Injiil al-Masiih
Al-juzu al-Yuuhanna katabah
Al-Masiih hu Kalimat Allah
1
Fi l-bidaaya al-Kalima gaaʼide.
Wa l-Kalima gaaʼide maʼa Allah wa l-Kalima hi Allah.
2 Fi l-bidaaya hu gaaʼid maʼa Allah.
3 Wa kulla cheyy kawwan be l-Kalima wa min kulla l-achya al-kawwano,
ma fi cheyy al-kawwan balaayah.
4 Hu indah al-haya wa l-haya hi nuur le l-naas.
5 Al-nuur gaaʼid yidawwi fi l-dalaam wa laakin al-dalaam ma annasar foogah.
6 Wa Allah rassal naadum waahid usmah Yahya.
7 Hu ja achaan yachhad wa chahad le l-nuur achaan kulla l-naas yiʼaamunu be l-nuur be sabab chahaadtah.
8 Yahya zaatah hu ma al-nuur laakin hu ja achaan yachhad le l-nuur.
9 Wa l-nuur al-sahiih ja fi l-dunya le yanti al-nuur le kulla l-naas.
10 Al-dunya kawwanat beyah wa laakin wakit hu ja fi l-dunya,
naas al-dunya ma irifooh.
11 Hu ja fi daarah wa laakin naas daarah ma khiblooh.
12 Laakin le kulla l-naas al-khiblooh wa aamano be usmah,
hu fatah leehum al-derib achaan yabgo iyaal Allah.
13 Wa yabgo iyaal Allah ma be sabab waaldeenhum wa ma be sabab chahwat al-naas wa ma be sabab niiye hana ayyi raajil laakin humman bigo iyaal Allah be gudrat Allah bas.
14 Wa l-Kalima bigat naadum wa hu sakan fi usutna.
Wa chifna gudurtah al-majiide.
Wa gudurtah hi majiide bilheen wa muwaafge le l-Ibn al-waahid al-jaayi min Allah Abuuh.
Wa hu malaan be l-rahma wa l-hagg.
15 Wa Yahya chaahid leyah wa naada al-naas wa gaal :
Da bas al-naadum al-ooreetku beyah wa gult hu al-jaayi waraayi aali minni bilheen achaan hu mawjuud gubbaali.
16 Wa rahmatah kaamile wa kullina ligiina minha baraka fi baraka.
17 Allah nazzal churuut al-Tawraat fi iideen Muusa wa laakin Allah nazzal al-rahma wa l-hagg be Isa al-Masiih.
18 Abadan ma fi naadum chaaf Allah laakin Ibn Allah al-waahid al-gaaʼid jamb Abuuh,
da bas hu al-bayyan Allah le l-naas.
Yahya radda le l-Yahuud
19 Wa diihi chahaadat Yahya wakit kubaaraat al-Yahuud rassalo leyah rujaal diin wa Laawiyiin min Madiinat al-Khudus achaan yasʼalooh hu yaatu.
20 Yahya ma nakar cheyy wa laakin chahad be kalaam waadih wa gaal :
Ana ma al-Masiih.
21 Wa achaan da,
saʼalooh battaan wa gaalo :
Inta yaatu ?
Inta al-nabi Iliyaas* walla ?
Wa Yahya gaal :
La,
ana ma hu.
Wa gaalo :
Inta al-nabi* al-baji walla ?
Wa radda leehum wa gaal :
La.
22 Wa khalaas gaalo leyah :
Inta yaatu ?
Ooriina achaan nigabbulu le l-naas al-rassaloona wa niʼooruuhum.
Chunu al-kalaam al-tuguulah fi nafsak ?
23 Wa hu radda leehum be kalaam al-nabi Ichaʼya wa gaal :
Ana <Hiss al-naadum al-gaaʼid binaadi fi l-khala wa buguul :
Addulu derib al-Rabb>.
24 Wa fiyah Fariisiyiin been al-naas al-rassaloohum.
25 Wa humman saʼalo Yahya wa gaalo :
Kan inta ma al-Masiih wa la Iliyaas wa la l-nabi al-baji,
maala inta gaaʼid tikhattis* al-naas fi almi ?
26 Wa Yahya radda leehum wa gaal :
Ana nikhattis al-naas fi almi wa laakin naadum waahid gaaʼid maʼaaku wa intu ma taʼarfuuh.
27 Wa hu bas al-naadum al-yaji waraayi.
Wa ana ma tammeet leyah khaddaam kula.
28 Wa l-bakaan al-saʼalo Yahya foogah,
hu fi hillit Beet Anya al-gaaʼide fi Waadi al-Urdun fi nussah al-sabhaani.
Wa da al-bakaan al-Yahya gaaʼid yikhattis foogah al-naas.
