Buulus naada Timuutaawus
16
Wa Buulus macha giddaam le hillit Darba.
Wa baʼadeen ja fi hillit Listara.
Wa fi Listara,
tilmiiz waahid gaaʼid usmah Timuutaawus.
Ammah Yahuudiiya muʼmine be l-Masiih wa abuuh Yuunaani.
2 Wa kulla l-akhwaan fi Listara wa Iguuniya buguulu hu naadum adiil bilheen.
3 Wa Buulus dawwar Timuutaawus yaji yakhdim maʼaayah.
Kulla l-Yahuud fi l-bakan da irifo kadar abu Timuutaawus Yuunaani wa achaan da,
Buulus gamma tahharah hasab aadat al-Yahuud.
4 Wa Buulus wa l-akhwaan al-maʼaayah gammo raakho hille le hille wa ooro al-muʼminiin be kharaar hana l-rusul wa l-chuyuukh al-fi Madiinat al-Khudus wa wassoohum achaan yitaabuʼu kalaamhum.
5 Wa be misil da,
kulla jamaaʼaat al-muʼminiin bigo gawiiyiin fi l-iimaan wa kulla yoom adad naashum gaaʼid yiziid.
Naadoohum fi balad Magiduuniya
6 Wa l-Ruuh al-Khudduus ma antaahum izin yiballukhu al-bichaara fi balad Aasiya.
lass="footnote selectable" id="F-0">* Wa khataro fi Firijiiya wa Khalaatiya.
7 Wa wakit lihgo huduud hana balad Misiiya,
chaalo derib hana balad Bisinya wa laakin Ruuh Isa ma dawwar humman yadkhulu foogha.
8 Wa khalaas,
chaalo derib hana hillit Turuwaas wa chaggo balad Misiiya.
9 Wa fi l-leele di,
Buulus riʼi wa fi l-ruʼya,
chaaf raajil min naas hana Magiduuniya.
Wa l-raajil gaaʼid yinaadi Buulus wa buguul :
Taʼaal hini fi Magiduuniya wa aawinna.
10 Wa baʼad Buulus chaaf al-ruʼya di,
fihimna kadar Allah naadaana achaan niballukhu al-bichaara le l-naas al-fi balad Magiduuniya.
Wa tawwaali ke,
gammeena chilna al-derib.
11 Wa gammeena min Turuwaas wa gataʼna al-bahar wa lihigna jaziirat Saamutraaki.
Wa ambaakir macheena giddaam wa nazalna fi hillit Niyaabulus.
12 Wa min hinaak macheena fi hillit Filibbi.
Wa hi hille al-banooha al-Roomaaniyiin fi l-mantiga al-awwalaaniiye hana Magiduuniya.
Wa gaʼadna hinaak ayyaam.
13 Wa yoom al-sabit,
maragna barra min al-hille wa macheena jamb al-waadi achaan hasabna da bas al-bakaan al-yisallu foogah al-Yahuud.
Wa ligiina al-bakaan wa gaʼadna tihit wa kallamna le l-awiin al-lamman foogah.
14 Wa been al-awiin mara waahide hi taajire hana gumaach khaali wa hi min hillit Siyaatiira.
Hi ma min banaat al-Yahuud wa laakin gaaʼide taʼabud Allah maʼaahum wa usumha Liidiya.
Wakit gaaʼide tasmaʼ kalaam Buulus,
al-Rabb fatah galibha achaan tiʼaamin.
15 Wa baʼad khattasooha maʼa kulla naas beetha,
hi saʼalatna be chidde achaan nabgo diifaanha.
Wa gaalat :
Kan sahiih intu hasabtuuni muʼmine be Rabbina,
taʼaalu agoodu fi beeti.
Wa talabat minnina ziyaada lahaddi macheena gaʼadna fi beetha.
Buulus wa Siila fi l-sijin
16 Wa yoom waahid,
aniina maachiin fi bakaan al-sala wa khaadum waahide jaat leena.
Hi mara jannaaniye wa tichiif le l-naas.
Wa siyaadha ligo min junuunha gurus katiir.
17 Wa gammat titaabiʼ Buulus wa aniina al-raaykhiin maʼaayah wa gaaʼide tihajji be hiss chadiid wa tuguul :
Al-naas dool abiid Allah al-Aali wa jo achaan yiballukhu leeku kikkeef tanjo.
18 Wa yoom katiir hi gaaʼide titaabiʼna lahaddi Buulus ziʼil wa anlafat leeha wa kachcha le l-cheetaan al-gaaʼid foogha wa gaal :
Be usum Isa al-Masiih,
naamurak.
