Fi Tasaluuniiki
17
Wa Buulus wa Siila faato giddaam wa chaggo hillit Amm Fiibulus wa hillit Abu Luuniya wa wislo fi hillit Tasaluuniiki.
Wa fi l-hille di,
al-Yahuud induhum beet al-sala.
2 Wa fi muddit talaata usbuuʼ,
Buulus gaaʼid yadkhul fi beet al-sala kulla yoom al-sabit misil fi aadatah wa gaaʼid yinaakhich maʼa l-Yahuud fi kalaam al-Kitaab.
3 Wa gaaʼid yifassirah wa waddah leehum laabudda al-Masiih yatʼab wa yabʼas min ust al-maytiin.
Wa gaal leehum :
Isa al-niballikh leeku beyah da,
hu bas al-Masiih al-intu gaaʼidiin tarjooh.
4 Wa waahidiin min al-naas simʼo al-kalaam da adiil wa aamano wa lammo maʼa Buulus wa Siila.
Wa katiiriin min al-naas al-aamano humman min al-Yuunaaniyiin al-yaʼabudu Allah maʼa l-Yahuud wa beenhum awiin katiiraat hana kubaaraat al-hille.
5 Wa be da,
al-Yahuud al-ma aamano hasadoohum le Buulus wa Siila wa naado al-naas al-hawaaniin al-raaykhiin fi l-chawaariʼ wa lammoohum fi bakaan waahid wa gammo harrachoohum lahaddi bigi barjaal kabiir fi lubb al-hille.
Wa hajamo beet Yaasuun achaan yidooru yamurgu Buulus wa Siila fi giddaam al-naas.
6 Wa wakit ma ligoohum,
karabo Yaasuun wa waahidiin min al-akhwaan.
Wa l-naas karroohum min al-beet wa waddoohum giddaam hukkaam al-hille.
Wa aato be hiss chadiid wa gaalo :
Al-naas dool gaaʼidiin yisawwu machaakil fi ayyi bakaan wa hassaʼ jo hini fi hillitna kula.
7 Wa Yaasuun da dayyafaahum.
Humman ma yitaabuʼu wasaaya sultaan hana l-roomaaniyiin wa yiballukhu le l-naas be sultaan aakhar usmah Isa.
8 Wa wakit naas al-hille wa hukkaamhum simʼo al-kalaam da,
barjalo bilheen.
9 Wa l-hukkaam talabo min Yaasuun wa min al-akhwaan al-maʼaayah yikaffu gurus le damaanithum wa khalaas talagoohum.
Fi Biriiya
10 Wa wakit bigi fi leel,
al-akhwaan rassalo Buulus wa Siila fi hillit Biriiya.
Wa wakit wislo,
macho fi beet al-sala hana l-Yahuud.
11 Wa l-Yahuud al-fi Biriiya kariimiin min al-Yahuud al-gaaʼidiin fi Tasaluuniiki.
Humman simʼo kalaam Allah be farha wa gammo yagru fi l-Kitaab kulla yoom achaan yaʼarfu kan taʼliim hana Buulus sahiih walla ma sahiih.
12 Wa katiiriin minhum aamano be Isa.
Wa been al-naas al-aamano fi Yuunaaniyiin kula.
Wa beenhum fi awiin hana kubaaraat al-hille wa rujaal katiiriin.
13 Wa l-Yahuud al-gaaʼidiin fi Tasaluuniiki simʼo Buulus gaaʼid yiballikh kalaam Allah fi Biriiya.
Wa macho wa bado yiharruchu naas al-hille achaan yazʼalo min Buulus.
14 Wa ajala ke,
al-akhwaan chaalo Buulus min al-hille wa waddooh le khachum al-bahar.
Wa Siila wa Timuutaawus gaʼado fi l-hille.
15 Wa l-akhwaan raafago Buulus lahaddi wislo fi hillit Atiina wa khalaas gabbalo fi hillithum.
Wa Buulus rassal beehum kalaam achaan Siila wa Timuutaawus yaju leyah ajala.
Buulus fi Atiina
16 Wa wakit Buulus gaaʼid yarjaahum fi Atiina,
hu chaaf asnaam fi ayyi bakaan.
