Buulus fi Kuruntus
18
Baʼad da,
Buulus marag min hillit Atiina wa macha fi hillit Kuruntus.
2 Wa hinaak ligi naadum Yahuudi usmah Akiila min balad Buntus.
Wa hu dahaabah ja fi Kuruntus maʼa martah usumha Biriskiila.
Jo min madiinat Rooma al-fi Itaaliya achaan al-sultaan Kuluudi amar kulla l-Yahuud achaan yamurgu min Rooma.
Wa Buulus macha sallamaahum.
3 Wa Buulus kula usta fi nafs al-khidme misilhum.
Khidmithum yisawwu al-khiyam.
Wa achaan da,
hu gaʼad fi beethum wa bada yakhdim maʼaahum.
4 Wa kulla yoom al-sabit,
hu yamchi fi beet al-sala wa yinaakhich maʼa l-Yahuud wa maʼa l-Yuunaaniyiin achaan yijiibhum fi l-derib.
5 Wa wakit Siila wa Timuutaawus jo min balad Magiduuniya,
Buulus khalla al-khidme wa gamma yiballikh al-bichaara kulla yoom.
Wa hu gaaʼid yihajji le l-Yahuud wa yachhad kadar Isa bas al-Masiih.
6 Laakin al-Yahuud abo ma dawwaro chahaadtah wa bado yiʼayyuruuh.
Wa Buulus hatta khalagah minhum wa gaal :
Kan tidooru tiwadduru,
da ma lammaani.
Ana bari minku.
Min al-yoom niballikh al-bichaara le l-naas al-ma Yahuud.
7 Wa khalaas,
Buulus khalla beet al-sala wa bada yiʼallim fi beet hana naadum usmah Tiitus Yustus.
Hu yaʼabud Allah laakin hu ma Yahuudi.
Wa beetah gaaʼid jamb beet al-sala.
8 Wa masʼuul hana beet al-sala usmah Kiriisbus.
Wa hu wa kulla naas beetah aamano be l-Rabb Isa.
Wa naas katiiriin fi Kuruntus simʼo kalaam Buulus wa aamano be l-bichaara wa khattasoohum.
9 Wa yoom waahid fi l-leel,
al-Rabb Isa ja le Buulus fi ruʼya wa gaal leyah :
Ma takhaaf.
Kallim wa ma taskut.
10 Ana gaaʼid maʼaak.
Wa ma fi naadum yagdar yisawwi leek cheyy fasil.
Wa indi naas katiiriin fi l-hille di.
11 Wa Buulus gaʼad fi Kuruntus sana wa nuss wa gaaʼid yiʼallim kalaam Allah le l-naas.
12 Wa wakit Khaaliyuun bigi haakim fi balad Yuunaan,
al-Yahuud astafago ambeenaathum achaan yikhaalufu Buulus wa gammo waddooh fi bakaan al-haakim.
13 Wa gaalo :
Al-raajil da gaaʼid yiharrich al-naas achaan yaʼabudu Allah be ibaada al-tikhaalif al-gaanuun.
14 Wa Buulus gamma achaan yihajji wa laakin Khaaliyuun hajja le l-Yahuud wa gaal :
Ya l-Yahuud,
kan kalaamku foog al-naadum da tuhma hana jariime walla zulum,
waajib nasbur wa nasmaʼ kalaamku.
15 Laakin tihajju fi tafsiir hana kalimaat wa asaame bas wa fi kalaam hana chariiʼatku wa laazim intu tihillu al-muchkila di ambeenaatku.
Fi l-kalaam al-misil da,
ana ma nidoor nagtaʼ chariiʼa.
16 Wa khalaas taradaahum min al-mahkama.
17 Wa kulla l-naas karabo Suustaan masʼuul hana beet al-sala wa gammo daggooh fi giddaam al-mahkama wa laakin Khaaliyuun gaaʼid saakit ma hajja cheyy.
Buulus macha yichiif hillit Afasus
18 Wa Buulus gaʼad battaan fi Kuruntus mudda tawiile.
Wa baʼad da,
hu sallam al-akhwaan achaan yidoor yisaafir.
Dawwar yamchi fi Suuriya be safiina.
Wa Biriskiila wa Akiila kula macho maʼaayah.
Wa fi hillit Kankhiriyya gubbaal ma yarkab fi l-safiina,
Buulus zayyan raasah achaan sawwa ahad giddaam Allah.
19 Wa wakit wislo fi hillit Afasus,
Buulus khalla Biriskiila wa Akiila.
Wa macha dakhal fi beet al-sala hana l-Yahuud wa naakhach maʼaahum.
20 Wa l-Yahuud talabo minnah achaan yagood maʼaahum chiyya wa laakin hu aba
21 wa khallaahum.
Wa hu gaal :
In cha Allah,
nigabbil leeku yoom aakhar.
Wa marag min Afasus wa rikib fi safiina wa saafar.
22 Wa nazal fi khachum al-bahar hana Geesariiya wa macha fi Madiinat al-Khudus wa sallam jamaaʼat al-muʼminiin wa baʼad da,
macha fi hillit Antaakiya.
23 Wa gaʼad hinaak ayyaam.
Wa baʼad da,
gamma faat fi buldaan Khalaatiya wa Firijiiya raayikh min hille le hille.
Wa Buulus gaaʼid yichajjiʼ kulla l-talaamiiz achaan yagoodu saabtiin fi l-iimaan.
Abuluus
24 Fi l-wakit da,
Yahuudi waahid usmah Abuluus ja fi hillit Afasus.
Hu min al-Iskandriiya wa yiʼallim al-naas be kalaam halu wa hu aalim chadiid fi l-Kitaab.
25 Gubbaal ma yaji fi Afasus,
Abuluus allamooh fi derib al-Rabb Isa.
Wa gamma kallam be chidde wa gaaʼid yiʼallim al-naas be l-achya al-bukhussu Isa be kalaam sahiih.
Wa laakin ma irif cheyy fi l-khattisiin illa taʼliim hana Yahya.
26 Wa gamma kallam bala chakak fi beet al-sala.
Wa Biriskiila wa Akiila simʼo kalaamah wa waddooh fi beethum wa fassaro leyah derib Allah be ziyaada.
27 Wa Abuluus dawwar yisaafir fi balad Yuunaan wa l-akhwaan chajjaʼooh wa katabo maktuub le l-talaamiiz al-gaaʼidiin hinaak achaan yakurbuuh adiil.
Wa wakit hu wisil hinaak,
hu gamma yiʼallim al-naas.
Wa be misil da,
aawanaahum bilheen le l-naas al-bigo be rahmat Allah muʼminiin be l-Masiih.
28 Wa Abuluus gaaʼid yinaakhich maʼa l-Yahuud giddaam naas al-hille be kalaam gawi.
Wa waddah leehum min al-Kitaab kadar Isa bas al-Masiih.