Injiil al-Masiih
Al-juzu al-Yuuhanna katabah
Mugaddima
Allah hu saahib al-nuur wa saahib al-hagg wa hu bas al-yanti al-haya le l-naas. Wa hu rassal al-Masiih fi l-dunya achaan yanti le l-naas al-nuur wa l-hagg wa l-haya al-abadiiye. Wa hu rassalah awwal le l-Yahuud wa laakin kubaaraat al-Yahuud ma khiblooh. Induhum diin min Allah laakin aaychiin fi l-dalaam achaan hayyin le l-naas yukhuchchu nufuushum. Allah rassal Isa al-Masiih achaan yaftah le l-naas derib jadiid al-beyah al-naas yabgo iyaal Allah wa yiʼiichu fi l-nuur.
Wa da juzu waahid min Injiil al-Masiih. Wa hu yachhad be kalaam waadih le kubuuriiyit al-Masiih wa yizakkirna kadar hu Kalimat Allah wa Nuur al-Aalam wa l-Kharuuf al-Allah rassalah. Al-juzu da yiʼooriina be chahaadat al-nabi Yahya le l-Masiih wa yiwassifna kikkeef Allah chihid le l-Masiih be l-ajaayib al-antaahum leyah. Wa kalaam al-juzu da yiwassifna kadar al-Masiih irif kadar laabudda yumuut fi l-saliib fi chaan zunuub al-naas wa yabʼas min ust al-maytiin achaan yaftah derib al-haya al-abadiiye le bani Adam.
Usum al-naadum al-Rabbina ikhtaarah achaan yaktib al-juzu da, hu Yuuhanna wileed Zabadi wa hu katabah be gudrat al-Ruuh al-Khudduus. Hu min talaamiiz al-Masiih al-awwalaaniyiin. Gubbaal al-Masiih ma yinaadiih, hu hawwaati maʼa akhwaanah. Wa Isa jaʼalah Rasuul wa rassalah achaan yachhad le l-Masiih. Hu katab talaata jawaabaat al-gaaʼidiin fi l-Injiil wa hu katab al-Ruʼya. Wa usmah binlagi fi l-Injiil fi bakaanaat katiiriin laakin fi l-juzu da, hu zaatah ma tara usmah. Fi badalah, hu buguul « al-tilmiiz al-Isa yiriidah bilheen ». Wa Yuuhanna katabah be izin al-Rabb wa hu zaatah fassar leena maala hu katabah wakit hu gaal <Al-kalaam al-maktuub hini ankatab achaan intu tisaddukhu kadar Isa hu al-Masiih wa Ibn Allah wa tiʼaamunu beyah wa talgo be usmah al-haya al-abadiiye>. Aamiin.