Kharuuf Allah
29 Wa ambaakir,
Yahya chaaf Isa jaayi leyah wa gaal :
Da bas al-kharuuf al-Allah rassalah achaan yamha zunuub hana naas al-dunya.
30 Da bas al-naadum al-ooreetku beyah wa gult naadum waahid yaji waraayi wa hu aali minni bilheen achaan hu mawjuud gubbaali.
31 Awwal ana ma iriftah.
Laakin ana jiit nikhattis al-naas achaan niwassifah le Bani Israaʼiil.
32 Wa Yahya chahad leyah wa gaal :
Ana chift al-Ruuh al-Khudduus nazal foogah min al-sama misil hamaama wa dalla foogah wa gaʼad.
33 Awwal ana ma iriftah laakin al-rassalaani le nikhattis al-naas fi almi hajja leyi min awwal wa gaal «
Al-naadum al-tichiif al-Ruuh al-Khudduus yanzil foogah wa yagood foogah,
da bas al-naadum al-yikhattis al-naas fi l-Ruuh al-Khudduus ».
34 Wa khalaas,
ana chiftah wa ana chaahid leyah hu Ibn Allah.
Talaamiiz al-Masiih al-awwalaaniyiin
35 Wa ambaakir,
Yahya gaaʼid fi nafs al-bakaan wa naaseen min talaamiizah gaaʼidiin maʼaayah.
36 Wa Yahya chaaf Isa raayikh fi l-derib wa gaal leehum :
Daahu Kharuuf Allah.
37 Wa l-talaamiiz al-itneen simʼo kalaamah wa gammo taabaʼo Isa.
38 Wa Isa anlafat wa chaafaahum jaayiin waraayah.
Wa saʼalaahum wa gaal :
Tifattuchu chunu ?
Wa raddo leyah wa gaalo :
Ya rabbaai,
inta saakin ween ?
Wa «
rabbaai »
maʼanaatah sayyid be kalaam ibraani.
39 Wa Isa radda leehum wa gaal :
Taʼaalu chiifu al-bakaan.
Wa da bigi fi l-asur.
Wa macho maʼaayah wa chaafo al-beet al-hu gaaʼid foogah wa l-yoom da gaʼado maʼaayah.
40 Wa naadum waahid min al-naaseen al-simʼo kalaam Yahya wa gammo taabaʼo Isa,
usmah Andareeyas wa hu akhu hana Simʼaan Butrus.
41 Awwal cheyy,
Andareeyas macha ligi akhuuh Simʼaan wa hajja leyah wa gaal :
Ligiina Massiiya.
Wa «
Massiiya »
maʼanaatah al-Masiih be kalaam ibraani.
42 Wa Andareeyas wadda Butrus le Isa.
Wa Isa chaaf Simʼaan fi uyuunah wa gaal :
Inta Simʼaan wileed Yuuhanna.
Binaaduuk Safa.
Wa maʼana hana Safa hu hajar wa be kalaam yuunaani da Butrus.
43 Wa ambaakir,
Isa dawwar yamchi fi Daar al-Jaliil.
Wa ligi Filibbus wa gaal leyah :
Taʼaal taabiʼni.
44 Wa Filibbus hu min hillit Beet Seeda wa di hille hana Andareeyas wa Butrus.
45 Wa Filibbus macha ligi Natanaayil wa gaal leyah :
Ligiina al-naadum al-Muusa katab be sababah fi l-Tawraat wa l-anbiya katabo beyah fi kutubhum.
Wa hu Isa wileed Yuusuf min hillit al-Naasira.
46 Wa Natanaayil radda leyah wa gaal :
Haay !
Mata ke yoom waahid cheyy adiil ja min al-Naasira ?
Wa Filibbus gaal leyah :
Taʼaal maʼaayi wa chiifah.
47 Wa Isa chaaf Natanaayil jaayi leyah wa gaal :
Daahu Israaʼiili sahiih.
Hu ma yukhuchch ayyi naadum.
48 Wa Natanaayil saʼalah wa gaal :
Kikkeef iriftini ?
Wa Isa gaal :
Chiftak wakit inta gaaʼid tihit al-chadara gubbaal Filibbus ma yinaadiik.
49 Wa Natanaayil gaal :
Sayyidna,
inta Ibn Allah !
Inta malik hana Israaʼiil !
50 Wa Isa gaal leyah :
Inta aamant beyi achaan gult leek ana chiftak fi tihit al-chadara ?
Tichiif achya kubaar min da.
51 Wa Isa gaal leehum :
Asmaʼo,
nuguul leeku al-hagg,
tichiifu al-sama faatih wa malaaʼikat Allah taaliʼiin wa naaziliin* foog Ibn al-Insaan.