Isa akbar min Muusa
3
Achaan da,
ya akhwaani al-saalihiin al-Allah naadaaku kulluku le tadkhulu fi derbah,
fakkuru fi Isa.
Hu rasuul Allah wa raajil al-diin al-kabiir al-aniina muʼminiin beyah wa nachhado leyah.
2 Wa hu amiin le Allah al-kallafah be l-khidme di misil zamaan Muusa kula bigi amiin fi l-khidme al-Allah kallafah beeha fi kulla beetah.
3 Laakin al-ikraam al-waajib le Isa ziyaada min al-ikraam al-waajib le Muusa misil al-naadum al-bana al-beet mukarram ziyaada min al-beet al-hu banaah.
4 Wa kulli beet indah naadum al-banaah wa laakin Allah bas al-bana kulla cheyy.
5 Wa Muusa al-bigi amiin fi kulla beet Allah,
hu gaaʼid foogah achaan hu khaddaam Allah wa bigi chahaada le l-kalaam al-Allah yidoor yiballikhah fi l-mustakhbal.
6 Laakin al-Masiih bigi amiin achaan hu Ibn Allah al-masʼuul fi Beet Allah.
Wa aniina be nafisna bas beetah,
kan nagoodu saabtiin bala chakak wa nukhuttu achamna daayman fi l-Masiih al-aniina nilfachcharo beyah.
Masal al-juduud al-gawwo ruuseenhum
7 Achaan da,
asmaʼo al-kalaam al-buguulah al-Ruuh al-Khudduus.
<Al-yoom,
kan tasmaʼo hiss Allah,
8 ma tigawwu ruuseenku misil juduudku al-abo ma taabaʼo kalaamah fi wakit al-tajriba fi l-sahara.
9 Fi l-bakaan da,
juduudku jarrabooni wa imtahanooni hatta kan chaafo fiʼli
10 fi muddat arbaʼiin sana.
Wa khalaas,
ana ziʼilt min al-naas dool wa gult humman yiriidu yiwadduru nufuushum wa abadan ma yaʼarfu derbi.
11 Wa fi zaʼali,
ana halaft wa gult abadan ma yadkhulu fi raahti>.
12 Ya akhwaani,
khuttu baalku achaan galib hana ayyi naadum ma yabga fasil wa yaaba al-iimaan wa yamrug min derib Allah al-Hayy.
13 Achchaajaʼo ambeenaatku kulla ma yoom,
aywa,
kulla ayyaam ninaaduuhum al-yoom,
achaan al-zanib ma yukhuchch naadum minku wa yigawwi raasah.
14 Achaan kullina bigiina muchaarikiin fi l-Masiih kan sahiih nitaabuʼu al-iimaan al-indina min al-bidaaya wa nagoodu saabtiin foogah lahaddi l-nihaaya.
15 Al-kitaab buguul <Al-yoom,
kan tasmaʼo hiss Allah,
ma tigawwu ruuseenku misil juduudku al-abo ma taabaʼo kalaamah>.
16 Yaatumman al-naas al-simʼo kalaam Allah laakin abooh ?
Humman kulla l-naas al-taabaʼo Muusa wa marago min Masir.
17 Yaatumman al-naas al-Allah ziʼil minhum fi muddit arbaʼiin sana ?
Humman al-naas al-aznabo wa janaazaathum faddalo fi l-sahara.
18 Wa yaatumman al-naas al-Allah halaf leehum kadar ma yadkhulu fi raahtah ?
Humman al-naas al-iso Allah.
19 Wa khalaas be l-kalaam da,
naʼarfu kadar ma gidro yadkhulu fi raahtah achaan ma induhum iimaan.