Al-dakhuul fi raahat Allah
4
Khalli nakhaafo achaan waʼad Allah al-bukhuss al-dakhuul fi raahtah lissaaʼ gaaʼid.
Khalli ayyi naadum minku yadkhul fi l-raaha di bala fachal.
2 Aniina simiʼna al-bichaara misil awwal humman kula simʼooha.
Laakin al-kalaam al-humman simʼooh ma jaab leehum faayde achaan al-naas al-simʼooh ma khiblooh be iimaan.
3 Wa aniina al-aamanna bas nadkhulu fi l-raaha al-Allah hajja beeha di wa gaal <Wa fi zaʼali,
ana halaft wa gult abadan ma yadkhulu fi raahti>.
Wa naʼarfu raahtah gaaʼide achaan amalah kammal min hu kawwan al-dunya.
4 Achaan al-kitaab kallam fi bakaan waahid be l-yoom al-saabiʼ wa gaal <Allah kammal khidimtah wa l-yoom al-saabiʼ hu chaalah yoom hana l-raaha>.
5 Wa battaan,
Allah hajja be raahtah wakit hu gaal <Ma yadkhulu fi raahti>.
6 Wa khalaas,
fi niiyit Allah fi naas yadkhulu fi raahtah wa laakin al-naas al-awwal simʼo bichaarat Allah ma dakhalo fi l-raaha di be sabab isyaanhum.
7 Wa battaan,
Allah gataʼ le l-naas yoom waahid wa sammaah «
al-yoom ».
Wa siniin katiiriin baʼad al-isyaan da,
hu hajja beeha fi kalaam Dawuud al-aniina kallamna beyah al-gaaʼid fi l-kitaab al-buguul <Al-yoom,
kan tasmaʼo hiss Allah,
ma tigawwu ruuseenku>.
8 Wa akiid kan Yachuuʼa wadda al-chaʼab fi l-raaha khalaas,
Allah ma yihajji battaan be yoom aakhar.
9 Wa be da,
naʼarfu kadar raaha aakhara misil raahat yoom al-sabit tifaddil le chaʼab Allah.
10 Wa l-naadum al-yadkhul fi raahat Allah yagiif min khidimtah misil Allah wigif min khidimtah.
11 Wa khalaas,
khalli nijaahudu le nadkhulu fi l-raaha di achaan naadum minnina ma yiwaddir be sabab al-isyaan misil juduudna.
12 Kalaam Allah hayy wa gaadir wa yagtaʼ ziyaada min seef mutarrag jaayi wa jaayi.
Hu yagtaʼ daakhal fi l-naadum marra waahid lahaddi yalhag al-bakaan al-yilimmu foogah al-nafas wa l-ruuh,
wa l-udaam wa l-muchaach.
Kalaam Allah yimayyiz al-afkaar wa l-niiye fi galib al-insaan.
13 Wa ma fi cheyy fi kulla l-khaliige al-mulabbad le Allah wa kulla cheyy makchuuf wa waadih giddaamah.
Wa giddaamah hu bas,
aniina kullina waajib naju be aʼmaalna achaan hu yihaasibna.
Isa raajil al-diin al-kabiir
14 Taʼarfu kadar aniina indina raajil diin kabiir wa hu aziim wa talaʼ foog fi l-samaawaat wa hu Isa Ibn Allah.
Wa achaan da,
khalli nakurbu gawi iimaanna be Isa al-nachhado leyah.
15 Raajil al-diin hanaana da,
yaʼarif duʼufna achaan hu kula jarrabooh be kulla l-tajriba misilna laakin hu abadan ma sawwa khata.
16 Wa khalaas,
khalliina naʼabudu Allah al-rahiim bala chakak achaan hu yarhamna.
Wa nalgo minnah al-niʼma al-tisaaʼidna fi ayyi wakit al-nihtaajo leeha.