Kubuuriiyit Malkisaadikh
7
Wa Malkisaadikh da,
hu malik hana madiinat Chaaliim wa raajil diin hana Allah al-Aali.
Wa hu laaga Ibraahiim wa baarakah wakit Ibraahiim mugabbil min al-bakaan al-annasar foogah fi l-muluuk.
2 Wa leyah hu,
Ibraahiim anta al-uchur min kulla cheyy al-chaalah fi l-harb.
Wa awwal cheyy,
al-usum Malkisaadikh maʼanaatah al-malik al-saalih wa battaan hu malik Chaaliim maʼanaatah malik al-salaam.
3 Wa fi l-kitaab,
hu ma indah abu wa la amm wa la gurma.
Waktah ma indah bidaaya wa hayaatah ma indaha nihaaya laakin hu gaaʼid daayman misil Ibn Allah wa hu raajil diin ila l-abad.
4 Fakkuru fi kubuuriitah.
Ibraahiim zaatah antaah al-uchur min kulla cheyy al-chaalah fi l-harb wa Ibraahiim hu jiddina al-kabiir.
5 Wa l-naas al-min zurriiyit Laawi al-Allah jaʼalaahum rujaal diin induhum izin fi l-Tawraat achaan yichiilu al-uchur min al-chaʼab,
yaʼni min akhwaanhum.
Wa akhwaanhum dool kula min zurriiyit Ibraahiim.
6 Laakin Malkisaadikh da,
hu ma min zurriiyit Laawi misilhum wa hu chaal al-uchur min Ibraahiim wa baarakah wa Ibraahiim hu bas al-naadum al-Allah antaah al-wuʼuud.
7 Wa bala chakk,
al-naadum al-yanti al-baraka akbar min al-naadum al-yichiilha.
8 Wa misil da,
al-Laawiyiin al-bichiilu al-uchur,
humman al-naas al-yumuutu laakin Malkisaadikh al-bichiil al-uchur hayy hasab chahaadat al-kitaab.
9 Be masal aakhar,
nagdaro nuguulu kadar iyaal Laawi al-bichiilu al-uchur zaathum anto al-uchur le Malkisaadikh be waasitat Ibraahiim
10 achaan Laawi lissaaʼah gaaʼid fi sulub jiddah Ibraahiim wakit Malkisaadikh laagaah.
Raajil diin misil Malkisaadikh
11 Wa khidmit rujaal al-diin al-min zurriiyit Laawi,
hi asaas al-churuut al-Allah antaahum le l-chaʼab.
Laakin kan al-naas yagdaro yabgo kaamiliin be khidmit rujaal al-diin al-min zurriiyit Laawi,
maala jayyit raajil diin aakhar misil Malkisaadikh tabga muhimma wa ma raajil diin misil Haaruun* ?
12 Wa akiid kan khidmit rujaal al-diin khayyarat,
laabudda al-churuut kula yikhayyuru.
13 Wa Isa al-nihajju beyah ma min zurriiyit Laawi.
Wa min gabiiltah,
abadan ma fi naadum al-kallafooh be l-dahiiye.
14 Achaan Rabbina Isa hu min zurriiyit Yahuuza wa da maʼruuf.
Wa fi l-cheyy al-bukhuss gabiilat Yahuuza,
Muusa abadan ma gaal cheyy fi rujaal al-diin.
15 Wa l-kalaam da yabga waadih bilheen wakit yaji raajil diin aakhar wa hu yichaabih Malkisaadikh.
16 Wa Isa bigi raajil diin be sabab gudrat hayaatah al-ma tikammil wa ma be sabab chart waahid min churuut al-Tawraat al-bukhuss zurriiyit al-naas.
17 Achaan al-kitaab chahad le Isa wa gaal <Inta raajil diin daayim misil Malkisaadikh>.
18 Wa khalaas,
al-chart al-gadiim bigi baatil achaan ma yanfaʼ wa ma indah gudra.
19 Akiid,
churuut al-Tawraat ma jaʼalo ayyi cheyy yukuun kaamil.
Wa Allah jaab fi badalhum derib akheer ziyaada al-beyah naʼabudu Allah be acham jadiid.
20 Wa battaan,
fi cheyy aakhar wa hu haliifit Allah.
Al-naas al-awwal bigo rujaal diin ma bigo be haliife.
21 Laakin Isa bigi raajil diin be haliifit Allah.
Maktuub fi l-kitaab <Allah halaf wa yitimm kalaamah al-buguul :
Inta raajil diin daayim>.
22 Be l-sabab da,
indina muʼaahada akheer ziyaada wa Isa hu al-yadman leena al-muʼaahada di.
23 Wa battaan fi cheyy aakhar.
Rujaal al-diin al-min zurriiyit Laawi dool katiiriin achaan humman yumuutu wa be da,
ayyi waahid ma yagdar yitawwil fi khidimtah.
24 Laakin Isa,
hu raajil al-diin al-yagood daayman achaan hu hayy ila l-abad.
25 Be l-sabab da,
hu daayman yagdar yinajji al-naas al-yaʼabudu Allah beyah hu,
achaan hu hayy daayman wa gaaʼid yasʼal leehum Allah.
26 Wa be da,
Isa bigi raajil al-diin al-kabiir al-muwaafig leena marra waahid.
Hu saalih wa ma indah ayyi eeb wa hu daayman taahir.
Hu maʼzuul baʼiid min al-muznibiin wa marfuuʼ foog fi l-samaawaat.
27 Isa hu ma misil rujaal al-diin al-kubaar al-aakhariin dool.
Ma waajib leyah kulla yoom yigaddim dahiiye awwal fi chaan zunuubah hu,
wa baʼad da dahiiye fi chaan zunuub al-chaʼab.
La.
Hu gaddam dahiiye waahide bas wa nihaaʼiiye wakit gaddam nafsah fi l-saliib.
28 Aywa,
churuut al-Tawraat khatto al-naas al-muʼarradiin le l-duʼuf rujaal diin kubaar.
Laakin al-haliife al-jaat baʼad al-Tawraat khattat Ibn Allah raajil diin kabiir wa da hu al-Allah sawwaah kaamil ila l-abad.