Wa da bigi leyah gaasi bilheen.
17 Wa bada yadkhul fi beet al-sala wa yinaakhich maʼa l-Yahuud wa l-Yuunaaniyiin al-yaʼabudu Allah.
Wa kulla yoom,
gaaʼid yinaakhich fi l-suug maʼa ayyi naadum al-yalgaah hinaak.
18 Wa ulama waahidiin gammo yinaakhuchu maʼa Buulus wa humman ulama hana l-falsafa,
min al-Abiiguuriyiin wa min al-Riwaagiyiin.
Wa simʼo kalaamah fi Isa wa buʼaasah.
Wa waahidiin gaalo :
Chunu kalaam hana l-hajjaay al-jaahil da ?
Maʼanaatah chunu ?
Wa waahidiin gaalo :
Akuun yikallim be ilaahaat hana buldaan aakhariin.
19 Wa waddo Buulus fi majmaʼ hana majlis al-hille.
Wa saʼalooh wa gaalo :
Ooriina be l-kalaam al-jadiid al-jibtah da.
20 Simiʼna minnak kalaam ajiib wa nidooru nafhamooh adiil.
21 Wa kulla naas Atiina wa l-ajaanib al-saakniin maʼaahum yiriidu bilheen yinaakhuchu fi ayyi raay jadiid.
22 Wa Buulus gamma fi ust al-majlis wa gaal :
Ya naas hana Atiina.
Ana naʼarif kadar fi kulla cheyy intu naas al-tiriidu al-adyaan.
23 Wa wakit ana gaaʼid nuruukh fi hillitku,
chift al-bakaanaat al-taʼabudu fooghum.
Wa ligiit bakaan waahid wa gareet al-kalaam al-maktuub foogah.
Wa l-kalaam al-maktuub foogah hu «
Le l-ilaah al-ma maʼruuf ».
Wa khalaas,
ana niʼooriiku be Allah al-taʼabuduuh wa ma taʼarfuuh.
24 Allah khalag al-dunya wa kulla cheyy al-gaaʼid foogha.
Hu Rabb al-samaawaat wa l-ard.
Al-naas yabnu buyuut hana l-ibaada laakin Allah ma saakin fooghum.
25 Hu ma hawjaan khidmit al-naas.
Hu bas al-yanti al-haya wa l-nafas le kulla l-naas wa hu bas al-yantiihum kulla cheyy.
26 Hu khalag kulla l-gabaayil min naadum waahid wa gassam leehum al-buldaan al-yaskunu fooghum fi kulla l-ard.
Wa min al-awwal,
hu haddad leehum muddat al-wakit al-gaaʼidiin foogha wa antaahum huduud diyaarhum.
27 Wa Allah sawwa ke achaan al-naas yifattuchuuh wa akuun yalgooh.
Wa laakin hu ma baʼiid min ayyi waahid minnina
28 achaan beyah hu bas,
niʼiichu wa nuruukhu wa nukuunu.
Walla misil waahidiin min chuʼaaraaku gaalo kamaan «
Aniina zurriiytah ».
29 Wa kan aniina zurriiyit Allah,
waajib ma nukhuttu fi fikirna kadar Allah bichaabih misil al-dahab wa la l-fudda wa la l-hajar wa la bichaabih misil ayyi sanam al-naas yagdaro yasnaʼooh be gudrithum wa la min afkaarhum.
30 Allah ma haasab al-naas fi zaman al-jahal wa laakin hassaʼ Allah yinaadi kulla l-naas fi ayyi bakaan achaan yutuubu min zunuubhum.
31 Wa Allah gataʼ leena yoom achaan yihaasib foogah kulla naas al-dunya be l-adaala.
Wa Allah kallaf al-Hisaab da be l-raajil al-hu ikhtaarah.
Wa l-naadum da,
Allah baʼasah min ust al-maytiin achaan kulla l-naas yaʼarfu da bas al-naadum al-ikhtaarah.
32 Wa wakit simʼo be l-buʼaas,
waahidiin minhum chammato le Buulus laakin waahidiin gaalo :
Nidooru inta tihajji leena battaan be l-kalaam da.