
12 Intu al-tawwaltu fi l-derib,
waajib tabgo muʼallimiin hana l-iimaan laakin be l-sahiih,
intu hawjaaniin le duruus awwalaaniyiin hana kalaam Allah.
Intu bigiitu misil al-sakhiir al-lissaaʼah hawjaan le laban ammah achaan hu ma jaahiz le l-akil.
13 Ayyi naadum al-aayich be l-laban lissaaʼ sakhiir wa ma yaʼarif derib al-saalihiin.
14 Wa l-taʼliim al-muhimm,
hu misil al-laham wa hu waajib le l-naadum al-aagil fi l-iimaan al-darrasooh lahaddi yaʼarif kikkeef yimayyiz al-kheer min al-charr.