Amrug minha.
Wa tawwaali ke,
al-cheetaan marag minha.
19 Wa wakit siyaadha chaafo al-gurus al-yalgooh minha angataʼ,
karaboohum le Buulus wa Siila wa karroohum fi ust al-hille fi bakaan al-malamma giddaam al-kubaaraat.
20 Wa gaddamoohum le l-hukkaam wa gaalo :
Al-rujaal dool Yahuud.
Humman yisawwu machaakil fi hillitna.
21 Humman gaaʼidiin yiʼallumu al-naas aadaat mamnuuʼa leena aniina al-Roomaaniyiin.
Waajib leena naaboohum wa ma nitaabuʼu kalaamhum.
22 Wa kulla naas al-hille ziʼilo wa kallamo didd Buulus wa Siila.
Wa l-hukkaam charrato khulgaan Buulus wa Siila wa amaro al-askar achaan yafurchuuhum be asaay.
23 Wa farachoohum farich chadiid wa dassoohum fi l-sijin.
Wa amaro haras hana l-sijin achaan yahrishum adiil marra waahid.
24 Wa l-haras simiʼ adiil amurhum da.
Wa saagaahum fi l-bakaan al-daakhal fi lubb al-sijin wa gayyadaahum min rijileenhum fi l-hatab al-tagiil.
25 Wa fi ust al-leel,
Buulus wa Siila gaaʼidiin yisallu wa yachkuru Allah be madih wa l-masaajiin gaaʼidiin yasmaʼoohum.
26 Wa fi l-wakit da bas,
al-ard anhazzat zilzaal chadiid wa gaʼar al-sijin rajaf wa kulla l-biibaan anfataho wa kulla guyuud al-masaajiin anhallo.
27 Wa l-haras gamma min al-noom wa chaaf kulla l-biibaan faathiin wa fi fikrah,
al-masaajiin jaro khalaas wa salla seefah achaan yaktul nafsah*.
28 Wa laakin Buulus naadaah be hiss foog wa gaal leyah :
Ma tisawwi le nafsak cheyy fasil.
Aniina kullina gaaʼidiin.
29 Wa l-haras naada naadum waahid achaan yijiib leyah deyy wa andassa fi l-sijin ajala ke.
Hu gaaʼid yarjif min al-khoof.
Wa macha wagaʼ giddaam Buulus wa Siila.
30 Wa maragaahum barra.
Wa saʼalaahum wa gaal :
Ya saadaati,
waajib nisawwi chunu achaan nanja ?
31 Wa raddo leyah wa gaalo :
Aamin be l-Rabb Isa wa tanja,
inta wa naas beetak.
32 Wa gammo ballakho kalaam al-Rabb le l-haras wa le kulla naas beetah.
33 Wa fi l-wakit da bas,
fi ust al-leel hu waddaahum fi bakaan indah almi wa khassal leehum awaawiirhum.
Wa tawwaali ke,
humman khattasooh maʼa kulla naas beetah.
34 Baʼad da,
al-haras wadda Buulus wa Siila fi beetah wa faddalaahum wa gaddam leehum akil.
Wa hu firih bilheen maʼa kulla naas beetah achaan aaman be Allah.
35 Wa wakit al-wata asbahat,
al-hukkaam rassalo askar waahidiin achaan yuguul le l-haras khalli yatlig Buulus wa Siila.
36 Wa l-haras oora Buulus be kalaamhum wa gaal :
Al-hukkaam rassalo kalaam achaan natligku wa khalaas,
amurgu hassaʼ wa amchu be l-salaam.
37 Wa Buulus aba wa gaal :
Farachoona giddaam al-naas bala chariiʼa wa dassoona fi l-sijin.
Wa aniina indina jinsiiya roomaaniye.
Wa hassaʼ yidooru yatluguuna be achiir ?
Abadan !
Khalli yaju hini wa yatluguuna.
38 Wa l-askar gabbalo le l-hukkaam wa ooroohum be l-kalaam al-Buulus gaalah leehum.
Wa l-hukkaam khaafo wakit irifo induhum jinsiiya roomaaniye.
39 Wa jo saamahoohum.
Wa l-hukkaam maragoohum min al-sijin wa talabo minhum achaan yamurgu min al-hille.
40 Wa Buulus wa Siila marago min al-sijin wa macho fi beet Liidiya wa lammo maʼa l-akhwaan wa chajjaʼoohum.
Wa baʼad da,
marago min al-hille.