Al-almi bigi khamar
2
Wa fi l-yoom al-taalit,
naas waahidiin fi hillit Kaana fi daar al-Jaliil sawwo aazuuma hana iris wa amm Isa hidrat.
2 Wa azamo Isa kula wa talaamiizah.
3 Wa fi l-aazuuma,
al-khamar kammal wa amm Isa hajjat leyah wa gaalat :
Khamarhum kammal.
4 Wa Isa radda leeha wa gaal :
Mara zeene,
maala ooreetini ana ?
Da ma lammaani.
Al-wakit al-Allah gataʼah leyi lissaaʼ ma ja.
5 Wa ammah hajjat le l-khaddaamiin wa gaalat :
Sawwu ayyi cheyy al-hu yuguulah leeku.
6 Wa fi sitte dawaayin kubaar gaaʼidiin fi l-bakaan da.
Wa dool dawaayin hana hajar wa yusubbu fooghum almi fi chaan wadu hana l-Yahuud wa ayyi waahide minhum tichiil tamaaniin walla miya liitir.
7 Wa Isa hajja le l-khaddaamiin wa gaal :
Amlo al-dawaayin almi.
Wa khalaas maloohum tak.
8 Wa Isa gaal leehum :
Hassaʼ chiilu almi chiyya wa wadduuh le siid al-aazuuma.
Wa khalaas waddooh leyah.
9 Wa siid al-aazuuma daag al-almi al-bigi khamar.
Wa hu ma irif al-khamar ja min ween wa laakin al-khaddaamiin al-kharafo al-almi irifooh.
Wa siid al-aazuuma naada al-ariis
10 wa gaal leyah :
Naas aakhariin yantu diifaanhum al-khamar al-halu awwal.
Wa baʼad al-diifaan chirbo katiir,
yantuuhum al-khamar al-hawaan.
Wa laakin inta akhkhart al-khamar al-halu wa hassaʼ bas anteetah leena.
11 Wa l-ajab al-Isa sawwaah fi hillit Kaana fi daar al-Jaliil,
di awwal alaama al-Isa wassafaaha.
Wa be misil da,
hu wassaf gudurtah al-majiide le talaamiizah wa humman aamano beyah.
12 Wa baʼad da,
hu macha maʼa ammah wa akhwaanah wa talaamiizah fi hillit Kafar Naahuum wa gaʼado ayyaam.
Al-Masiih fi Beet Allah
13 Wa wakit Iid al-Fisha hana l-Yahuud garrab,
Isa macha fi Madiinat al-Khudus.
14 Wa macha fi hooch Beet Allah wa chaaf al-naas al-gaaʼidiin yibiiʼu bagar wa khanam wa hamaam wa l-naas al-gaaʼidiin yibaddulu gurus.
15 Wa chaal hubaal waahidiin wa sawwa beehum soot.
Wa tarad beyah kulla l-naas min hooch Beet Allah maʼa l-bagar wa l-khanam.
Wa rama taraabiiz hana l-naas al-gaaʼidiin yibaddulu gurus wa chattat gurushum.
16 Wa hajja be hiss chadiid le l-naas al-gaaʼidiin yibiiʼu hamaam wa gaal :
Amurgu khumaamku wa khallu minku al-tijaara fi beet Abuui.
17 Wa talaamiizah fakkaro fi l-kalaam al-maktuub al-buguul <Fi chaan beetak,
galbi haami misil al-naar>.
18 Wa kubaaraat al-Yahuud saʼalooh wa gaalo :
Ween al-ajab al-tiwassifah leena achaan naʼarfu indak izin min Allah achaan tisawwi cheyy misil da ?
19 Wa Isa radda leehum wa gaal :
Dammuru al-beet da wa ana nigawwimah fi talaata yoom.
20 Wa kubaaraat al-Yahuud raddo leyah wa gaalo :
Al-beet da gaaʼidiin yabnuuh min sitte wa arbaʼiin sana wa inta tidoor tabniih marra taaniye fi talaata yoom ?
21 Wa laakin wakit Isa gaal «
al-beet da »
hu ma hajja be l-beet al-naas banooh.
Hu hajja be jismah.
22 Wa wakit Allah baʼas Isa min ust al-maytiin khalaas,
talaamiizah fakkaro fi l-kalaam al-gaalah da wa saddakho be l-kutub wa saddakho be kalaam Isa.